د ټلیفوني اړیکو مرکز فعالول؛ د پولیو له منځه وړلو پروګرام د غوره مدیریت لپاره اغېزناک ګام
کابل، افغانستان (۳۰ وږی ۱۴۰۲): د پولیو له منځه وړلو ملي بېړني عملیاتي مرکز کې د «ټلیفوني اړیکو مرکز» پرانیستل شو چې موخه یې د پولیو پروګرام غوره مدیریت، د واکسیناسیون په اړه د ټولنې د پوهاوي کچې لوړول او د وګړو د نظرونو او غوښتنو اورېدل دي.
د یاد شوي مرکز د پرانیستلو په مراسمو کې د عامې روغتیا وزیر ډاکټر قلند عباد، د پولیو له منځه وړلو ملي بېړني عملیاتي مرکز رییس ډاکټر نیک ولي شاه مؤمن او یو شمېر نورو مسوولینو ګډون کړی وو.
د عامې روغتیا وزیر ډاکټر قلندر عباد وویل، د پولیو له منځه وړلو ملي بېړني عملیاتي مرکز کې د ټلیفوني اړیکو څانګه فعالول د اړوند وزارت لپاره مهمه لاسته راوړنه ده.
هغه د ملګرو ملتونو د ماشومانو له ملاتړ ادارې/ UNICEF مننه وکړه چې د یاد شوي مرکز په جوړولو کې یې مالي او تخنیکي مرسته کړې ده.
نوموړي زیاته کړه، دغه مرکز دوه طرفه ارتباطي چینل دی چې نه یوازې د پولیو واکسیناسیون په اړه به د خلکو اړیکو ته ځواب وايي، بلکې د ټولنې له هدف وړ وګړو سره به اړیکې نیسي او هغوی ته به د معافیت ورکوونکو فعالیتونو په اړه معلومات ورکوي څو په دې توګه کورنۍ وهڅول شي خپل ماشومان د پولیو او د ماشومتوب دورې نورو ناروغیو پر وړاندې واکسین کړي.
ده وویل: «د عامې روغتیا وزارت ژمن دی چې د پولیو وژونکې او فلجوونکې ناروغي په افغانستان کې په بشپړه توګه له منځه یوسي.»
د پولیو له منځه وړلو ملي بېړني عملیاتي مرکز رییس ډاکټر نیک ولي شاه مؤمن وویل، خوښ دی چې د پولیو له منځه وړلو پروګرام لپاره د ټلیفوني اړیکو عصري او مجهز مرکز پرانیزي.
هغه زیاته کړه، د یاد شوي مرکز فعالول د پولیو له منځه وړلو پروګرام د مدیریت بنسټیزه برخه ده او هېوادوالو ته زمینه برابروي چې د ۱۴۱ وړیا شمېرې له لارې اړیکې ونیسي او د واکسیناسیون په اړه خپلې پوښتنې، اندېښنې او سپارښتنې شریکې کړي.
ده وویل: «دغه مرکز د دوه اړخیزو اړیکو لپاره فعال شوی چې په مټ یې کولای شو له عامو خلکو سره اړیکې ونیسو، د هغوی د پوهاوي کچه لوړه کړو او د پولیو پروګرام په اړه لازم معلومات ورکړو.»
د یادونې ده چې د پولیو له منځه وړلو ملي بېړني عملیاتي مرکز اړوند د «ټلیفوني اړیکو مرکز» د یونیسف ادارې په تخنیکي او مالي ملاتړ د پولیو له منځه وړلو پروګرام په تړاو د خلکو د پوښتنو او شکایتونو ځوابولو لپاره فعال شوی دی.
د دغه مرکز بنسټیزه موخه دا ده څو په ټولنه کې د واکسینونو منلو کچه لوړه شي او په دې تړاو خلکو ته د اغېزناکو ټلیفوني خبرو، لیکلو او غږیزو پېغامونو له لارې لازم او کره معلومات وړاندې شي؛ دغه راز یاد شوی مرکز به د پولیو پروګرام د نظارت او سروې چارې هم ترسره کوي.
