فاریاب؛ د پولیو ناروغۍ پر وړاندې ګډې بریالۍ هڅې
فاریاب، افغانستان (۲۸ لړم ۱۴۰۳) – د پولیو واکسین کمپاین لومړۍ ورځ ده، د فاریاب ولایت د مرکز میمنې ښار په یوه څنډه کې ګڼ شمېر والدین د واکسین د تطبیق یوه ځای/محل ته ور ټول شوي څو خپل له پنځو کلونو د کم عمر ماشومانو ته د پولیو واکسین ورکړي.
د واکسین د تطبیق په دغه محل کې د شته رضاکارانو له منځه د یاسمین محمدي په نوم یوه واکسیناتوره چې تور حجاب یې اغوستی او سپین ټیکری یې پر سر دی، په ډېره مهربانۍ او مینه د هر ماشوم په خوله کې د پولیو واکسین دوه څاڅکي څڅوي.
د هغې موخه له پولیو فلجوونکې او وژونکې ناروغۍ څخه د ماشومانو ژغورل او خوندي کول دي.
نوموړې چې شاوخوا ۲۴ کاله عمر لري، له تېرو پنځو کلونو راهیسې په دې دنده بوخته ده او په دې موده کې یې زرګونه ماشومان د پولیو ناروغۍ پر وړاندې واکسین کړې دي.
هغه د خپل کار د پیل د لومړیو ورځو کیسه کوي او وايي: «په لومړیو کې هره ورځ د خپل مسوولیت په ساحه کې له دریو – څلورو داسې کورنیو سره مخ کېدم چې خپلو ماشومانو ته یې د پولیو واکسین له ورکولو ډډه کوله.»
دا زیاتوي، په اصل کې دا کورنۍ د ناسمو معلوماتو ښکار شوې وې چې ګواکې د پولیو واکسین یې د ماشومانو روغتیا ته زیان رسوي.
خو د دې په څېر د لسګونو رضاکارانو، ټولنیزو مبلغینو، روغتیایي کارکوونکو او دیني عالمانو په ګډو هڅو سره، دغه ذهنیتونه ورو ورو بدل شول.
د یاسمین په خبره، اوس په خپله سیمه کې داسې کورنۍ نه ویني چې خپلو ماشومانو ته د پولیو واکسین له ورکولو انکار وکړي.
هغې وویل: «موږ پرلهپسې هڅې وکړې، خلکو ته مو د پولیو ناروغۍ د خطرونو په اړه معلومات ورسول او هغوی مو وپوهول چې ماشومانو ته د پولیو واکسین نه ورکول په خپل لاس د هغوی تباه کول دي، اوس خلک له موږ سره په بشپړ ډول همکاري کوي او همدا چاره د دې لامل شوې ده چې په دغه ولایت کې د پولیو واکسین کمپاینونه په بریالیتوب پلي شي.»
یاسمین غواړي هر ماشوم واکسین شي څو افغانستان له دې ناروغۍ څخه خلاص شي.
د واکسین د تطبیق په یوه محل کې د شته رضاکارانو له منځه د یاسمین محمدي په نوم یوه واکسیناتوره چې تور حجاب یې اغوستی او سپین ټیکری یې پر سر دی، په ډېره مهربانۍ او مینه د هر ماشوم په خوله کې د پولیو واکسین دوه څاڅکي څڅوي. © له پولیو خلاص افغانستان/ ۱۴۰۳/ عبدالصبور سیرت
په خپله خلک هم د یاسمین محمدي او نورو رضاکارانو هڅې ستایي چې دوی ته یې د پولیو ناروغۍ د خطرونو او واکسین د ارزښت په اړه پوهاوی ورکړی دی.
د میمنې ښار د عربخانې سیمې اوسېدونکې صبغت الله چې د دوو ماشومانو پلار هم دی، وايي: «یاسمین محمدي او نور رضاکاران زموږ د سیمې رښتینې اتلان دي، هغوی د پولیو واکسین د ارزښت په اړه زموږ پوهاوی ډېر کړی او موږ اوس پوهېدلي یوو چې د ماشومانو روغتیا زموږ په لاس کې ده.»
دی زیاتوي، اوس ټول خلک خپل ماشومان په منظم ډول واکسینوي او دا چاره د دې لامل شوې چې رضاکاران په ښه توګه د هغوی تر ماشومانو د پولیو واکسین ورسوي.
د زهرا په نوم د میمنې ښار یوه اوسېدونکې هم وايي چې رضاکاران په هر ډول حالاتو کې تر ماشومانو واکسین رسوي او هغوی د پولیو له ناروغۍ څخه خوندي کوي.
دې وویل: «که د پولیو واکسین کمپاینونو رضاکاران نه وای، نو موږ به تر اوسه په دغه غلط فکر کې پاتې وای چې واکسین زموږ د ماشومانو روغتیا ته زیان رسوي، په اصل کې رضاکارانو په ټولنه کې ډېر لوی بدلون راوستلی دی.»
د فاریاب ولایت د عامې روغتیا ریاست د کتلوي معافیت عمومي مدیر ډاکټر فیروز فیاض د پولیو پر وړاندې د مبارزې په برخه کې د رضاکارانو او خلکو هڅې ستايي.
د هغه په خبره، په ۲۰۱۵ زېږدیز کال کې د دغه ولایت د قیصار ولسوالۍ په زعفران کلي کې د پولیو وروستۍ مثبته پېښه ثبت شوې، خو له هغه وروسته په فاریاب کې هېڅ نوې پېښه نه ده ثبت شوې.
هغه وایي: “موږ تل هڅه کړې چې د پولیو واکسین کمپاینونه د دغه ولایت په لرې او نږدې سیمو کې په ښه توګه ترسره شي.»
هغه یادونه وکړه چې په دغه ولایت کې د پولیو واکسین په هر کمپاین کې د ۱۰۹۷ ټیمونو له لوري ۴۳۰ زره له پنځو کلونو د کم عمر ماشومانو ته واکسین رسول کېږي.
فیاض زیاتوي چې د واکسیناتورانو د هڅو ترڅنګ، د ادارو ترمنځ همغږي هم مهم رول لوبولی دی. «ټولې ادارې په ګډه هڅه کوي چې هېڅ ماشوم له واکسین څخه بېبرخې پاتې نه شي.”
د فاریاب ولایت د خلکو د هڅو او رضاکارانو د بېساري زحمتونو په پایله کې د پولیو واکسین کمپاین په بریالیتوب پلي کېږي. دغه پرمختګ نه یوازې د واکسین د خپراوي، بلکې د ټولنې په کچه د روغتیا د پوهاوي او مثبت بدلون نښه ده.
که دا همکاري او ملاتړ همداسې روان پاتې شي، نو فاریاب کولای شي د هغو ولایتونو په کتار کې راشي چې د پولیو ناروغي په کې له منځه وړل شوې ده.
عبدالصبور سیرت، له پولیو خلاص افغانستان
