په هلمند کې د پولیو د مخنیوي لپاره د سیمهییزو رسنیو اغېزناکې هڅې
هلمند، افغانستان (۲۲ تله ۱۴۰۳) – په هلمند کې سیمهییزې رسنۍ د پولیو واکسین کمپاینونو تر شا یو پیاوړی ځواک ګڼل کېږي، چې د عامه پوهاوي لوړولو له لارې د خلکو ذهنیت بدلوي او هغوی د واکسین ارزښت ته متوجه کوي.
دغه رسنۍ د اعلاناتو، ځانګړو خپرونو او روغتیايي کارپوهانو د مرکو پر مټ د دغه ولایت تر ډېرو وګړو رښتیني او کره معلومات رسوي څو د هغوی ماشومان د پولیو له خطرناکې ناروغۍ څخه خوندي شي.
«لښکرګاه راډیو» د هلمند د هغو پنځو خصوصي رسنیو له جملې څخه ده چې د خپل پراخ پوښښ او ځانګړو خپرونو له لارې په ښاري او کلیوالي سیمو کې د پولیو واکسین د ګټو په اړه پوهاوی ډېروي او د خلکو تر منځ د ناسمو باورونو او اوازو مخنیوي کوي.
د دغې راډیو مسوول حاجي عبدالستار عطايي وايي، د دغه ولایت سیمه ییزو رسنیو د پولیو واکسین اړوند د عامه پوهاوي په لوړولو او د خلکو د اندېښنو په لېرې کولو کې اغېزناک رول لوبولی دی.
هغه زیاته کړه، د رسنیو د فعالې ونډې له کبله اوس د پولیو واکسین کمپاینونو په تطبیقولو کې مثبت بدلون راغلی او د خلکو همکاري ډېره شوې ده.
د ده په خبره، د پخوا په پرتله اوس په هلمند کې تر ډېره د واکسین نه کولو ستونزه حل شوې او تر ۹۰ سلنې وګړي پوهېدلي چې باید خپل ماشومان واکسین کړي او په دې توګه د پولیو ناروغۍ مخنیوي ته دوام ورکړي.
دی وايي: «موږ د پولیو واکسین کمپاینونو په اړه د اعلاناتو تر څنګ، په اوونۍ کې درې روغتیايي خپرونې لرو چې روغتیايي کارپوهان او ډاکټران په کې مېلمانه کوو، خلک دغو خپرونو ته زنګ وهي او د پولیو واکسین او نورو روغتیايي موضوعاتو په اړه پوښتنې کوي.»
همدارنګه په هلمند کې د «سکون» په نوم یوه بله سیمه ییزه راډیو هم فعاله ده چې د نورو ټولنیزو خپرونو تر څنګ د پوهاوي ډېرولو په موخه روغتیايي خپرونې هم وړاندې کوي.
د دغې راډیو مسوول حافظ احمد نصرت وايي، په دغه ولایت کې د راډیوګانو له لارې د پولیو واکسین په اړه پوهاوی ډېر شوی او ډېر خلک په دې پوهېدلي چې واکسین د دوی د ماشومانو د ژوند ساتنې لپاره اړین دی.
د «لښکرګاه راډیو» مسوول حاجي عبدالستار عطايي وايي، د دغه ولایت سیمه ییزو رسنیو د پولیو واکسین اړوند د عامه پوهاوي په لوړولو او د خلکو د اندېښنو په لېرې کولو کې اغېزناک رول لوبولی دی © له پولیو خلاص افغانستان/ ۱۴۰۳/ سعید زابلی
هغه زیاته کړه: «موږ د هغه رسالت او مسوولیت له مخې چې د ټولنې په وړاندې یې لرو، هڅه کوو ځانګړي روغتیايي پروګرامونه وړاندې کړو، موږ دغو پروګرامونو ته روغتیايي متخصصین رابولو څو خلکو ته د پولیو واکسین په اړه تفصیلي معلومات وړاندې کړي؛ دا پروګرامونه نه یوازې د خلکو پوهاوی زیاتوي، بلکې هغه شکونه او پوښتنې هم ځوابوي چې په کلیوالو سیمو کې د پولیو واکسین کمپاینونو پر وړاندې مهمې ننګونې بلل کېږي.»
نصرت په دې برخه کې د ملګرو ملتونو د ماشومانو وجهي صندوق/ یونیسف څخه مننه کوي چې د یادو شوو روغتیايي خپرونو په جوړولو او وړاندې کولو کې یې د دوی او نورو سیمه ییزو رسینو مالي ملاتړ کړی دی.
نوموړي وویل: «د یونیسف په مرسته موږ توانیدلي یو چې خلکو ته د پولیو واکسین په اړه معلومات په سمه او اغېزناکه بڼه ورسوو، په ځانګړې توګه د کلیوالي او لیرې سیمو هغو اوسېدونکو ته چې مخکې د واکسین په ګټو نه پوهېدل.»
د هلمند قومي مشران هم وايي چې د دغه ولایت سیمه ییزې رسنۍ د پولیو ضد واکسین د تطبیق په برخه کې مهم رول لوبوي.
د ګرمسېر ولسوالۍ یوه قومي مشر حاجي دوست محمد وویل: «زما یوه خور او د اکا زوی کلونه مخکې د پولیو ناروغۍ له امله معلول شوي چې لامل یې د پوهاوي نشتوالی و، که موږ هغه مهال د واکسین په ګټو پوهېدلای نو هغوی به مو واکسین کړي وای او اوس به روغ وای.»
دی زیاتوي، هغه مهال په دغه ولایت کې سیمه ییزې رسنۍ نه وې چې خلکو ته یې پوهاوی ورکړی وای خو اوس چې شته نو له لارې یې ډېر خلک د واکسین په ګټو خبر شوي دي.
هغه د بېلګې په توګه د خپلې ولسوالۍ یادونه وکړه چې اوس په کې داسې څوک نشته چې د خپلو ماشومانو له واکسینولو ډډه وکړي.
د پولیو واکسین کمپاین رضاکاران هم په دې باور دي چې سیمه ییزو رسنیو له دوی سره د خلکو د همکارۍ او ملاتړ په خپلولو کې مهم رول لوبولی دی.
د محب الله په نوم یو رضاکار وايي: «کله چې موږ د پولیو واکسین کمپاینونو پر مهال کلیو ته ځو، خلک راته وایي چې د رسنیو له لارې د پولیو واکسین په اهمیت خبر شوي دي، رسنیو د خلکو شکونه او اندېښنې له منځه وړې دي او له همدې کبله ټول خلک اوس په کمپاینونو کې له موږ سره همکاري کوي.»
دی زیاتوي، د پخوا په پرتله اوس خلک په پراخه کچه پوهېدلي چې د پولیو واکسین د دوی د ماشومانو لپاره مهم دی او په ډېره لېوالتیا یې واکسینوي.
د سیمهییزو رسنیو هڅې په هلمند کې د پولیو د مخنیوي په برخه کې یو له لویو بریاوو څخه بلل کېږي. د رسنیو په مرسته، هغه اندیښنې چې پخوا د واکسین په اړه موجودې وې، اوس تر ډېره لېرې شوې او د خلکو د عامه پوهاوي کچه لوړه شوې ده.
سعید زابلی، له پولیو خلاص افغانستان
