د والدینو غفلت د پولیو په ناروغۍ د مدثر د اخته کېدو او معولیت لامل شو
رقیبه حمیدی
بدخشان، افغانستان (۰۶ ثور ۱۴۰۳) – حبیب الله د بدخشان د مرکز فیض اباد ښار اوسېدونکی دی چې ۳ لوڼې او ۲ زامن لري خو اووه کلن زوی یې د پولیو په ناروغي اخته شوی او د هغه د بدن چپ طرف یې فلج کړی دی.
نوموړی چې ۲۸ کلن دی، په ښار کې سلماني لري او له دې لارې په ډېرې سختۍ اولادونو ته نفقه برابروي.
حبیب الله وايي، اووه کلن زوی یې مدثر د شپږو میاشتو و چې سختې تبې ونیو، کله چې یې د درملنې لپاره ډاکټر ته بوت نو هغه ورته وویل چې د پولیو په ناروغۍ اخته شوی دی.
ده وویل: «زوی مې مدثر د نه واکسینولو له امله د پولیو په ناروغي اخته شو، له هغه وروسته مې لور عایشه چې یو نیم کلنه ده، په منظم ډول واکسینوم څو د مدثر په څېر په دې خطرناکه ناروغي اخته نه شي.»
حبیب الله خپل پولیو وهلي زوی اووه کلن مدثر ته خواړه ورکوي © له پولیو خلاص افغانستان/۱۴۰۳/ رقیبه حمیدي
هغه چې خپل معلول زوی ته یې اوبه او بسکوټ ورکول، وویل، کوم ماشوم چې د پولیو په ناروغي اختته کېږي د عمر تر پایه د کورنۍ او ټولنې د اوږو بار کېږي.
د ده په وینا، پولیو په لوړه کچه خطرناکه ناروغۍ ده، که ماشومان یې پر وړاندې واکسین نه شي هغوی په تلپاتي معلولیت اخته کوي.
هغه زیاته کړه: «غوښتل مې مدثر د خپلو نورو وروڼو په څېر ښوونځي ته لاړ شي او درس ووايي خو د پولیو له امله د ور پېښ معلولیت په سبب له هر ډول فعالیت څخه محروم شوی دی.»
هغه زیاته کړه، مدثر اوس ماشوم دی چې دی او مور یې پالنه کوي، که هغوی لوی شي نو نه پوهېږي چې ژوند به یې څنګه وي.
دی وايي: «که د خپل زوی له معلولیت مخکې پوهېدلی چې د پولیو ناروغۍ ماشومان په تلپاتي معلولیت اخته کوي نو شپه او ورځ به مې کار کړی وای څو واکسین مې رانیولی وای خو اوس چې وړیا دی کورنۍ یې په ارزښت نه پوهېږي.»
دی وايي، که اړتیا پېښه شي نو حاضر دی خپل معلول زوی د کمپاین په ورځو کې د خلکو تر دروازو ورولي څو هغوی د ده په لیدو د خپلو ماشومانو واکسینولو ته وهڅول شي.
حبیب الله له کورنیو غواړي چې کله واکسیناتوران د دوی د کورونو تر دروازو ورځي نو له هغوی سره دې مرسته وکړي چې ماشومان واکسین کړي څو د مدثر په سرنوشت اخته نه شي.
د پولیو ناروغۍ له امله معلول شوی اووه کلن مدثر د خپلو وروڼو او خویندو په منځ کې © له پولیو خلاص افغانستان/۱۴۰۳/ رقیبه حمیدي
د مدثر مشر ورو ۱۳ کلن مصدق وايي، د معلولیت په حالت کې د ورور لیدل ورته د زغم وړ نه دی.
هغه وویل، هره دقیقه چې چې مدثر ویني چې د کور په یوه څنډه کې غځېدلی وي، ښوونځي ته نه شي تللای او له ده سره لوبې نه شي کولای نو سخت خپه کېږي.
ده خپل ورور ته په کتو وویل: «غواړم په راتلونکې کې واکسیناتور شم او ماشومان له پولیو ناروغۍ څخه وژغورم.»
قدیر بران د بدخشان یو تن ډاکټر وايي، د پولیو ناروغۍ یوه فلجوونکې او وژونکې ناروغي ده.
هغه زیاته کړه: «پولیو درملنه نه لري، که کوم ماشوم په دې ناروغۍ اخته شي نو کورنۍ او ټولنې ته به ډېرې ستونزې وزېږوي.»
هغه له کورنیو وغوښتل، کله چې واکسیناتوران د دوی کورونو ته ورځي نو د نوو زېږېدو ماشومانو په ګډون دې ټول له پنځو کلونو د کم عمر ماشومان واکسین کړي څو د پولیو ویروس له ګواښ څخه وژغورل شي.
