د پولیو پر وړاندې مبارزه؛ د احمدشاه د هڅو او ژمنتیا کیسه
کابل، افغانستان (۱۹ لړم ۱۴۰۳) – د کابل په دهسبز ولسوالۍ کې یو ځوان هره ورځ له پولیو ناروغۍ څخه د ماشومانو د خوندیتوب هڅې کوي. احمد شاه چې په اصل کې د کابل د قرهباغ ولسوالۍ اوسېدونکی دی، اوس د ده سبز ولسوالۍ په کټهخېلو سیمه کې ژوند کوي او له تېرو څو کلونو راهیسې د پولیو واکسین کمپاینونو برخه دی.
هغه د یوه ژمن رضاکار په توګه د پولیو واکسین په هر کمپاین کې د ورځې ۲۰ کیلومتره پلی مزل کوي څو ماشومانو ته د پولیو واکسین ورسوي.
هڅې او ژمنتیا
د دهسبز ولسوالۍ، په ځانګړې توګه د خاص دهسبز کلي چې له پلچرخي سیمې څخه شاوخوا ۲۰ کیلومتره واټن لري، د خامو لارو او سختو چاپېریالي شرایطو له امله شهرت لري. د ژمي په موسم کې د باران او واورې ورښت دا لارې نورې هم ستونزمنې کوي. په دغه ډول شرایطو کې احمدشاه د سیمې ماشومانو ته واکسین رسوي او د پولیو ناروغۍ د خطر په اړه د خلکو پوهاوی زیاتوي.
نوموړي څو کاله مخکې د سیمې په یوه روغتیايي مرکز کې د واکسیناتور په توګه دنده پیل کړه، خو ژر یې درک کړه چې یوازې واکسین ورکول کافي نه دي؛ بلکې د خلکو د ذهنونو بدلول او د پولیو ناروغۍ د خطرونو په اړه عامه پوهاوی هم اړین دی.
په همدې بنسټ نوموړي له څه مودې وروسته د پولیو واکسین په کمپاینونو کې د رضاکار په توګه دنده پیل کړه.
هغه وایي: «کليو ته غځېدلې لارې ستونزمنې دي، خو زه پوهېږم زما هڅې د دې ارزښت لري چې دا کړاو وزغمل شي، ځکه که تر ماشومانو پورې واکسین په منظم ډول و نه رسول شي نو د پولیو ناروغي به خپره شي.»
د باور ترلاسه کول
د واکسین پر وړاندې د خلکو شکونه او کله کله د ناسمو معلوماتو او اوازو خپرېدل د احمدشاه د کار پر وړاندې لوی خنډ دی.
هغه وایي: «ځینې خلک فکر کوي چې د پولیو واکسین ماشومانو ته د ګټې پر ځای تاوان رسوي، په اصل کې هغوی د اوازو او ناسمو معلوماتو تر اغېز لاندې راغلي وي خو زه هڅه کوم دوی ته د پولیو ناروغۍ د خطرونو او د واکسین د ګټو په اړه رښتیني معلومات ورکړم او هغوی وهڅوم چې خپل ماشومان د واکسین په وسیله له دې ناعلاجه ناروغۍ څخه خوندي کړي.»
د ده په خبره، د خلکو باور خپلول او تر هغوی پورې کره معلومات رسول له پولیو ناروغۍ سره د مبارزې مهمه برخه جوړوي.
احمدشاه چې لا هم د ماشومانو واکسینولو او کورنیو ته د پولیو ناروغۍ د خطرونو او د مخنیوي لارو چارو په اړه د پوهاوي خپرولو کار ته دوام ورکوي، وايي: «دا یوازې دنده نه، بلکې یوه ملي او دیني وجیبه ده.» © له پولیو خلاص افغانستان/ ۱۴۰۳/ هوسۍ احمدزۍ
اغېزې او مثبت بدلون
د احمدشاه د هڅو په پایله کې ډېرو کورنیو د پولیو واکسین ارزښت درک کړی او اوس په مسوولانه ډول په هر کمپاین کې خپل ماشومان واکسینوي.
د ده سبز ولسوالۍ اوسېدونکی عبدالرحمن چې د دریو ماشومانو پلار دی، وايي: «احمدشاه د یوه خواخوږي انسان په توګه نه یوازې زموږ ماشومان واکسینوي، بلکې موږ ته د پولیو ناروغۍ د خطرونو، د پولیو واکسین د ارزښت او د دې ناروغۍ د مخنیوي د نورو لارو چارو په اړه پوهه هم راکوي.»
دی زیاتوي، د هغه او د پولیو واکسین کمپاینونو د نورو رضاکارانو هڅې د ډېرې ستاینې وړ دي، که خلک له دوی سره همکاري وکړي نو یو ماشوم به هم د پولیو په فلجوونکې او وژونکې ناروغۍ اخته نه شي.
ملي او دیني وجیبه
احمدشاه چې لا هم د ماشومانو واکسینولو او کورنیو ته د پولیو ناروغۍ د خطرونو او د مخنیوي لارو چارو په اړه د پوهاوي خپرولو کار ته دوام ورکوي، وايي: «دا یوازې دنده نه، بلکې یوه ملي او دیني وجیبه ده.»
دی وايي، خوښ دی چې د ده او د ده نورو رضاکارو ملګرو هڅې له مثبتو بدلونونو سره ملې دي او د پخوا په پرتله ډېرو خلکو د واکسین ارزښت درک کړی او په منظم ډول خپل ماشومان واکسینوي.
دی وايي، د یوې داسې خطرناکې ناروغۍ – چې درملنه نه لري او د ماشومانو د تلپاتي فلج لامل کېږي – د مخنیوي یوازینۍ وسیله واکسین دی.
هغه زیاتوي: «موږ باید ټول په ګډه کار وکړو څو دا خطرناکه ناروغي له منځه یوسو، هر ماشوم چې د ګوزڼ له خطر څخه وژغورل شي، د ټولې ټولنې لپاره یوه بریا ده.»
د احمدشاه کیسه د دې څرګندونه کوي چې د هر ډول خنډونو سربېره د ژمنتیا او ګډو هڅو په وسیله کولای شو د ماشومانو روغتیا او د ټولنې ښه راتلونکی تضمین کړو.
احمدشاه او د هغه د ملګرو هڅې د دې ښکارندويي کوي چې د پولیو په څېر ستونزې یوازې د یووالي، پوهاوي، او عمل له لارې له منځه وړل کېدای شي.
هوسۍ احمدزۍ، له پولیو خلاص افغانستان
