خیال محمد مشکور؛ د خپلې سیمې د ماشومانو د راتلونکي خوندي کوونکی
پکتیا، افغانستان (۱۵ لړم ۱۴۰۳) – د پکتیا ولایت د مرکز اړوند د دولتزیو کلي اوسېدونکی ۳۳ کلن خیال محمد مشکور د پولیو واکسین کمپاین هغه رضاکار دی چې خپل ژوند یې د ماشومانو خوندیتوب ته ځانګړی کړی دی.
هغه له تېرو پنځو کلونو راهیسې نه یوازې د خپلې سیمې تر زرګونو ماشومانو د پولیو واکسین رسولی، بلکې سلګونو کورنیو ته یې د پولیو ناروغۍ د خطرونو او واکسین د ګټو په اړه پوهاوی هم ورکړی دی.
هڅې او ژمنتیا
خیال محمد مشکور د خپلو زده کړو له بشپړولو وروسته، د یوه رضاکار په توګه له پولیو ناروغۍ څخه د خپلې سیمې د ماشومانو د ژغورلو ماموریت ته ملا تړلې او په دې لار کې یې ډېرې ستونزې ګاللې دي.
هغه خپلې هڅې یوازې ماشومانو ته د واکسین تر ورکولو پورې نه دي محدودې کړې، بلکې وخت په وخت یې په جوماتونو، حجرو او نورو عامه ځایونو کې له خلکو سره ناستې کړې او هغوی یې د پولیو ناروغۍ له خطرونو او د واکسین له ارزښته خبرې کړې دي.
دی وايي: «دا کار اسانه نه و، په پیل کې ډېرې ستونزې موجودې وې چې په کې د پولیو واکسین په اړه ناسم باورونه او منفي اوازې شاملې وې؛ ګڼو کورنیو پر همدې اساس د خپلو ماشومانو له واکسینولو انکار کاوه.»
خو دی زیاتوي چې د خپل ټیم په ملتیا یې ډېر زیار وویست څو هغوی ته حقیقتونه وښيي او هغوی وپوهوي چې له پولیو فلجوونکې ناروغۍ څخه د ماشومانو د خوندیتوب یوازینۍ لار واکسین دی.
هغه په خوښۍ سره وویل: «په تېرو پنځو کلونو کې – چې د پولیو واکسین په کمپاینونو کې د رضاکار په توګه کار کوم – له یوې خوا مې د خپل کلي زرګونه ماشومان واکسین کړي او له بلې خوا مې سلګونه کورنۍ د پولیو ناروغۍ له خطرونو او د واکسین له ارزښته خبرې کړې دي.»
دی وايي، د هغه او د هغه د همکارانو د هڅو په پایله کې د کلي د خلکو د پوهاوي کچه لوړه شوې او په دې پوهېدلي چې واکسین له پولیو ناروغۍ څخه د دوی د ماشومانو د خوندیتوب یوازینۍ لار ده.
نوموړي زیاته کړه: «اوس زموږ په کلي کې داسې کورنۍ نشته چې خپل ماشومان دې د پولیو ناروغۍ پر وړاندې نه واکسینوي.»
مشکور چې په خپله هم د دریو اولادونو پلار دی، د پولیو واکسین هر کمپاین له خپله کوره پیلوي او لومړی خپل ماشومان واکسینوي.
د هغه دا کړنه نورو کورنیو ته عملي پېغام ورکوي چې د پولیو واکسین جدي ونیسي او د خپلو ماشومانو روغتیا ته پام وکړي.
مشکور د خپلې ټولنې خلکو ته په خپل پېغام کې وايي: «پولیو ناروغي د ماشومانو راتلونکی محدودوي، په هر کمپاین کې دوه څاڅکي واکسین د هغوی ژوند خوندي کوي، مهرباني وکړئ خپل ماشومان په وخت واکسین کړئ او هغوی له دغه ناورین څخه وژغورئ.» © له پولیو خلاص افغانستان/ ۱۴۰۳/ رحمت الله مرجانخېل
د ټولنې ملاتړ
د خیال محمد مشکور او د هغه د همکارانو نه ستړې کېدونکې هڅو په سیمه کې مثبت بدلون راوستلی، اوس خلک پوه شوي او د واکسیناتورانو ملاتړ کوي.
د دولت زیو سیمې یو دیني عالم مولوي سید رضا مخلص، وايي: «د ماشومانو د ژوند ساتنه د والدینو ذمه واري ده. پولیو واکسین یوه غوره وسیله ده چې ماشومان له ناروغیو څخه خوندي کوي، ټولنه باید د واکسین کمپاینونو ملاتړ وکړي.»
نوموړی زیاتوي، د ناروغیو مخنیوی د اسلام دین له نظره ډېر ارزښت لري او هغه څوک چې د دغه هدف لپاره کار کوي، د لوی اجر مستحق دي.
سیمه ییز مشر حاجي حبیب الرحمن چې تل خپل ماشومان په وخت واکسینوي، د مشکور او نورو رضاکارانو هڅې ستايي او وايي: «پولیو د یوې خطرناکې ناروغۍ به توګه د ټولنې راتلونکی ګواښي، موږ ټول مسوول یو چې دا ناروغي له منځه یوسو. هر څاڅکی واکسین د یو ماشوم د ژوند لپاره یو ډال دی.»
خلکو ته د خیال محمد مشکور پېغام
مشکور د خپلې ټولنې خلکو ته په خپل پېغام کې وايي: «پولیو ناروغي د ماشومانو راتلونکی محدودوي، په هر کمپاین کې دوه څاڅکي واکسین د هغوی ژوند خوندي کوي، مهرباني وکړئ خپل ماشومان په وخت واکسین کړئ او هغوی له دغه ناورین څخه وژغورئ.»
رحمت الله مرجانخېل، له پولیو خلاص افغانستان
