سویرا خسروي؛ هغه نجلۍ چې د واکسیناسیون له لارې د ډاکټر کېدو هیله ژوندۍ ساتي
تخار، افغانستان (۲ لېندۍ ۱۴۰۳) – د تخار ولایت د ورسج ولسوالۍ د یخو او پېچلو غرونو په منځ کې چې په ناهموارو لمنو کې یې کورونه ودان شوي، روغتیايي خدماتو لاسرسی ستونزمن او ژوند له سختیو او ننګونو ډک دی.
په دې منځ کې کم شمېر ځوانان پیدا کېږي چې له خنډونو سربېره ټولنې ته د خدمت لار وباسي.
د پولیو واکسین کمپاینونو رضاکاره ۲۳ کلنه سویرا خسروي د دغه ډول پیاوړو او زیارکښو انسانانو له ډلې څخه ده.
هغه چې په تالقان ښار کې په خپل کار بوخته ده، هره ورځ په لوړه اراده ماشومان واکسینوي؛ هغه باور لري چې هر ماشوم ته د پولیو واکسین هر ورکول کېدونکی څاڅکی د ټولنې د خوندي راتلونکي پر لور یو ګام دی.
د سویرا ستونزمن سفر
سویرا خپلې زده کړې د “بیبی عایشه صدیقه” په ښوونځي کې بشپړې کړې دي، خو د کورنۍ د ناسم اقتصادي وضعیت له امله یې لوړې زدهکړې و نه کړای شوې.
هغې هیله لرله چې ډاکټره شي او خپلو خلکو ته خدمت وکړي، خو کله چې دا هیله حقیقت ته نږدې نه شوه، نو پرېکړه یې وکړه چې د پولیو واکسین له کمپاینونو سره ملګرې شي.
سویرا وايي: “هر ماشوم چې واکسینوم، د ډاکټرې کېدو هیلې ته مې نژدې کوي.”
هغې په تېر یونیم کال کې د هر کمپاین پر مهال د ورځې له ۵۰ تر ۷۰ ماشومان واکسین کړي دي. د هغې د کار ساحه تر ډېره په تالقان ښار ده، چېرې چې د ځینو کورنیو د پوهې د ټیټې کچې او ناسمو باورونو له امله د پولیو واکسین کمپاینونه له خنډونو سره مخ وي.
سویرا چې په تالقان ښار کې په خپل کار بوخته ده، هره ورځ په لوړه اراده ماشومان واکسینوي؛ هغه باور لري چې هر ماشوم ته د پولیو واکسین هر ورکول کېدونکی څاڅکی د ټولنې د خوندي راتلونکي پر لور یو ګام دی. © له پولیو خلاص افغانستان/۱۴۰۳/ رقیبه حمیدي
د ناسمو باورونو پر وړاندې مبارزه
یوه خاطره چې له سویرا نه هېرېږي، د یوې لرې سیمې له یوې مور سره لیدنه ده.
دغې مور د ناسمو باورونو او اوازو تر اغېز لاندې د خپلو ماشومانو له واکسینولو ډډه کوله.
خو سویرا د هغې ترڅنګ په مهربانۍ کښېناسته او په ساده ژبه یې حقیقت ورته تشریح کړ: “ما په صبر او حوصله ورته تشریح کړه چې واکسین څنګه کولای شي ماشومان له پولیو ناروغۍ څخه وژغوري؛ له هغې سره مې خپلې تجربې شریکې کړې او علمي مالومات مې په ساده ژبه ورته وړاندې کړل څو شک او اندېښنې یې لرې شي.”
د سویرا له خبرو وروسته هغه مور قانع شوه او خپل ماشومان یې واکسین کړل.
اوس چې کله سویرا هغې سیمې ته ځي، نو هغه مور یې په تودې موسکا هرکلی کوي.
سویرا په دې لار کې د ناسمو باورونو او د ښځو د کار پر وړاندې د مخالفت په ګډون له ګڼو ستونزو سره مخ شوې ده خو خپل لوری یې نه دی بدل کړی بلکې د خپلې کورنۍ په ملاتړ یې خپلو هڅو ته دوام ورکړی دی.
“ځینې کورنۍ اوس هم ما ته د شک په نظر ګوري، خو دغه څه هېڅکله زما د کار مخه نه ده نیولې.”
سویرا خسروي په زړورتیا سره نه یوازې د تخار د ماشومانو د روغتیا لپاره هڅې کوي، بلکې به زړه کې یوه ستره هیله هم ژوندۍ ساتي: د یو سالم، باخبره او له پولیو څخه د خلاص افغانستان هیله. © له پولیو خلاص افغانستان/۱۴۰۳/ رقیبه حمیدي
پر ټولنې اغېز
سویرا توانېدلې ده له ۱۵ زیاتو هغو کورنیو ته قناعت ورکړي چې د پولیو واکسین یې رداوه، هغې په ټولنه کې د واکسین د اهمیت په اړه عامه پوهاوی لوړ کړی دی.
د دغو کورنیو له ډلې یوه د زینب کورنۍ ده؛ یوه ۳۲ کلنه مېرمن چې په لومړي سر کې یې د وېرې او اندېښنو له امله د خپلو ماشومانو له واکسینولو ډډه کوله.
زینب وايي: “سویرا په ډېر صبر او مهربانۍ راته تشریح کړه چې واکسین څنګه کولای شي ماشومان له پولیو ناروغۍ څخه وژغوري، اوس زه نورې میندې هم هڅوم چې خپل ماشومان واکسین کړي.”
د بدلون او الهام سرچینه
د تخار ولایت یوه ټولنیزه فعاله حمیده فایق وايي: “د پولیو واکسین په کمپاینونو کې د سویرا په څېر ښځو شتون نه یوازې د ټولنې روغتیا ته وده ورکوي، بلکې د افغان ښځو د قوت او ارادې ښکارندويي هم کوي.”
مومینه احمدي چې د سویرا همکاره ده، هغه د خپل ځان لپاره یوه بېلګه ګڼي: “د هغې له صبر او مهربانۍ مې ډېر څه زده کړي دي، د هغې پیاوړې اراده تل زما لپاره الهامبخښونکې ده.”
د سویرا پیغام
سویرا هیله لري چې یوه ورځ په تخار نورو ولایتونو کې ټولې کورنۍ په پوره ډاډ خپلو ماشومانو ته واکسین ورکړي.
د هغې پیغام روښانه دی: “واکسین یوازینۍ لاره ده چې ماشومان له پولیو ناروغۍ څخه ساتي. راځئ د یو سالم او روښانه راتلونکي لپاره واکسین جدي ونیسو.”
سویرا خسروي په زړورتیا سره نه یوازې د تخار د ماشومانو د روغتیا لپاره هڅې کوي، بلکې به زړه کې یوه ستره هیله هم ژوندۍ ساتي: د یو سالم، باخبره او له پولیو څخه د خلاص افغانستان هیله.
رقیبه حمیدي، له پولیو خلاص افغانستان
