له پولیو ناروغۍ څخه د ماشومانو د خوندیتوب لپاره د محمد هڅې
هوسۍ احمدزۍ
کابل، افغانستان (۱۸ وږی ۱۴۰۳) – د کابل د سروبي ولسوالۍ په یوه لېرې کلي کې چېرې چې د بېلابېلو ټولنیزو او جغرافیايي ننګونو له کبله واکسین او نورو روغتیايي خدماتو ته لاسرسی محدود دی، د محمد په نوم ۳۱ کلن ځوان د پولیو پر وړاندې په لومړۍ کرښه کې مبازره کوي.
هغه د خپل ټیم په ملتیا هڅه کوي د دغې سیمې تر هر ماشوم پورې د پولیو واکسین ورسوي څو له دې خطرناکې ناروغۍ څخه یې خوندي کړي.
محمد وايي، د ده دنده په یوه داسې سیمه کې ده چې له یوې خوا په کې روغتیايي خدماتو ته د لاسرسي کچه ټیټه ده او له بلې خوا یې ځینې اوسېدونکي د پولیو واکسین په اړه ناسم باورونه لري او د افواهاتو ښکار شوي دي.
هغه زیاتوي: «کله چې موږ ماشومانو ته د پولیو واکسین ورکوو نو والدین فکر کوي چې دا کار د هغوی ماشومانو ته زیان رسوي، خو موږ هغوی ته د واکسین په اړه رښتیني معلومات ورکوو او ګټې یې ورته بیانوو، په پایله کې هغوی د خپلو ماشومانو واکسنیولو ته قانع کوو.»
ده وویل، د پولیو واکسین په اړه د خلکو اندېښنې د هغوی د پوهې کچې د ټیټوالي له امله دي، په داسې حال کې چې د پولیو واکسین د نړۍ په کچه یو له تر ټولو اغېزناکو روغتیايي اقدماتو دی چې ماشومان د پولیو له فلجوونکې او وژونکې ناروغۍ څخه خوندي کوی.
د هغه په خبره، نړۍ د پولیو له منځه وړلو ته ځکه نږدې شوه چې په ۱۹۵۰ لسیزه کې یې د پولیو واکسین پراخ کمپاینونه پیل کړل او له دې لارې یې په ډېرو سیمو کې ویروس له منځه یووړ.
محمد د خپل ټیم په ملتیا هڅه کوي د دغې سیمې تر هر ماشوم پورې د پولیو واکسین ورسوي څو له دې خطرناکې ناروغۍ څخه یې خوندي کړي © له پولیو خلاص افغانستان/ ۱۴۰۳/ هوسۍ احمدزۍ
محمد د خپلو خبرو په دوام وايي، تر ۱۹۸۸ کال پورې په نړۍ کې هر کال شاوخوا ۳۵۰,۰۰۰ د پولیو پېښې ثبتېدلې خو د پولیو واکسین کمپاینونو په برکت دا شمېرې ۹۹ سلنه کمې شوې، اوس مهال یوازې افغانستان او پاکستان هغه هېوادونه دي چې دغه ویروس په کې شته او هره شېبه د ماشومانو ژوند ګواښي.
دی وايي، له همدې امله دا ډېره اړینه ده چې خلک په دغو مسایلو پوه کړای شي څو د خپلو ماشومانو واکسینولو ته قانع شي او له دې خطرناکې ناروغۍ څخه وژغورل شي.
محمد وویل، دی او ټیم یې په دې لاره کې له ستونزو او خنډونو سربېره خپل کار ته ژمن دي، ځکه که یوه ورځ هم له کاره غافل شي نو د یوه ماشوم ژوند د پولیو ناروغۍ له ګواښ سره مخ کېږي.
هغه په دې باور دی چې د پولیو له منځه وړلو لپاره یوازې د دوی هڅې بسنه نه کوي، بلکې د ټولنې ټول وګړي باید ګډ کار وکړي څو ماشومان چې د هېواد راتلونکی جوړوي، له دې بدمرغې ناروغۍ څخه خوندي شي.
نوموړی په دې برخه کې تر ټولو ډېر پر ځوانانو حساب کوي چې کولای شي د پولیو په مخنیوي کې مهم رول ولوبوي.
ده وویل: «لوستي ځوانان کولای شي د ټولنیزو رسنیو له لارې د پولیو واکسین په اړه شته ناسم باورونه له منځه یوسي، که هغوی په دې اړه کره علمي معلومات خپاره کړي نو خلک به د پولیو ناروغۍ له خطرونو او پولیو واکسین له ګټو خبر شي.»
محمد او د هغه په څېر د پولیو واکسین کمپاین په زرګونو نور رضاکاران هره ورځ د خپلو نه ستړې کېدونکو هڅو له لارې د هېواد په زرګونو ماشومان له دې خطرناکې ناروغۍ څخه ژغوري.
د دوی د زحمتونو برکت دی چې اوس په ډېرو سیمو کې د پولیو پېښې کمې شوې دي؛ دا مبارزه ښيي چې د ټولنې پوهاوی او د واکسین په ارزښت پوهېدل څومره حیاتي دي.
