داسې انګېرل کېږي چې نږدې ټول ماشومان- د واکسین له ایجاد مخکې- د ژوند په لومړیو کې په پولیو ویروس اخته شوي وو. د خولې له لارې له پولیو ویروس څخه د خوندیتوب واکسین (OPV) د ۱۹۵۰ زېږدیز کال په پای کې پیل شو. دغې چارې د پولیو یا د ماشومانو د ګوزڼ پېښې پام وړ کمې کړې. په هر صورت، په ۱۹۸۸ زېږدیز کال کې د پولیو د له منځه وړلو نړۍوال کمپاین پیل شو. دغه کمپاین ډېرو سیمو ته وغځېد او د پولیو پېښې- چې په ۱۹۸۸ زېږدیز کال کې ۳۵۰ زره وې- په ۲۰۱۷ کال کې ۲۲ وحشي بڼو (WPV) او ۹۶ (cVDPV) بڼو ته را ټیټې شوې.