“له پولیو ناروغۍ څخه د ماشومانو ساتنه د هر وګړي مسوولیت دی”
سعید زابلی
هلمند، افغانستان (۲۷ وږی ۱۴۰۳) – د هلمند ولایت قومي مشران او دیني عالمان په یوه غږ د پولیو ضد واکسین د تطبیق پر اهمیت ټینګار کوي او خلکو ته توصیه کوي چې خپل ماشومان له پولیو فلجوونکې او وژونکې ناروغۍ څخه د خوندیتوب په موخه واکسین کړي.
هغوی وایي، د پولیو ناروغي درملنه نه لري او د مخنیوي یوازینۍ لاره یې په هر کمپاین کې ماشومانو ته دوه څاڅکي واکسین ورکول دي.
د هلمند د مارجې ولسوالۍ یوه قومي مشر ۵۵ کلن حاجي صاحب جان وايي، د هېواد په بېلابېلو سیمو کې یو ځل بیا د پولیو ویروس د خپرېدو په حال کې دی او په دې وروستیو کې په جنوبي زون کې د پولیو څو مثبتې پېښې ثبت شوې دي.
هغه زیاته کړه: «دا ډېره خواشینوونکې ده چې له واکسیناسیون له امکاناتو سربېره د پولیو ویروس بیا هم زموږ ماشومان ځپي او په تلپاتي معلولیت یې اخته کوي.»
نوموړی پر خلکو غږ کوي چې په پوره یووالي دې د پولیو واکسین په هر کمپاین کې فعاله ونډه واخلي او ډاډ دې تر لاسه کړي چې هیڅ ماشوم له دغه فرصت څخه نه محرومېږي.
حاجي صاحب جان وايي: «زه په خپله د پولیو واکسین په هر کمپاین کې نه یوازې د خپلې کورنۍ ماشومان واکسینوم، بلکې له رضاکارانو سره یو ځای پر ټول کلي ګرځم څو یو ماشوم هم له پولیو واکسین څخه پاتې نه شي.»
د هلمند ولایت قومي مشران او دیني عالمان په یوه غږ د پولیو ضد واکسین د تطبیق پر اهمیت ټینګار کوي او خلکو ته توصیه کوي چې خپل ماشومان له پولیو فلجوونکې او وژونکې ناروغۍ څخه د خوندیتوب په موخه واکسین کړي ©له پولیو خلاص افغانستان/ ۱۴۰۳/ سعید زابلی
د ده په خبره، پولیو یوه خطرناکه ناروغي ده چې ماشومان فلجوي او ان تر مرګ پورې یې رسوي، دا د ټولنې د هر وګړي مسوولیت دی چې خپل ماشومان له دغه حالت څخه وزغوري.
ده وویل، تجربو ښودلې چې د پولیو په ناروغۍ اخته ماشومان د ور پېښ معلولیت له امله د خپلو کورنیو او ټولنې د اوږو بار ګرځېدلي دي.
د هلمند د باباجي ولسوالۍ اوسېدونکی دیني عالم قاري احمد هم له پولیو ناروغۍ څخه د خوندیتوب په موخه د ماشومانو واکسینول اړین ګڼي او وايي: «علمي او ساینسي څېړنو ثابته کړې چې د پولیو واکسین زیان نه لري، بلکې له دغې خطرناکې ناروغۍ څخه د خلاصون یوازینۍ وسیله ده.»
نوموړی چې تل د جومات له منبره خلکو ته د پولیو واکسین د ارزښت په اړه پوهاوی ورکوي، زیاتوي، وقایه یا د ناروغۍ مخینوی د اسلام په اصولو کې مهم ځای لري، د اسلام دین نه یوازې د فرد د بدني، روحاني او اخلاقي پاکوالي لارښوونه کوي، بلکې ټولنیزې روغتیا ته هم ارزښت ورکوي؛ له همدې امله، د ناروغیو او ساري وضعیتونو مخنیوی یو داسې عمل دی چې په اسلام کې یې کلکه سپارښتنه شوې ده.
هغه د خپلو خپلو خبرو په دوام وویل: «اسلام مسلمانانو ته د روغتیا ساتنې امر کوي؛ رسول الله (ص) فرمایلي: “د هرې ناروغۍ لپاره شفا شته.” دا حدیث د دې څرګندونه کوي چې مسلمانان باید د ناروغیو درملنې او مخنیوي لارې چارې وپلټي. روغتیا پالنه او وقایه د اسلامي احکامو یوه برخه ده؛ رسول الله (ص) په یو بل حدیث کې فرمایي: “کله چې تاسو د طاعون/ وبا په یوه سیمه کې یاست، نو له هغه ځایه مه وځئ، او که طاعون بل ځای کې وي، هلته مه ځئ.” دا حدیث د ساري ناروغیو د مخنیوي په اړه د وقایوي تدابیرو لارښوونه کوي.»
د مفتي عبدالقدیر په نوم بل دیني عالم هم ورته څرګندونې کوي او وايي چې خلک باید د پولیو واکسین په تړاو د افواهاتو او ناسمو باورونو تر اغېز لاندې را نه شي، بلکې خپلو ماشومانو ژوند او روغتیا ته دې ارزښت ورکړي.
دی زیاتوي، والدین د خپلو اولادونو د روغ ژوند مسوولیت په غاړه لري، هغوی ته کار ده چې مسوولانه چلند وکړي او خپل ماشومانو ته په پر له پسې ډول د پولیو واکسین ورکړي څو له دې خطرناکې ناروغۍ څخه خوندي شي.
په هلمند کې د قومي مشرانو او دیني عالمانو همغږې هڅې د دې ښکارندويي کوي چې د ټولنې مشران د ټولنې په روغتیا او ښه ژوند کې اغېزناک رول لوبوي.
د دوی ملاتړ نه یوازې د پولیو واکسین په اړه د خلکو ناسم باورونه کموي، بلکې ټولنه دې ته هڅوي چې د خپلو ماشومانو د ژغورنې لپاره فعاله ونډه واخلي.
