د پولیو له منځه وړلو لپاره د نیلاب هڅې؛ د ذهنيتونو بدلول او د ژوند ژغورل
بدخشان، افغانستان (۱۲ تله ۱۴۰۳) – نیلاب جلالي چې له دریو کلونو راهیسې په بدخشان کې د پولیو واکسین په کمپاینونو کې د واکسیناتورې په توګه کار کوي، له دې ناروغۍ سره مبارزې ته د افغانستان د ځوانانو د ژمنتیا په یوې نمونې/ سمبول بدله شوې ده.
هغه په هر کمپاین کې، هره ورځ په منځنۍ کچه له ۱۱۰ تر ۱۱۵ ماشومان واکسینوي، دا بریاوې د هغې د هڅو او زحمتونو پایله ده، ځکه دا لار له ننګونو ډکه وه چې د افغانستان په لېرې سیمو کې د واکسیناسیون د بهیر سختۍ بیانوي.
هڅې او بریالیتوب
نیلاب جلالي د خپل کار لومړۍ ورځې را یادوي، هغه ورځې چې هغه په کې له اندېښنو او آن د میندو او پلرونو له انکار سره مخامخ کېده.
هغې وویل: “زما د کار په پیل کې ډېرو کورنیو له پولیو واکسین څخه وېره درلوده او فکر یې کاوه چې ښایي د دوی ماشومانو ته زیان ورسوي.”
د نیلاب په وینا، دغه اندېښنې تر ډېره د ناسمو باورونو له امله وې چې په ټولنه کې یې شتون درلود، نو په همدې دلیل د دغه ډول کورنیو قانع کول چې خپل ماشومان واکسین کړي، اسان کار نه و.
هغې تشریح کړه: “د کار په اوږدو کې هر ځل د یوې کورنۍ له ممانعت او انکار سره مخ کېدم، هغوی فکر کاوه چې پولیو واکسین به یې ماشومان ناروغ کړي، خو ما به په ډېر زغم هغوی ته معلومات او پوهاوی ورکاوه چې پولیو یو فلجوونکې او وژونکې ناروغي ده چې هېڅ درملنه نه لري، او د مخنیوي یوازینۍ لار یې په هر کمپاین کې په وخت ماشومانو ته د پولیو د دوه څاڅکو واکسین ورکول دي.”
جلالي باور لري چې د ماشومانو د واکسین تر څنګ، کورنیو ته پوهاوی ورکول د هغې د کار یوه مهمه برخه ده.
هغې وویل: “میندې او پلرونه باید پوه شي چې واکسین کول یوازینۍ لار ده چې د پولیو په ګډون له خطرناکو ناروغیو مخنیوی کوي، که دوی سم معلومات ولري، نو د خپلو ماشومانو د روغتیا لپاره به ښې پرېکړې وکړي.”
نیلاب په خپل پیغام کې والدینو ته وایي: “سم پوهاوی او معلومات کولای شي ستاسو د ماشومانو ژوند وژغوري، مهرباني وکړئ په بېاساسه اوازو باور مه کوئ او د پولیو واکسین جدي وګڼئ.”
نیلاب جلالي چې له دریو کلونو راهیسې په بدخشان کې د پولیو واکسین په کمپاینونو کې د واکسیناتورې په توګه کار کوي، له دې ناروغۍ سره مبارزې ته د افغانستان د ځوانانو د ژمنتیا په یوې نمونې بدله شوې ده © له پولیو خلاص افغانستان/۱۴۰۳/ رقیبه حمیدي
د کورنیو د ذهنیتونو بدلون
نیلاب له ګواښونو سربېره توانېدلې چې کورنۍ قانع کړي څو د پولیو واکسین د هغوی د ماشومانو لپاره ضروري دی، یوه کورنۍ چې هغه یې په قانع کولو کې بریالۍ شوې، د رحیمي کورنۍ ده.
بشیر رحیمي د دې کورنۍ مشر دی، په پیل کې یې خپلو ماشومانو ته د پولیو واکسین له ورکولو انکار کاوه، هغه فکر کاوه چې د ماشومانو واکسینول د هغوی د ماشومانو روغتیا ته زیان رسوي.
هغه وايي: “موږ پر اوازو باور کاوه او فکر مو کاوه چې واکسین به زموږ ماشوم ته زیان ورسوي؛ خو نیلاب په ډېر صبر او زغم موږ قانع کړو چې دا باورونه غلط دي او واکسین ماشومان له پولیو خطرناکې ناروغۍ څخه ژغوري.”
بشیر رحیمي چې اوس د پولیو واکسین په اهمیت پوهېدلی، والدینو ته یې پیغام دا دی چې اوازو ته پام و نه کړي او خپل ماشومان واکسین کړي څو له ګوزڼ څخه خوندي شي.
یوه بله کورنۍ چې نیلاب توانېدلې قانع یې کړي، د نېکزاد کورنۍ ده؛ سارا نېکزاد د دې کورنۍ مشره ده چې په پیل کې یې د پولیو په واکسین باور نه درلود.
هغه وايي: “موږ فکر کاوه چې د پولیو واکسین بې ګټې دی او ممکن ماشومانو ته زیان ورسوي خو نیلاب په صبر او حوصلې سره ما ته د دې ناروغۍ زیانونه تشریح کړل چې واکسین څنګه زموږ ماشومان خوندي کوي.”
اوس هغه د پولیو واکسین په اهمیت پوهېدلې او وايي: “موږ اوس خپل ماشومان په منظم ډول واکسین کوو او په دې اړه هیڅ شک نه لرو.”
سارا هم والدینو ته پیغام لري او وايي: “د پوهاوي او عامه معلوماتو زیاتوالي ته پام وکړئ او واکسین د خپلو ماشومانو د روغتیا لپاره د یوې اړتیا په توګه ومنئ.”
له پولیو څخه د خلاصون هیلې
د نیلاب جلالي او نورو ځوانو واکسیناتورانو هڅو په هېواد کې له پولیو څخه خلاصې راتلونکې ته د خلکو هیلې ژوندۍ ساتلې دي.
دوی سره له ټولو مشکلاتو، لا هم د یوې انګیزې او تعهد له مخې کار کوي او هیله لري چې د خپلو فعالیتونو له لارې په دې ستره لاسته راوړنه کې برخه واخلي، ترڅو یوه ورځ له پولیو څخه پاک افغانستان وویني.
رقیبه حمیدي، له پولیو خلاص افغانستان
