اورانوس؛ په بدخشان کې د واکسین د پوهاوي او ملاتړ غږ
بدخشان، افغانستان (۱۸ تله ۱۴۰۳) – د بدخشان ولایت اوسېدونکې ۲۴ کلنه خبریاله اورانوس حسیني د واکسیناسیون په اړه خلکو ته د پوهاوي ورکولو او هغوی ته د کره معلوماتو رسولو په یوې اغېزناکې څېرې بدله شوې ده.
هغه هڅه کوي د خپلو راډیويي پروګرامونو له لارې خلکو ته د واکسینونو، په ځانګړې توګه د پولیو واکسین په اړه پوهاوی او معلومات ورکړي او کورنۍ وهڅوي چې خپل ماشومان واکسین کړي.
په داسې یوه ټولنه کې چې لا هم د واکسین په اړه د پوهاوي له ټیټې کچې او ناسمو باورونو سره مخ ده، اورانوس حسيني د پوهاوي غږ ګرځېدلی او هڅه کوي د ماشومانو د روغتیا او خونديتوب حق د ټولو تر غوږونو ورسوي.
د کار پیل: له هیلو تر عمله
اورانوس حسیني په مینه او لېوالتیا د ژورنالیزم په ډګر کې قدم ایښی او له هماغه وخته یې یوه مهمه موخه د بدخشان خلکو ته په ساده او عام فهمه ژبه د روغتیايي او حیاتي مسایلو رسول وو.
هغه په دې برخه کې د خپلې انګیزې په اړه وايي: “له هغه وخت راهیسې چې ژورنالېزم مې پیل کړ، یوه له لویو هیلو مې دا وه چې د ټولنې روغتیایي ستونزې په ساده ژبه خلکو ته ورسوم، واکسین تل راته مهم و، ځکه ډېری ماشومان د خپلو والدینو د پوهې د ټیټې کچه له امله له دغه حق څخه محرومېدل.”
اورانوس له ډېر وخت راهیسې په خپل زیار د “حیاتي معلومات” په نوم یوه خپرونه تولیدوي او هره اوونۍ د یکشنبې، سهشنبې او پنجشنبې په ورځو د سهار په ۱۰ بجو له یوې سیمه ییزې راډیو خپرېږي.
دا خپرونه تر ډېره د ماشومانو پر واکسنیولو او پر اړوندو نورو روغتیايي مسایلو بحث او د اورېدونکو پوښتنو ځوابولو ته ځانګړې شوې ده.
هغه وايي: “د عامه پوهاوي په برخه کې راډیو تر ټولو اغېزناکه ده، په ټوله کې رسنۍ د زده کړې او پوهاوي تر ټولو ښې وسیلې دي او په ټولنه کې یې مثبت بدلونونه راوستلي دي.”
اورانوس حسیني هڅه کوي د خپلو راډیويي پروګرامونو له لارې خلکو ته د واکسینونو، په ځانګړې توګه د پولیو واکسین په اړه پوهاوی او معلومات ورکړي او کورنۍ وهڅوي چې خپل ماشومان واکسین کړي © له پولیو خلاص افغانستان/۱۴۰۳/ رقیبه حمیدي
په اورېدونکو اغېز
د اورانوس د خپرونو یوه د پام وړ لاستهراوړنه هغه ژور اغېز دی چې پر کورنیو، په ځانګړي ډول پر میندو یې درلودلی دی.
د مریم په نوم یوه ۳۰ کلنه مور چې د اورانوس د خپرونې همېشنۍ اورېدونکې ده، په دغه اړه خپله تجربه داسې بیانوي: “له دې مخکې چې د اورانوس پروګرامونه واورم، تل مې د واکسین په اړه شک درلود، خو کله چې مې په خپرونه کې د روغتیايي کارپوهانو خبرې واورېدې، اندېښنې مې لرې شوې؛ اوس پوهېدلې یمه چې واکسین د پولیو په ګډون له خطرناکو ناروغیو څخه د ماشومانو د ساتنې تر ټولو غوره لاره ده.”
۳۵ کلنه نرګس د دریو ماشومانو په لرلو یوه بله مور ده چې ورته تجربې لري، د دې یو ماشوم د واکسین نه کولو له امله په یوې جدي ناروغۍ اخته شوی و، خو د اورانوس د روغتیايي خپرونو له اورېدو وروسته یې د واکسین اهمیت وپېژاند او اوس خپل درې واړه ماشومان په منظم ډول واکسینوي.
نرګس د واکسین پر ارزښت ټینګار کوي او وايي: “له والدینو څخه زما غوښتنه دا ده چې له واکسین څخه انکار مه کوئ، دا زموږ د ماشومانو حق دی څو له پولیو او نورو ناوړه ناروغیو څخه سالم او خوندي و اوسي.”
پلوشه نادري، چې په بدخشان کې د پولیو واکسین کمپاین یوه فعاله واکسیناتوره ده، یادونه کوي چې رسنۍ د ماشومانو واکسینولو ته د کورنیو په هڅونه کې مهم رول لري.
هغې وویل: “رسنۍ د پراخ پوهاوي او کره معلوماتو په وړاندې کولو د کورنیو په هڅونه کې ډېر اغېز لري، د رسنیو له لارې د پوهاوي لوړول د دې لامل شوې چې خلک د پولیو واکسین په اهمیت ښه پوه شي او په پایله کې په واکسین کمپاینونو کې ډېره همکاري وکړي.”
بل خوا، په بدخشان کې یو روغتیايي متخصص ډاکتر اعظم محمدي هم د پولیو واکسین کمپاینونو او نورو روغتیایي مواردو په اړه د پوهاوي ډېرولو لپاره د رسنیو اغېز مهم ګڼي.
هغه وايي: “د اورانوس حسيني د خپرونې په څېر ورته نور رسنیز پروګرامونه د پولیو واکسین کمپاین د پوښښ کچې لوړولو تر څنګ په روغتیايي سیسټم د کورنیو د باور ډېرېدو لامل کېږي.”
پایله
د اورانوس حسيني هڅې ښيي چې رسنۍ څنګه کولای شي په ټولنه کې په ژور او دوامدار ډول مثبت اغېز وکړي.
د هغې روغتیايي پروګرامونه نه یوازې کورنیو ته د واکسین په اړه تازه او دقیق معلومات ورکوي، بلکې د روغتیایي سیستم پر وړاندې د عامه باور په پیاوړتیا کې هم مرسته کوي.
اورانوس حسيني په بدخشان کې د خپلو فعالیتونو له لارې د ډېرو ماشومانو ژوند ژغورلی او له همدې امله د نورو خبریالانو او ټولنیزو فعالانو لپاره یوه ښه بېلګه ګرځېدلې ده.
خو د پولیو د له منځه وړلو لپاره د بشپړ بریالیتوب په موخه باید دا مبارزه ملي مسئولیت وګرځي او د ټولنې هر وګړی په کې خپله برخه ادا کړي.
یوازې د خلکو په پراخه همکاري او د عامه پوهاوي په لوړولو کولای شو د پولیو په څېر ناروغۍ لهمنځه یوسو او د راتلونکو نسلونو روغتیا خوندي کړو.
رقیبه حمیدي، له پولیو خلاص افغانستان
