د روغتیا سفیرانې: هغوی چې د ماشومانو راتلونکی خوندي کوي
بلخ، افغانستان (۲۲ تله ۱۴۰۳) – د بلخ په مرکز مزارشریف ښار کې د پولیو واکسین کمپاینونو دوې رضاکارانې انیسه او سعدیه هره ورځ په دې هیله له خپلو کورونو وځي څو ماشومان د پولیو له خطرناکې ناروغۍ څخه خوندي کړي.
خو د دوی کار یوازې د واکسین ورکول نه دي، بلکې د کورنیو تر منځ د پولیو واکسین په اړه د ناسمو باورونو د له منځه وړلو هڅې هم کوي.
انیسه چې له تېرو څو کلونو راهیسې د پولیو واکسین په کمپاینونو کې د سوپروایزرې په توګه کار کوي، زرګونو ماشومانو ته د واکسین رسولو تر څنګ یې لسګونه هغه کورنۍ هم د خپلو ماشومانو واکسینولو ته هڅولې چې مخکې یې نه واکسینول.
دا وايي: «د پولیو واکسین کمپاین د یوې کارکوونکې په توګه مې یوازې ماشومانو ته د واکسین په رسولو بسنه نه ده کړې، بلکې تل مې هڅه کړې چې په ټولنه کې د پولیو واکسین د ارزښت په اړه پوهاوی ډېر کړم او انکاري کورنیو ته قناعت ورکړم څو خپل ماشومان واکسین کړي.»
هغه خپلو تجربو ته په پام زیاتوي چې له انکاري کورنیو سره د پولیو واکسین په اړه خبرې او هغوی ته قناعت ورکول اسانه چاره نه ده، بلکې ځانګړی مهارت او ډېره حوصله غواړي.
دې وویل: «کله چې موږ له داسې کورنیو سره مخ کېږو چې د خپلو ماشومانو له واکسینولو انکار کوي، نو هڅه کوو د هغوی د انکار اصلي لامل پیدا کړو، زموږ کار دا دی چې په نرمۍ د هغوی خبرې واورو او په ډېر مهارت هغوی ته د واکسین د ګټو په اړه کره معلومات ورکړو.»
د بلخ په مرکز مزارشریف ښار کې د پولیو واکسین کمپاینونو دوې رضاکارانې انیسه او سعدیه هره ورځ په دې هیله له خپلو کورونو وځي څو ماشومان د پولیو له خطرناکې ناروغۍ څخه خوندي کړي © له پولیو خلاص افغانستان/ ۱۴۰۳/ عبدالصبور سیرت
انیسه همدارنګه یادونه کوي چې ځینې کورنۍ د دیني او فرهنګي باورونو له مخې خپلو ماشومانو ته د پولیو واکسین نه ورکوي چې په داسې حالت کې بیا له سیمه ییزو دیني عالمانو مرسته غواړي څو کورنۍ قانع کړي چې د پولیو وکسین د اسلام له نظره نه یوازې دا چې کوم مشکل نه لري، بلکې د ماشومانو د خوندیتوب لپاره مهم دی.
د انیسې تر څنګ سعدیه بل هغه زیارکښه رضاکاره ده چې له پولیو ناروغۍ څخه د ماشومانو د خوندیتوب په برخه کې یې ډېرې هڅې کړې دي.
دا وايي، که څه هم د خپل کار پر مهال د کورنیو له لوري له ناسم چلند سره مخ شوې او آن کله نا کله سخت الفاظ ورته کارول شوي خو بیا یې هم حوصله له لاسه نه ده ورکړې، ځکه د دې هدف د ماشومانو خوندي کول دي.
هغه زیاتوي: «ما ته د ماشومانو روغتیا تر ټولو مهمه ده، کله چې زه ماشومان واکسینوم نو داسې احساسوم چې د هغوی د ښې راتلونکې لپاره یو لوی ګام اخلم.»
د دې تر څنګ دا یادونه کوي چې کورنیو ته د پولیو ناروغۍ د زیانونو او د واکسن د ګټو په اړه پوهاوی هم ورکوي څو په دې اړه یې معلومات لا ډېر شي.
هغې وویل: «زه له هرې کورنۍ سره داسې چلند کوم لکه هغوی چې زما خپلوان وي، زه هغوی ته وایم چې واکسین ستاسې د ماشومانو د راتلونکي لپاره ډېر مهم دی، هر وخت چې یو پلار یا مور قانع کېږي او خپل ماشوم ته واکسین ورکوي نو دا زما لپاره د خوښۍ شېبه وي، زما هیله دا ده چې د هېواد ټول ماشومانو له دې خطرناکې ناروغۍ څخه وژغورل شي.
د مزار شریف ښار اوسېدونکی نور محمد اسحقزی، چې مخکې د پولیو واکسین مخالف و، اوس د پولیو واکسین یو له پیاوړو ملاتړو څخه دی.
هغه وايي: «ما په پیل کې فکر کاوه چې واکسین زموږ ماشومانو ته زیان رسوي او زموږ له دین سره په ټکر کې دی، خو وروسته له هغه چې انیسې او سعدیې د واکسین د ارزښت په اړه کره معلومات راکړل نو پوه شوم چې دا د پولیو له خطرناکې ناروغۍ څخه د ماشومانو د خوندیتوب یوازینۍ وسیله ده.»
د پولیو واکسین کمپاین رضاکاران، لکه انیسه او سعدیه، د ټولنې په روغتیا ساتنه کې بنسټیز رول لوبوي. د دوی مینه، زغم، او ژمنتیا یوازې د واکسین تر تطبیق پورې نه محدودېږي، بلکې د هېواد د ماشومانو لپاره د امید څراغ بلوي؛ هر واکسین شوی ماشوم د یوې بریا نښه ده او هر قانع شوی پلار د یوه روښانه راتلونکي لپاره یو ګام دی.
عبدالصبور سیرت، له پولیو خلاص افغانستان
