د پولیو/ ګوزڼ ناروغۍ په مخنیوي کې د رسنیو رول په اړه دوه ورځنی روزنیز پروګرام جوړ شو
بلخ، افغانستان (۵ وږی ۱۴۰۲): د هېواد په شمال زون کې د پولیو/ ګوزڼ ناروغۍ د اوسني وضعیت او د دې ناروغۍ په مخنیوي کې د رسنیو د رول په اړه دوه ورځنی روزنیز پروګرام جوړ شو.
دغه ټرېننګ چې د ملګرو ملتونو د ماشومانو د ملاتړ صندوق/ UNICEF اړوند د پولیو له منځه وړلو پروګرام له لوري د روان ۱۴۰۲ لمریز کال د وږي میاشتې په ۴مه او ۵مه د بلخ په مرکز مزار شریف کې جوړ شوی و، د دغه ولایت تر څنګ په کې د جوزجان، سرپل، سمنګان او فاریاب شاوخوا ۹۰ تنو نارینه او ښځینه خبریالانو، د اطلاعاتو او فرهنګ رییسانو او د روغتیا برخې استازو ګډون کړی وو.
د ملګرو ملتونو د ماشومانو د ملاتړ صندوق د پولیو له منځه وړلو پروګرام د اړیکو مسوول کمال شاه سید وايي، د روزنیز پروګرام په لومړۍ ورځ خبریالانو ته په هېواد او په ځانګړي ډول شمال زون کې د پولیو/ ګوزڼ ناروغۍ د اوسني وضعیت په اړه معلومات ورکړل شول او د دې ناروغۍ په مخنیوي کې د رسنیو پر رول خبرې وشوې.
هغه زیاته کړه، د دې تر څنګ د دغه روزنیز پروګرام ګډونوالو ته د بېلابېلو پریزینټېشنونو له لارې د پولیو ناروغۍ په اړه تخنیکي معلومات هم ورکړل شول څو هغوی پوه شي چې د دغې خطرناکې ناروغۍ ویروس څنګه خپرېږي او د مخنیوي په برخه کې یې د واکسین تر څنګ نورې کومې لارې چارې اغېزناکې ثابتېدای شي.
سید وویل، د دغه روزنیز پروګرام په دویمه ورځ له خبریالانو سره د غوره خبر او راپور لیکنې په برخه کې ګډ کار وشو څو د پولیو واکسین په تړاو د ناسمو باورونو، اوازو او شایعاتو مخنیوی وشي او د رسنیو له لارې تر خلکو کره او دقیق معلومات او اطلاعات ورسېږي.
ګډونوالو یاد شوی دوه ورځنی ټرېننګ ګټور وباله او ټینګار یې وکړ چې دغه راز روزنیز پروګرامونه دې ډېر شي.
په بلخ کې د کلید راډیو خبریال احمدالله وايي: «دغه دوه ورځنی روزنیز ورکشاپ ډېر مهم و، ما او زما همکارانو د پولیو ناروغۍ په اړه ډېر نوي څه زده کړل، زما غوښتنه دا ده چې د خبریالانو او د رسنیو د استازو لپاره دې ورته نور پروګرامونه هم جوړ شي.»
له فاریاب ولایت څخه راغلې د بانو راډیو خبریالې هادیې ابراهیمي وویل: «لومړی ځل دی چې په دغسې یوه روزنیز پروګرام کې ګډون کوم، د یوې خبریالې په توګه دا زما دنده ده چې د خبرونو او راپورونو په وسیله خلکو ته د پولیو ناروغۍ په اړه پوهاوی ورکړم څو د هېواد ماشومان له دې خطرناکې ناروغۍ وژغورل شي.»
د هېواد په شمال زون کې دغه روزنیز پروګرام په داسې حال کې جوړ شوی و چې ټاکل شوې ده سبا د دغه زون په بلخ، جوزجان، سرپل، سمنګان او فاریاب کې د پولیو واکسین څلور ورځنی کمپایل پیل شي چې په ترڅ کې به یې نږدې ۱.۵ میلیونه د پنځو کلونو د کم عمر ماشومان واکسین شي.
د یادونې ده چې تېره اوونۍ هم د هېواد په بېلابېلو سیمو کې د پولیو واکسین سرتاسري کمپاین ترسره شو چې په ترڅ کې یې څه باندې ۱۱ میلیونه ماشومان واکسین شول.
