د ګذر وکیلان د پولیو واکسین په اړه د عامه باور زیاتولو هڅې کوي
کابل، افغانستان (۱۶ تله ۱۴۰۳) – د کابل ښار له ګڼې ګوڼې ډکې سیمې «پلچرخي» کې د پولیو ناروغۍ پر وړاندې خاموشه خو سخته مبارزه روانه ده، په دې مبارزه کې روغتیايي کارکوونکي یوازې نه دي، بلکې له دوی سره د ګذر وکیلان هم اوږه په اوږه ولاړ دي.
د دې سیمې د ګذر وکیلان د خلکو اندېښنې لېرې کوي او د پولیو واکسین په اړه د عامه باور زیاتولو هڅې کوي.
له دې ډلې حاجي محمد او سمیع الله هغه زیارکښ وکیلان دي چې د پولیو واکسین په اړه یې د خلکو د پوهاوي په لوړولو او د هغوی د باور په خپلولو کې پاموړ ونډه درلودلې ده.
حاجي محمد د پلچرخي سیمې د اتم ګذر وکیل دی چې تل له خلکو سره په اړیکه کې وي. هغه وايي: «کله چې ما په سیمه کې د پولیو واکسین په اړه له خلکو سره خبرې پیل کړې نو په لومړیو کې ډېرې ستونزې وې، ځکه ډېر خلک یې په اړه اندېښمن او بې باوره و، خو ما هوډ کړی و چې د خپلې ټولنې د ماشومانو د ښې روغتیا په موخه باید په هر ډول حالت کې خپل مسوولیت ترسره کړم.»
ده وویل، د همدغه لوی هدف لپاره یې د سیمې تر هر اوسېدونکي ورغی او له هر یوه سره یې جلا جلا خبرې وکړې او هغوی ته یې وویل چې پولیو یوه خطرناکه ناروغي ده چې د ماشومانو د فلج کېدو او آن مړینې لامل کېږي، دا ناروغي درملنه نه لري، یوازینۍ لار واکسیناسیون دی چې د دغه ګواښ مخنیوی کولای شي.
نوموړی زیاتوي: «په دغه پروسه کې زه یوازې نه وم، بلکې دیني عالمانو او روغتیايي کارکوونکو مې هم ملتیا کوله، کله چې له دیني او روغتیايي پلوه خلکو ته د پولیو واکسین ګټې روښانه شوې نو په ډېره لېوالتیا حاضر شول څو خپلو ماشومانو په منظم ډول د پولیو واکسین ورکړي.»
د ده په خبره، خوشحاله دی چې د پولیو واکسین په هر کمپاین کې د ګذر خلک په پراخه کچه ګډون کوي او نه پرېږدي چې آن یو ماشوم هم له پولیو واکسین بې برخې شي.
د کابل ښار له ګڼې ګوڼې ډکې سیمې «پلچرخي» کې د پولیو ناروغۍ پر وړاندې خاموشه خو سخته مبارزه روانه ده، په دې مبارزه کې روغتیايي کارکوونکي یوازې نه دي، بلکې له دوی سره د ګذر وکیلان هم اوږه په اوږه ولاړ دي © له پولیو خلاص افغانستان/ ۱۴۰۳/ هوسۍ احمدزۍ
هغه وویل، لا هم خپلې مبارزې ته دوام ورکوي ځکه د هر ماشوم ژوند ارزښت لري او د ټولنې د غړي په توګه یې دا مسوولیت دی چې هغوی له دې خطرناکې ناروغۍ څخه وژغوري.
سمیع الله د پلچرخي سیمې د لسم ګذر وکیل دی چې د حاجي محمد په څېر د پولیو ناروغۍ په وړاندې مبارزه کوي.
دی وايي، وخت په وخت له کورنیو سره مخامخ خبرې کوي، هغوی ته د پولیو ناروغۍ د زیانونو او واکسین د ګټو په اړه معلومات ورکوي، د هغوی پوښتنې ځوابوي او اندېښنې یې رفع کوي، دا چاره د دې لامل شوې چې د پخوا په پرتله ډېر خلک په دې پوه شي چې واکسین زیان نه لري بلکې د ماشومانو اساسي حق دی.
هغه وویل: «موږ له خپلې سیمې او په ټوله کې له هېواد څخه د پولیو ناروغۍ ورکولو ته ژمن یوو، که څوک لا هم د پولیو واکسین په اړه شک لري، نو زه او زما همکاران مخامخ ناسته ورسره کوو، اندېښنې یې اورو او قناعت ورکوو.»
د پلچرخي سیمې د یوه روغتیايي مرکز مشر ډاکټر عبدالرحیم وايي، د پولیو ناروغۍ مخنیوی یوازې د روغتیايي کارکوونکو کار نه دی؛ بلکې دا د ټولنې هر غړي دنده ده، په ځانګړي ډول د حاجي محمد او سمیع الله په څېر د سیمه ییزو مشرانو چې له خلکو سره نېغ په نېغه اړیکې لري.
د ده په خبره، د دغسې مشرانو همکاري او ملاتړ د واکسیناسیون پروسې په بریا کې حیاتي رول لوبوي.
هغه وویل: «د ګذر وکیلانو هڅو زموږ د سیمې په خلکو کې د باور فضا رامنځته کړې چې له مخې یې روغتیايي مرکز ته د ماشومانو راتګ ډېر شوی دی، دا همکاري موږ ته دا شونتیا راکړې چې په ټولنه کې د پولیو د مخنیوي لپاره لوی ګامونه واخلو، زه په دې باور یم چې د سیمې مشران به خپلو دغو هڅو ته دوام ورکوي، څو زموږ ماشومان له دې ناورین څخه خوندي پاتې شي.»
په پایله کې، د کابل په پلچرخي سیمه کې د ګذر وکیلانو او روغتیايي کارکوونکو همغږۍ او هڅو د پولیو واکسین کمپاینونو په بریا کې لوی رول لوبولی دی.
دا هڅې نه یوازې د پولیو مخنیوي لپاره مهمې دي، بلکې د ټولنې د روغتیا او راتلونکي د خوندي کولو لپاره هم حیاتي ارزښت لري.
هوسۍ احمدزۍ، له پولیو خلاص افغانستان
