ژغورونکې ښځې: په فراه کې د پولیو ناروغۍ له منځه وړلو لپاره د عاطفې ادیب هڅې
مرضیه فروتن
فراه، افغانستان (۲ چنګاښ ۱۴۰۳) – ۲۶ کلنه عاطفه ادیب له تېرو دوو کلونو راهیسې په فراه ښار کې د پولیو واکسین د کوارډیناتورې/ همغږې کوونکې په توګه کار کوي. هغې چې د قابلهګۍ په برخه کې یې زده کړې کړې دي، د ښځینه واکسیناتورانو د یوې ۱۲ کسیزې ډلې مشري په غاړه لري چې دنده یې د فراه ښار په درېیمه ناحیه کې له پنځو کلونو د کم عمر ماشومانو واکسینول دي.
عاطفه د سانتي ګرېډ په ۴۰ درجې ګرمي کې د یو شمېر ښځینه واکسیناتورانو په ملتیا کور په کور ګرځي څو له پنځو کلونو د کم عمر ماشومان واکسین کړي. د هغې په لاسونو کې یوه لویه کتابچه ده چې د خپل مسوولیت د ساحې اړوند د واکسین د واجد شرایط ماشومانو نومونه یې په کې لیکلي دي. عاطفه د خپلې سیمې هر ماشوم په نوم او څېره پېژني او د واکسینولو پر مهال هر یوه ته په نامه ور غږ کوي. دا خوشحاله ده چې له تېرو دریو کلونو راهیسې په فراه کې د پولیو مثبته پېښه نه ده ثب شوې.
عاطفه وايي: «موږ د پولیو واکسین په هر کمپاین کې پوره هڅې کړې چې هیڅ ماشوم له واکسین څخه بې برخې نه شي. د دغو هڅو پایله دا ده چې له تېرو څو کلونو راهیسې په فراه کې د پولیو هیڅ مثبت پېښه نه ده ثبت شوې.» هغه د خپل ځان او ټیم لپاره دا یوه لویه لاسته راوړنه بولي.
عاطفه وايي: «موږ د پولیو واکسین په هر کمپاین کې پوره هڅې کړې چې هیڅ ماشوم له واکسین څخه بې برخې نه شي. د دغو هڅو پایله دا ده چې له تېرو څو کلونو راهیسې په فراه کې د پولیو هیڅ مثبت پېښه نه ده ثبت شوې.» هغه د خپل ځان او ټیم لپاره دا یوه لویه لاسته راوړنه بولي. © له پولیو خلاص افغانستان/۱۴۰۳/ مرضیه فروتن
عاطفه ادیب د یوې درې کلنې ماشومې مور هم ده. هغه د پولیو واکسین په هر کمپاین کې خپل لور هم واکسینوي څو له پولیو ناروغۍ څخه وژغورل شي.
دا وايي: «د ټولو ماشومانو ژوند د خپل ماشوم په څېر راته مهم دی. په هر کمپاین کې، په وروستي ورځ چې ټول ماشومان واکسین شي، وروسته خپله لور هم واکسینوم.»
هغه زیاتوي: «د ټولو ماشومانو ژوند زما د لور په څېر ارزښتناک دی، زه د ټولو پر وړاندې مورنی احساس لرم. اجازه نه ورکوم آن یو ماشوم هم له واکسین څخه پاتې شي.»
د عاطفې په وینا، د پولیو واکسین په اړه د خلکو پوهاوی زیات شوی او ټولې کورنۍ د خپلو ماشومانو واکسینولو ته لېوالتیا لري. هغه زیاتوي: «کله چې د واکسیناسیون لپاره کورونو ته ورځو، والدین خوشحالېږي او خپل ماشومان واکسینوي. زمو د مسوولیت په ساحه کې یوه کورنۍ هم خپل ماشوم له واکسین څخه نه منع کوي.»
هغه زیاتوي: «د ټولو ماشومانو ژوند زما د لور په څېر ارزښتناک دی، زه د ټولو پر وړاندې مورنی احساس لرم. اجازه نه ورکوم آن یو ماشوم هم له واکسین څخه پاتې شي.» © له پولیو خلاص افغانستان/۱۴۰۳/ مرضیه فروتن
د ماشومانو د ژوند د خوندیتوب هڅې
په فراه ښار کې د پریسا فطرت په نوم ۲۲ کلنه واکسیناتوره د عاطفې ادیب د ټیم غړې ده. هغه د پولیو واکسین په هر کمپاین کې له عاطفې سره ملتیا کوي او د خپل کار د ښه کولو لپاره له هغې څخه مشورې اخلي.
فطرت وايي: «عاطفه د پولیو واکسین په هر کمپاین کې پر موږ ټینګار کوي چې هیڅ ماشوم باید له واکسین څخه بې برخې نه شي. هغه تل موږ هڅوي چې خپله دنده په سمه توګه ترسره کړو. هغه په خپل کار کې ډېره جدي ده او اجازه نه ورکوي چې آن یو ماشوم له واکسین څخه پاتې شي.»
دا زیاتوي: «کورنۍ مې اجازه نه راکوله چې د واکسیناتورې په توګه کار وکړم خو عاطفې ادیب زما کورنۍ راضي کړه څو د پولیو واکسین له کمپاین سره ملګرې شم. هغې تل زموږ نجونو ملاتړ کړی دی.»
پریسا فطرت وايي: «زما او زما د ټیم د غړو لپاره د ماشومانو ژوند ډېر ارزښت لري، په همدغه بنسټ زموږ د مسوولیت په ساحه کې هیڅ ماشوم له واکسین څخه نه پاتې کېږي.»
له ښځینه واکسیناتورانو د خلکو ملاتړ
د فراه ښار اوسېدونکی ۳۲ کلن محمود شاه له پنځو کلونو د کم عمر د دوو ماشومانو پلار دی. دی خوښ دی چې په هر کمپاین کې یې کور ته ښځینه واکسیناتورانې ورځي او دواړه ماشومان یې واکسینوي.
دی وايي: «له ګڼو ټولنیزو محدودیتونو او ستونزو سربېره ښځینه واکسیناتورانې کورونو ته راځي او له پولیو ناروغۍ څخه د ماشومانو د ژغورلو هڅې کوي. که کوم وخت په کور کې نه یم، مېرمن مې ماشومان واکسیاتوارانو ته ورولي او واکسینوي یې. که د دغو واکسیناتورانو پر ځای نارینه واکسیناتوران وای نو هیڅ وخت به مې مېرمنې خپل ماشومان نه وای ورته را ایستلي او ښايي له واکسین څخه بې برخې شوي وای.»
دا زیاتوي: «موږ د ښځینه واکسیناتورانو له فعالیت څخه ملاتړ کوو، هغوی توانېدلي چې په اسانۍ کورونو ته داخلې شي او ماشومان واکسین کړي. له خلکو مې غوښتنه دا ده چې له ښځينه واکسیناتورانو ملاتړ وکړي څو د پولیو ویرون د تل لپاره له هېواده ورک شي.»
فراه ولایت د هېواد په لوېدیځ کې له هغه ولایتونو دی چې تر دې مهاله د پولیو ناروغۍ له انساني پېښو او چاپېریالي نمونو څخه خوندي دی.
