د پولیو په وړاندې په لومړۍ کرښه کې د زړورو رضاکارانو نه ستړې کېدونکې مبارزه
کندهار، افغانستان (۱۸ تله ۱۴۰۳) – د یوې ګرمې ورځې سهار دی او لمر د راختو په حال کې دی، د عبدالرحمن په نوم یو زیارکښ واکسیناتور له خپلو نورو رضاکارو ملګرو سره یو ځای د کندهار په سپين بولدک ولسوالۍ کې د افغانستان او پاکستان تر منځ د ډیورنډ کرښې په صفري برخه کې د مسافرو په تمه ولاړ دی، څو هغوی ته د پولیو واکسین ورکړي.
د عبدالرحمن او د هغه د همکارانو ماموریت څرګند دی، هغوی د دواړو غاړو تر منځ تګ راتګ کوونکو ته د پولیو واکسین دوه څاڅکي ورکوي څو له دې لارې د دواړو هېوادونو تر منځ د دغې خطرناکې ناروغۍ د خپرېدو مخنیوی وشي.
دا سرحدي سیمه د افغانستان او پاکستان تر منځ یوه له مزدحمو لارو ده چې هره ورځ ورباندې زرګونه کسان له خپلو ماشومانو او کورنیو سره تګ راتګ کوي.
په همدغه بنسټ دا لار د پولیو ناروغۍ د احتمالي خپرېدو پر وړاندې د مبارزې لومړۍ کرښه هم ده، چې له مخې یې دلته د رضاکارانو ټیمونه ګومارل شوي او هره ورځ په سلګونو او زرګونو ماشومان او لویان واکسینوي.
عبدالرحمن چې د واکسین بکس یې پر اوږه دی، په ډېره مسوولانه توګه هر تلونکی او راتلونکی مسافر څاري او په مهربانۍ د پولیو واکسین ورکوي.
د عبدالرحمن او د هغه د همکارانو ماموریت څرګند دی، هغوی د دواړو غاړو تر منځ تګ راتګ کوونکو ته د پولیو واکسین دوه څاڅکي ورکوي څو له دې لارې د دواړو هېوادونو تر منځ د دغې خطرناکې ناروغۍ د خپرېدو مخنیوی وشي © له پولیو خلاص افغانستان/ ۱۴۰۳/ سعید زابلی
هغه له مسافرو سره په خبرو کې د پولیو واکسین پر اهمیت ټینګار کوي او وايي: «موږ دلته یو څو ستاسې په وسیله د پولیو ویروس د احتمالي خپرېدو مخنیوی وکړو، که خدای مه کړه ستاسې په وسیله په کومه سیمه کې د پولیو ویروس خپور شي نو د ګڼ شمېر ماشومانو ژوند له ګواښ سره مخ کولای شي.»
هغه زیاتوي، د پولیو واکسین د افغانستان او پاکستان تر منځ د کرښې په اوږدو کې د ټولو تګ راتګ کوونکو لپاره مهم دی، ځکه دغه ویروس د هر عمر وګړو له لوري لېږدول کېدای شي.
د ده په وینا، سپين بولدک ولسوالي د هېواد له هغو سیمو ده چې د پولیو ویروس د احتمالي انتقال او خپرېدو له اړخه خورا زیاته پاملرنه ورته کېږي.
عبدالرحمن وویل: «دلته د خلکو د ډېر تګ راتګ له امله د ویروس د لېږد رالېږد خطر تل موجود دی، د ټیم هدف دا دی چې د واکسین په وسیله یې مخینوی وکړي، دلته د واکسیناسیون پروسه یوازې د ماشومانو لپاره نه بلکې د ټولو وګړو لپاره ده، ځکه هر څوک د هر عمر په لرلو دغه ناروغي له یوه هېواده بل ته لېږدولای شي.»
په همدې سیمه کې د جمال په نوم یو بل واکسیناتور چې د یوه ماشوم په خوله کې یې د پولیو واکسین څاڅکي اچول، وویل: «موږ دلته په لومړۍ کرښه کې د یوه داسې دښمن پر وړاندې جګړه کوو چې په سترګو نه لیدل کېږي خو یو ماشوم په تلپاتي فلج اخته کولای شي.»
هغه زیاته کړه، د ده دنده یوه عادي دنده نه ده بلکې دا یوه ملي وجیبه ده چې په وسیله یې د ماشومانو ژوند خوندي کوي.
دی وايي: «زه هر ماشوم ته په دې هیله د پولیو واکسین ورکوم څو روښانه او روغ راتلونکی ولري او د دې بدمرغې ناروغۍ له زیانونو وژغورل شي چې تلپاتی معلولیت دی.»
د سپین بولدک لارې مسافر د پولیو واکسین د رضاکارانو هڅې ستايي او وايي، هغوی یو ډېر لوی مسوولیت ترسره کوي.
سپين بولدک ولسوالي د هېواد له هغو سیمو ده چې د پولیو ویروس د احتمالي انتقال او خپرېدو له اړخه خورا زیاته پاملرنه ورته کېږي © له پولیو خلاص افغانستان/ ۱۴۰۳/ سعید زابلی
د محمد سلیم په نوم یو مسافر چې له خپلې کورنۍ سره یو ځای یې له کویټې ښار څخه کندهار ښار ته سفر کاوه، وویل: «زه چې کله هم پر دې لار سفر کوم نو وینم چې رضاکاران مسافرو ته د پولیو واکسین ورکوي، دا چاره نه یوازې د ماشومانو ژوند ژغوري، بلکې په ټولنه کې د ویروس د انتقال مخنیوی هم کوي.»
هغه زیاتوي، د پولیو ضد واکسین کول یوازینۍ لار ده چې خپلې کورنۍ او راتلونکي نسلونه له دغه خطرناکه ویروس څخه لرې وساتو.
د عبدالنافع په نوم د دغې لارې یو بل مسافر وویل، په داسې سرحدي سیمو کې چې د دوو هېوادونو تر منځ په کې خلک ډېر تګ راتګ کوي، د پولیو ویروس د انتقال خطر ډېر وي.
دی زیاتوي، دلته موجود واکسیناتوران موږ ته ډاډ راکوي چې ماشومان مو خوندي دي او موږ د ویروس له انتقال او خپرېدو ساتي.
هغه وايي: «زه پر خلکو غږ کوم چې د دغه کار ارزښت درک کړي او له رضاکارانو سره همکاري وکړي څو هېواد مو د پولیو ویروس له شره په امان شي.»
روغتیا پوهان د نورو سیمو تر څنګ په سرحدي سیمو کې د هر عمر د وګړو واکسینول د پولیو ویروس په مخنیوي کې مهمه چاره بولي.
د ډاکټر نورالله په نوم د روغتیايي چارو یو کارپوه وايي، په سرحدي سیمو کې د پولیو واکسین کول بېساري اهمیت لري ځکه دلته خلک په پرلهپسې توګه له یو هېواد څخه بل ته سفر کوي او د پولیو ویروس د انتقال خطر څو چنده زیات دی.
هغه زیاتوي، که ویروس له یو لوري بل ته انتقال شي نو ټولې سیمې ته لوی ګواښ پېښولای شي.
د ده په باور د سرحدي سیمو په صفري برخو کې د واکسیناتورانو شتون دا ډاډ ورکوي چې ویروس د انتقال په لومړیو پړاوونو کې درول کېږي، او دا یوازینۍ لاره ده چې موږ کولای شو د دې ناروغۍ د پراخېدو مخه ونیسو.
سعید زابلی، له پولیو خلاص افغانستان
