د معلولینو غږ: «خپل ماشومان واکسین کړئ، څو زموږ په څېر له کړاوونو سره مخ نه شي»
بلخ، افغانستان (۱۹ تله ۱۴۰۳) – بلخ مېشتي معلولین چې له خپل معلولیت او د ټولنې له ناوړه چلند څخه ځورېږي، پر والدینو غږ کوي چې خپلو ماشومانو ته د پولیو واکسین ورکړي څو له تلپاتي معلولیت څخه خوندي شي.
د هارون حکیمي په نوم یو معلول ځوان چې د دغه ولایت په مزار شریف ښار کې ژوند کوي، وايي: «معلولیت د ژوند دایمي درد دی، که والدین خپل ماشومان واکسین نه کړي نو هغوی به هم زموږ په څېر معلول شي او په پایله کې به نه یوازې له تلپاتې کړاوونو سره مخ وي، بلکې د کورنۍ او ټولنې د اوږو بار به هم وي.»
نوموړی چې سترګو یې د لیدلو ځواک هم له لاسه ورکړی، زیاتوي، دا چې په خپله معلول دی نو تر بل هر چا په ښه توګه دا درد او کړاو تجربه کوي.
هغه په غمجن انداز وویل: «ما ته مې معلولیت لوی رنځ او ځور دی، له همدې امله زه هره شېبه د خلکو له ناوړه چلند سره مخ یم، ټولنه ما ته د یوه بوج او بار په سترګه ګوري.»
په همدې اساس نوموړی له والدینو غواړي چې په لوی لاس دې خپل اولادونه له دغسې ناوړه برخلیک سره نه مخ کوي، بلکې هغوی ته په پر له پسې توګه د پولیو واکسین ورکړي څو له دغه ناورین څخه وژغورل شي.
حکیمي وايي: «له بده مرغه ځینې والدین د پولیو واکسین په اړه ناسم ذهنیت لري او فکر کوي چې دا کومه بهرنی دسیسه ده او یا هم په راتلونکې کې د ماشومانو روغتیا ته زیان اړوي، هغوی په اصل کې د درواغجنو اوازو ښکار شوي دي، زه دغه ډول والدینو ته وایم، که تاسې زما په څېر د معلولو انسانانو درد او کړاو درک کړئ نو له خپل دغه ډول نظر څخه به پښېمانه شئ.»
بلخ مېشتي معلولین چې له خپل معلولیت او د ټولنې له ناوړه چلند څخه ځورېږي، پر والدینو غږ کوي چې خپلو ماشومانو ته د پولیو واکسین ورکړي څو له تلپاتي معلولیت څخه خوندي شي © له پولیو خلاص افغانستان/ ۱۴۰۳/ عبدالصبور سیرت
سید محمد یزدانپرست یو بل معلول او نابینا ځوان دی چې د خپل فزیکي حالت له امله بلا ډېر کړاوونه او دردونه زغمي.
نوموړی وايي: «زه په ماشومتوب کې معلول شوی یم، چې له امله یې د زده کړو په ګډون د ژوند له ټولو خوږو محروم شوی یم، له هماغه ماشومتوبه د نورو مرستې ته اړ یم، ټول هغه کارونه چې زه یې باید پخپله وکړم، نور یې راته کوي.»
هغه خپلو دغو کړاوونو ته په کتو وویل، د پولیو واکسین په اصل کې یو ماشوم له دغسې حالته خوندي کوي، نو والدین ولې هغه باید خپلو ماشومانو ته ور نه کړي؟
یزدانپرست زیاتوي: «که یوه ماشوم د پولیو په ناروغي اخته او معلول شي، نو نه یوازې هغه پخپله به له ستونزو سره مخ وي، بلکې کورنۍ به یې هم کړاوونه ګالي، ځکه دغه ډول انسان نه شي کولای د نورو وګړو په څېر په ټولنه کې عادي ژوند وکړي، بلکې تل به د نورو مرستې ته اړ وي.»
روغتیايي کارپوهان هم پر خلکو غږ کوي چې پولیو یوه ډېره خطرناکه ناروغي ده او له هغې سره دې سطحي چلند نه کوي.
د ډاکټر عبدالواحد په نوم د بلخ ولایت یو روغتیا پوه وايي، پولیو یوه ویروسي ناروغي ده چې د اعصابو حجرې زیانمنوي او تلپاتی معلولیت رامنځ ته کوي.
هغه زیاتوي: «د واکسین نه ورکول یوازې یو ماشوم نه، بلکې ټولنه په خطر کې اچوي، او والدین باید پوه شي چې د خپل ماشوم د واکسینولو له لارې، نه یوازې خپل ماشوم، بلکې د ټولې ټولنې روغتیا خوندي کوي.»
د بلخ د معلولینو او روغتیاپالانو پیغام روښانه دی: «د پولیو په نوم ناورین څخه د خلاصون یوازینۍ لار واکسین دی، د پولیو واکسین نه یوازې د فردي روغتیا، بلکې د ټولنې په سلامتۍ کې هم مهم رول لري.»
د هارون حکیمي او سید محمد یزدان پرست په څېر کسان- چې د معلولیت له کړاوونو سره مخ دي- له ټولنې غواړي څو د دوی له تجربو درس واخیستل شي.
د دې مهمې مسئلې پر وړاندې د ټولنې یووالی اړین دی، راځئ د پولیو واکسین په اهمیت پوه شو او خپل ټولنیز مسؤلیت ادا کړو، څو زموږ نسلونه له معلولیت پرته عادي ژوند وکړي.
عبدالصبور سیرت، له پولیو خلاص افغانستان
