عزیزګل، د پولیو ویروس په وړاندې د ماشومانو ډال
هرات، افغانستان (۱۹ میزان ۱۴۰۳) – د هرات د انجیل ولسوالۍ په یوه لرې کلي کې د عزیزګل په نوم یوه مور چې حجاب یې اغوستی، د خپلو ماشومانو واړه لاسونه په لاس کې نیولي او د روغتیايي مرکز په لور روانه ده.
عزیزګل هر ځل ۱۰ کیلومتره پلی مزل کوي څو خپل درې ماشومان د پولیو واکسین لپاره روغتیايي مرکز ته بوځي.
دا ۳۸ کلنه مور، سره له دې چې په یو دودیزه ټولنه کې ژوند کوي، پخه اراده لري چې د خپلو ماشومانو روغتیا ډاډمنه کړي.
عزیزګل د روغتیايي مرکز په انتظارخونه کې ناسته ده. خپله دوه نیم کلنه لور یې په غېږ کې نیولې او دوه زامن یې، چې درې نیم او څلور نیم کلن دي، په دواړو خواوو کې ناست دي. ماشومان په ویاړ خپلې رنګ شوې ګوتې پورته کوي، دا د دې ښکارندويي کوي چې له پولیو ویروس څخه د خوندیتوب لپاره یې دوه څاڅکي واکسین ترلاسه کړی دی.
عزیزګل په لېوالتیا او قوي غږ وایي: “زما موخه دا ده چې ماشومان مې له پولیو ویروس څخه خوندي کړم، نه غواړم چې هغوی فلج ووینم.”
هغه چې د امام شش نور کلي اوسېدونکې ده، خپل ماشومان په یوازې ځان واکسین ته راولي، ځکه خاوند یې کارګر دی او ډېرې ورځې د نفقې په لټه له کوره بهر وي.
دې هوښیارې مور د واکسیناسیون په اړه ټول اړین معلومات له ډاکټرانو او روغتیايي مبلغانو تر لاسه کړي دي. “د ماشومانو روغتیا مې تر هر څه مهمه ده. هر میاشت، بې له ځنډه، خپل ماشومان واکسین ته راولم. هغوی اوس له پولیو ویروس څخه په امان کې دي او دا زما لپاره تر ټولو لویه خوښي ده.”
عزیزګل د روغتیايي مرکز په انتظارخونه کې ناسته ده. خپله دوه نیم کلنه لور یې په غېږ کې نیولې او دوه زامن یې، چې درې نیم او څلور نیم کلن دي، په دواړو خواوو کې ناست دي. ماشومان په ویاړ خپلې رنګ شوې ګوتې پورته کوي، دا د دې ښکارندويي کوي چې له پولیو ویروس څخه د خوندیتوب لپاره یې دوه څاڅکي واکسین ترلاسه کړی دی © له پولیو څخه خلاص افغانستان/۱۴۰۳/ مرضیه فروتن
عزیزګل خپل ماشومان یوازې د پولیو په مقابل کې نه واکسینوي، بلکې د نورو ناروغیو لکه شري او ژیړي په وړاندې هم د هغوی د خوندي ساتلو هڅه کوي. هغه نورو مېندو ته هم یو روښانه پیغام لري: “له ټولو ښځو څخه غواړم چې خپل ماشومان واکسین کړي. اوس ډېر لږ خلک د پولیو واکسین مخالفت کوي خو زما په څېر ډېرې مېندې بیا د واکسین په ارزښت پوهېدلې او خپل ماشومان په منظم ډول واکسینوي.”
مرسل عظیمي چې د انجیل ولسوالۍ په روغتیايي مرکز کې د واکسیناتورې په توګه کار کوي، له دغه راز مېندو په درناوي یادونه کوي او وايي: “دغه ډول مېرمنو سره له دې چې سواد نه لري او په دودیزه ټولنه کې ژوند کوي، ثابته کړې چې بامسوولیته مېندې دي، هغوی یوازې او د نارینهوو له شتون پرته خپل ماشومان واکسینوي او د پولیو ویروس د خپرېدو په مخنیوي کې حیاتي رول لوبوي.”
عزیزګل او د هغې په څېر نورې مېندې د پولیو ویروس پر وړاندې د ټولنې ډال دی، هغوی په هر ځل واکسین کولو سره نه یوازې خپل ماشومان بلکې بشپړه ټولنه خوندي کوي.
دغه ډول میندو کلیوالو ټولنو ته د پوهاوي او مسوولیتپالنې روښانه رڼا راوړې، هغه رڼا چې د ویروسونو او وژونکو ناروغیو پر وړاندې د مبارزې لار پرانیزي.
مرضیه فروتن، له پولیو خلاص افغانستان
