«تر هر وروستي ماشوم پورې د پولیو واکسین رسول زما دنده ده»
هوسۍ احمدزۍ
کابل، افغانستان (۲ وری ۱۴۰۳) – د کابل ښار د نهمې ناحیې اوسېدونکی ۳۰ کلن عبدالکریم د پولیو واکسین کمپاین هغه زیارکښ رضاکار دی چې هڅه کوي د خپلې سیمې تر هر وروستي ماشوم پورې د پولیو واکسین ورسوي.
نوموړی چې تر لسانس کچې زده کړې لري، په خپله سیمه کې د یوه ښوونځي ښوونکی دی خو د دې تر څنګ له تېرو پنځو کلونو راهیسې د پولیو واکسین په کمپاین کې د رضاکار واکسیناتور په توګه هم کار کوي.
دی وايي، خوښ دی چې ماشومانو ته د ښوونې او روزنې ورکولو تر څنګ د هغوی د روغتیا او سالم راتلونکي لپاره د پولیو ناروغۍ پر ضد مبارزه کوي.
هغه چې د واکسین بکس یې په څنګ کې و او د خپلې سیمې د ماشومانو واکسینولو په موخه کور په کور ګرځېده، وویل: «د دریو ماشومانو د پلار او لسګونو ماشومانو د ښوونکي په توګه د هېواد ماشومان خپل اولادونه ګڼم، غواړم هر ماشوم روغ او جوړ وي او ښه راتلونکی ولري.»
د ده په خبره، په همدغه احساس یې د پولیو له منځه وړلو پروګرام کې د رضاکار په توګه دندې ته اوږه ورکړې څو د هېواد ګلالي ماشومان د پولیو فلجوونکې ناروغۍ ښکار نه شي او سبا د خپلې کورنۍ او ټولنې د اوږو بار نه وي.
عبدالکریم د پولیو واکسین د کمپاین پر مهال د یوه کور دروازه ټکوي څو ماشومانو ته واکسین ورکړي © له پولیو خلاص افغانستان/ ۱۴۰۳/ هوسۍ احمدزۍ
هغه وايي، د پولیو واکسین په هر کمپاین کې د خپلې سیمې د هر کور تر دروازې څو- څو ځله ورځي څو یو ماشوم هم له واکسین څخه پاتې نه شي.
هغه وویل: «که کومه کورنۍ په لومړۍ ورځ بهانه وکړي په دویمه او ان په درېیمه ورځ هم ورځم او ماشومان یې واکسینوم، ځکه دا خپل ایماني او وجداني مسوولیت ګڼم.»
عبدالکریم یادونه وکړه چې په دې وروستیو کې ډېرې کورنۍ د پولیو ناروغۍ په زیانونو او د پولیو واکسین په ارزښت پوهېدلي او په اسانۍ د خپلو ماشومانو واکسینولو ته حاضرېږي خو له بده مرغه داسې کورنۍ هم شته چې په دې اړه یې پوهاوی کم دی او خپل ماشومان نه واکسینوي.
د ده په خبره، تل د دغسې انکاري کورنیو له مشرانو سره خبرې کوي، هغوی ته د پولیو ناروغۍ زیانونه ور ښيي او ورته وايي چې د پولیو ناروغي درملنه نه لري او یوازې د واکسین په وسیله یې مخنیوی کېدای شي.
عبدالکریم د کابل ښار په نهمه ناحیه کې یو ماشوم ته د واکسین ورکولو پر مهال © له پولیو خلاص افغانستان/ ۱۴۰۳/ هوسۍ احمدزۍ
دی زیاتوي، په دغه لړ کې یې تر اوسه د سیمې شپږ دغسې کورنۍ د خپلو ماشومانو واکسینولو ته قانع کړي او په خپله دې لاسته راوړنه خوشحاله دی.
هغه وویل، د دې لپاره چې د پولیو ناروغۍ د مخنیوي لپاره یې هڅې لا ډېرې اغېزناکې شي او ښې پایلې ولري، د سیمې له اوسېدونکو سره یې ښې اړیکې جوړې کړې او ان یو وټس اپ ګروپ یې جوړ کړی چې له کلیوالو سره په کې د پولیو ناروغۍ په اړه د پوهاوي پېغامونه او نور معلومات شریکوي.
عبدالکریم وايي، لویه هیله یې دا ده چې بالاخره د دوی دا هڅې رنګ راوړي او افغانستان یوه ورځ له پولیو ناروغۍ څخه د تل لپاره خلاص شي.
اوسمهال افغانستان او پاکستان د نړۍ هغه دوه هېوادونه دي چې ماشومان یې د پولیو ناروغۍ له ګواښ سره مخ دي خو په نوره نړۍ کې د دغې ناروغۍ مخنیوی شوی دی.
