محمد زهير او له پوليو سره د مبارزې ماموریت
کابل، افغانستان (۳۰ لېندۍ ۱۴۰۳) – د کابل د میربچهکوټ ولسوالۍ اوسېدونکی ۳۴ کلن محمد زهیر د خپلې سیمې د ډېرو اوسېدونکو لپاره یو اشنا نوم دی. هغه چې په خپله د ژوند له بې شمېره ستونزو سره لاس او ګرېوان و نن په خپله سیمه کې د پولیو په وړاندې د مبارزې په اتل بدل شوی دی.
خو کوم څه هغه دې لارې ته راوست؟
مسوولیت ته مخامخېدل
محمد زهير په یوې ساده خو عاطفي کورنۍ کې لوی شوی دی. هغه چې د اقتصادي ستونزو له امله یې لوړې زده کړې و نه کړای شوې، له تنکۍ ځوانۍ پر خپلو اوږو د مسوولیت یو لوی بار احساساوه.
یوه ورځ په خپل کلي کې د واکسین کمپاین په لړ کې پوه شو چې د پولیو ناروغي څنګه د یوه ماشوم ژوند د تل لپاره اغېزمنولای شي. دا پوهاوی د هغه لپاره د خطر زنګ و چې ښايي بدلون راولي.
زهیر په هیلهمندو سترګو وویل: «کله چې پوه شوم د پولیو واکسین هر څاڅکی د یوه ماشوم ژوند ژغولای شي، پرېکړه مې وکړه چې خپل ژوند دغه کار ته ځانګړی کړم. ما نه غوښتل چې کوم ماشوم د ځینو کورنیو د ترخې ماضي په څېر په دې ناروغي اخته شي.»
بالاخره محمد زهير خپل کار د پولیو واکسین په کمپاینونو کې د یوه رضاکار په توګه پیل کړ؛ خو دا لار له ستونزو ډکه وه، ډېرو کورنیو د غلطو اوازو او ناسمو باورونو له امله د خپلو ماشومانو له واکسینولو انکار کاوه.
هغه د پولیو واکسین په یوه کمپاین کې له یوې مور سره مخامخ شو چې نه یې غوښتل ماشومان یې واکسین شي. دغه ښځه چې د ناسمو باورونو تر اغېز لاندې راغلې وه، ګومان یې کاوه چې د پولیو واکسین یې ماشومانو ته زیان رسوي. خو زهیر ناهیلی نه شو، په زغم او آرامۍ یې هغې ته د پولیو ناروغۍ د خطرونو او واکسین د ارزښت په اړه پوهاوی ورکړ، په پایله کې د ښځې نظر بدل شو او خپل ماشومان یې واکسین کړل.
زهیر په موسکا د دې تجربې یادونه کوي او وايي: «دا شېبه زما لپاره لویه بریا وه. پوه شوم چې پوهاوی څومره اغېزناک دی.»
د محمد زهیر پیغام واضح او هڅوونکی دی: «واکسین یوازینۍ وسیله ده چې کولای شو خپل ماشومان له پولیو ناروغۍ څخه خوندي کړو. راځئ یو ځای شو او دا لوی مسوولیت جدي ونیسو.» © له پولیو خلاص افغانستان /۱۴۰۳/ هوسۍ احمدزۍ
اتل کېدل
د زهیر بریا یوازې تر دې پېښې محدوده نه شوه، بلکې هغه وتوانېد له ۲۰۰ څخه زیاتو ورته کورنیو ته پوهاوی ورکړي او هغوی وهڅوي چې خپل ماشومان واکسین کړي.
هغه اوس یوازې یو واکسیناتور نه دی، بلکې د خپلې سیمې د امید او بدلون په یوه بېلګه بدل شوی دی.
نوموړی وايي: «د ماشومانو واکسینول زما لپاره یوه دنده نه، بلکې یوه انساني او اخلاقي وجیبه ده، هره ورځ چې کمپاین ته ځم، داسې احساسوم چې د راتلونکي نسل د ژغورلو لپاره ګام اخلم.»
هیله بخښونکی پیغام
محمد زهير باور لري چې د ګډو هڅو له لارې کولای شو د ماشومانو لپاره یو روښانه راتلونکی جوړ کړو.
د هغه پیغام واضح او هڅوونکی دی: «واکسین یوازینۍ وسیله ده چې کولای شو خپل ماشومان له پولیو ناروغۍ څخه خوندي کړو. راځئ یو ځای شو او دا لوی مسوولیت جدي ونیسو.»
د محمد زهير کیسه یوازې د یوه فرد کیسه نه ده؛ بلکې دا د ژمنتیا، سرښندنې او بدلون کیسه ده. هغه په خپلو هلو ځلو نه یوازې د ډېرو ماشومانو ژوند ژغورلی، بلکې خپل خلکو ته ښيي چې ان د لویو ستونزو او ننګونو پر وړاندې هم هیله او اراده میدان ګټلای شي.
هوسۍ احمدزۍ، له پولیو خلاص افغانستان
