سیف الله خاموش: ویاړم چې د پولیو پر وړاندې په لومړۍ کرښه کې مبارزه کوم
زابل، افغانستان (۰۸ غویی ۱۴۰۳): زابل د هېواد په سوېل لویدیځ کې ۳۵۳ کیلومتره لرې د کابل- کندهار پر لویه لار پروت دی چې مرکز یې کلات ښار دی.
د دغه ښار په څنډو کې د خاورینو کورونو ګڼ کلي اباد دي چې ډېر یې پاخه سړکونه او د ژوند نورې اسانتیاوې نه لري.
۲۸ کلن سیف الله خاموش په همدې سیمه کې د پولیو له منځه وړلو پروګرام سره د رضاکار په توګه کار کوي.
«د پولیو له منځه وړلو پروګرام سره د رضاکار په توګه مې ۶ کاله مخکې کار پیل کړی، خوښ یم چې د پولیو ناروغۍ پر وړاندې په لومړۍ کرښه کې مبازره کوم، زه نه یوازې د خپل مسوولیت سیمه کې تر هر ماشوم پورې د پولیو واکسین رسوم، بلکې خلکو ته د پولیو ناروغۍ د زیانونو او پولیو واکسین د ګټو په اړه پوهاوی هم ورکوم.»
دی وايي، په دې موده کې یې ډېر کار کړی، د سیمې هر اوسېدونکی یې پېژني، خبرو ته یې غوږ نیسي او په لسګونو هغه کورنۍ یې د خپلو ماشومانو واکسینولو ته راضي کړي چې مخکې یې له دغه کاره انکار کاوه.
د ده په خبره، طبیعي ده چې د خلکو د باور په خپلولو کې وخت لګېږي خو دی په پر له پسې توګه له هغوی سره په اړیکه کې دی، د هغوی د کورونو تر دروازو ورځي ، اندېښنې یې اوري او د واکسین له ګټو یې خبروي.
«هرې کورنۍ ته زما مهم پیغام همدا وي چې پولیو درملنه نه لري او ماشومان په تلپاتي ګوزڼ اخته کوي؛ د دې ناروغۍ د مخنیوي یوازینۍ لار دا ده چې ټولو ماشومانو ته تر پنځه کلنۍ پورې هر ځل د پولیو واکسین دوه څاڅکي ورکړل شي.»
د خاموش او د هغه د همکارانو دا هڅې ګټورې ثابتې شوې او ګڼې هغه کورنۍ چې د پولیو واکسین په اړه د غلطو معلوماتو ښکار شوې وې، د خپلو ماشومانو واکسینولو ته راضي شوې دي.
په دغه لړ کې د سیمې هغه کورنۍ د یادولو ده چې له څه مودې راهیسې یې د خپلو ماشومانو له واکسینولو انکار کړی و خو د خاموش د هڅو په پایله کې د خپلو ماشومانو واکسینولو ته راضي شوه.
دا اسانه کار نه و، له نوموړي سره په دغه کار کې د سیمې یوه دیني عالم هم مرسته وکړه او په ګډه یې د دغې کورنۍ مشر ته قناعت ورکړ.
د مولوي حکمت الله په نوم دغه دیني عالم وايي، خوشحاله دی چې په دغه نېک کار کې برخه واخیسته او د ماشومانو د راتلونکي په ژغورلو کې خپله برخه مسوولیت ادا کوي.
هغه زیاته کړه، ځینې مهال پر ټولنیزو رسنیو خپاره شوې منفي خبرونه یا منفي ویډیوګانې د خلکو ذهنیتونه خرابوي خو دا د ټولنې د باخبر او پوه قشر مسوولیت دی چې دغسې خلکو ته پوهاوی ورکړي او حقایق ورته بیان کړي.
نوموړی خلکو ته په خپل پېغام کې وايي: «په اسلام کې وقایه له درملنې غوره ده؛ د پولیو واکسین د یوې وسیلې په توګه د دغې ناروغۍ په مقابل کې د ماشومانو د معافیت کچه لوړوي، نو خپل ماشومان واکسین کړئ، معافیت یې پیاوړی کړئ او له پولیو ناروغۍ یې وژغورئ.»
