وحیده شمس: یوه زړه وره مېرمن چې ماشومان له پولیو ویروس څخه ژغوري
رقیبه حمیدي
کندز، افغانستان (۳۰ غبرګولی ۱۴۰۳) – د کندز ښار د لومړۍ ناحیې اوسېدونکې ۲۳ کلنه وحیده شمس د استقامت او قوي هوډ په درلودلو د پولیو واکسین کمپاین په یوې اغېزناکې څېرې بدله شوې ده. هغې په خپلو نه ستړي کېدونکو هڅو د خپلې سیمې د ماشومانو د روغتیا په برخه کې مرسته کړې او د پولیو واکسین په تطبیق سره د هېواد اینده سازان له معلولیت څخه ژغوري.
انګېزه
وحيدې خپلې لومړنۍ زده کړې د کندز د خواجه مشهد په لیسه کې پای ته رسولې او د لسانس سند يې د تخار پوهنتون د حقوقو او سياسي علومو له پوهنځي څخه ترلاسه کړی دی. نوموړې له تېر یو کال راهيسې په دغه ولايت کې د پوليو واکسين په کمپاين کې د رضاکارې په توګه کار کوي. وحيده هر سهار اته بجې د واکسینونو شین بکس اوږې ته اچوي او له کوره وځي څو د خپل مسوولیت په ساحه کې کور په کور وګرځي او ماشومان واکسین کړي. هغه هره ورځ له ۱۵۰ تر ۱۸۷ ماشومان واکسین کوي.
وحيده وايي: “د پوليو له منځه وړلو په پروګرام کې زما د کار کولو انګېزه دا ده چې افغانستان له پولیو ناروغۍ څخه خلاص شي، زه نه غواړم چې زما د هېواد یو ماشوم هم د پوليو په ناروغۍ اخته شي او د نورو مرستې ته اړ شي.”
ننګونې او هڅې
یوه له لویو ننګونو چې وحیده ورسره مخ ده، د هغې د کار او فعالیت لپاره د هغې د کورنۍ د ملاتړ نشتوالی دی. سره له دې چې د هغې کورنۍ د پولیو د واکسین په کمپاین کې د دې په کار خوښه نه ده خو وحیده په قوي اراده او لوړې حوصلې خپل کار ته دوام ورکوي.
وحيده وايي: “د پوليو له منځه وړلو په پروګرام کې زما د کار کولو انګېزه دا ده چې افغانستان له پولیو ناروغۍ څخه خلاص شي، زه نه غواړم چې زما د هېواد یو ماشوم هم د پوليو په ناروغۍ اخته شي او د نورو مرستې ته اړ شي.“ © له پولیو خلاص افغانستان /۳۰۴۱/ رقیبه حمیدي
پر ټولنې پراخې اغیزې
د پوليو واکسين په کمپاين کې د وحيدې فعاليتونو پر سیمه ییزې ټولنې چې دا په کې ژوند کوي، پراخې اغېزې درلودلې دي. هغې په خپلو هڅو د ماشومانو د روغتیا په ښه کولو او د پولیو ناروغۍ په مخنیوي کې ډېره مرسته کړې ده. وحیده توانېدلې چې له پنځو کلونو څخه د کم عمر ماشومانو ته د پولیو واکسین د تطبیق تر څنګ د واکسین په اړه د خلکو باور او پوهاوی ډېر کړي.
د وحيدې له مهمو لاسته راوړنو څخه یوه په ټولنيزو او روغتيايي فعاليتونو کې د ښځو د ونډې زياتوالى دى. د پولیو واکسین په کمپاینونو کې د یوې لوستې ښځې په توګه د هغې کار او فعالیت د کندز نورو ښځو ته الهام بخښي.
د عامه پوهاوي لوړوالی
وحيده وايي: “مخکې ډېرو کورنيو د کمو معلوماتو او يا ناسمو باورونو له امله خپلو ماشومانو ته د پولیو واکسين له ورکولو ډډه کوله، خو زه له دغه راز کورنيو سره په مستقيم ډول په اړيکه کې کېږم او د سمو معلوماتو په وړاندې کولو له هغوی سره مرسته کوم چې د واکسین ارزښت درک کړي او د خپلو ماشومانو د روغتیا لپاره اقدام وکړي.”
راتلونکي ته هیله مندي
د پولیو د واکسین په کمپاین کې د وحیدې تجربو هغې ته دا فرصت ورکړی چې ماشومانو ته د پولیو واکسین د تطبیق په بهیر کې له بېلابېلو ننګونو سره اشنا شي او په دې برخه کې خپل مهارتونه لوړ کړي. هغه راتلونکي ته هیله منده ده او تمه لري چې خپلو فعالیتونو ته دوام ورکړي او د خپلې سیمې د ماشومانو د روغتیا په ښه کولو کې مرسته وکړي.
وحيده وايي: د «ماشومانو واکسين کول ډېر مهم او حياتي دي او له دې فرصت څخه بايد په استفادې په ماشومانو کې د مخنيوي وړ ناروغيو مخه ونيول شي.»
وحيده وايي: “مخکې ډېرو کورنيو د کمو معلوماتو او يا ناسمو باورونو له امله خپلو ماشومانو ته د پولیو واکسين له ورکولو ډډه کوله، خو زه له دغه راز کورنيو سره په مستقيم ډول په اړيکه کې کېږم او د سمو معلوماتو په وړاندې کولو له هغوی سره مرسته کوم چې د واکسین ارزښت درک کړي او د خپلو ماشومانو د روغتیا لپاره اقدام وکړي.“ © له پولیو خلاص افغانستان /۳۰۴۱/ رقیبه حمیدي
د ټولنې غږ
د کندز ولایت د لومړۍ ناحیې اوسېدونکې نرګس وايي: «که وحیده او د وحیدې په څېر لسګونه نور واکسیناتوران نه وای نو د ماشومانو ژوند به مو د پولیو ناروغۍ سخت اغېزمن کړی وای؛ خوشحاله یم چې د هېواد معصوم ماشومان د دې خطرناکې ناروغۍ په وړاندې واکسین کېږي او له معلولیت څخه نجات پیدا کوي.”
د شعیب الله په نامه یو څلور نیم کلن ماشوم چې د ګوزڼ واکسین یې اخیستی دی وايي: «زما مور او پلار راته ویل چې واکسین زما د روغتیا د ساتلو لپاره مهم دی او باید واکسین وکړم. له واکسین وروسته هیڅ درد نه لرم، ښه احساس لرم او کولای شم له خپلو همزولو سره ډېرې لوبې وکړم.»
د وحیده شمس فعالیتونه په ټولنه کې د روغتیایی وضعیت د ښه کولو لپاره د افغان مېرمنو د دوامداره هڅو یوه الهام بخښونکې بیلګه ده. هيله ده چې د هغې د د فعاليتونو په دوام او د خلکو په ملاتړ افغانستان له پوليو څخه د پاک راتلونکي پر لور ګام واخلي.
