په روان کال کې د پولیو واکسین لومړی ملي کمپاین پیل شو
د ۱۴۴۷ هـ ق کال د شوال المکرم ۲۵مه / د ۱۴۰۵ هـ ش کال د وري ۲۴مه
کابل، افغانستان – د افغانستان اسلامي امارت د عامې روغتیا وزارت د نړیوالو ادارو په ملاتړ د ۲۰۲۶ز کال لپاره د پولیو (ګوزڼ) واکسین لومړی ملي کمپاین پیل کړ. دغه کمپاین د روان مېلادي کال د اپرېل له ۱۳مې تر ۱۶مې پورې د دریو ورځو لپاره د هېواد په ټولو حوزو کې پلی کېږي چې په ترڅ کې به یې شاوخوا (۱۲،۶) میلیونه له پنځو کلونو کم عمره ماشومان واکسین شي. دا کمپاین په دایکندي او بامیان ولایتونو کې د سړې هوا له امله ځنډېدلی او په غور ولایت کې به یوه اوونۍ وروسته ترسره شي.
د دغه کمپاین په ترڅ کې به له ۶ تر ۵۹ میاشتو عمر لرونکو ماشومانو ته ویټامین اې (A) هم ورکړل شي چې د هغوی د سترګو، پوستکي او معافیت سیسټم په روغ ساتلو کې مرسته کوي.
د افغانستان اسلامي امارت د عامې روغتیا وزیر، الحاج مولوي نور جلال جلالي وویل: «د عامې روغتیا وزارت له خپلو همکارانو سره په ګډه ژمن دی چې په افغانستان کې د وحشي پولیو ویروس مخه ونیسي. موږ به خپلې ټولې هڅې وکړو او د پولیو واکسین کمپاینونو او نورو اړینو روغتیايي خدماتو به تر هغې دوام ورکړو، څو پولیو ناروغي په بشپړه توګه له افغانستانه له منځه یوسو.»
نوموړي زیاته کړه:«دا ډېره مهمه ده چې د ټولنې ټول اغېزناک کسان، لکه دیني عالمان، قومي مشران او والدین په ټول هېواد کې د پولیو واکسین له ټیمونو ملاتړ وکړي. موږ له ټولو خلکو په درناوي غوښتنه کوو چې د پولیو پر وړاندې مبارزه کې خپله ونډه واخلي او د افغانستان د ماشومانو ژوند او روغتیا خوندي کړي.»
پولیو یوه ویروسي ناروغي ده چې هیڅ درملنه نه لري او مخنیوی یې یوازې په پولیو واکسین سره شونی دی. پولیو ویروس د ماشومانو د دایمي فلج (ګوزڼ) او یا هم مرګ سبب کېدای شي. دا مهال په هېواد کې د پولیو ویروس شته او د عامې روغتیا وزارت یې پر وړاندې مبارزې ته بشپړ چمتووالی لري.
له پولیو ناروغۍ سره په مبارزه کې د ټولنې د ټولو وګړو ملاتړ مهم دی. والدین کولای شي د خپلو ماشومانو په واکسینولو هغوی له دایمي فلج څخه خوندي کړي. قومي مخور کولای شي د خپلو سیمو خلک وهڅوي څو هغوی خپل ماشومان واکسین کړي او د پولیو واکسین له ټیمونو سره مرسته وکړي څو کمپاین په ښه توګه پلی شي.
د واکسین ټیمونه د کمپاین په جریان کې ستاسو د سیمې په ټاکل شوو ځایونو کې شتون ولري. له والدینو او پالونکو څخه غوښتنه کوو چې له دغو ځایونو څخه ځان خبر کړي او خپل ټول له پنځو کلونو کم عمره ماشومان د واکسین لپاره راولي.
د لازیاتو معلوماتو لپاره:
الحاج ډاکټر عبدالقدوس بریالی، د پولیو له منځه وړلو ملي بېړني عملیاتي مرکز مسوول
موبایل: +93704925448
ایمېل: qudus.baryalai@poliofree.af
د اړیکو د مرکز وړیا شمېره: ۱۴۱
