په هیواد کې د پولیو واکسین سرتاسري کمپاین پیل شو
کابل، ۳۰ زمری ۱۴۰۲: د افغانستان د اسلامي امارت د عامې روغتیا وزارت د نړیوالو ادارو په همکارۍ نن په هېواد کې د پولیو ضد واکسین ملي کمپاین پیل کړ. د دغه کمپاین موخه داده څو له پنځو کالو څخه د کم عمر څه باندې ۱۱ میلیونه ماشومان د ګوزڼ یا پولیو ناروغۍ په وړاندې واکسین شي؛ البته په شمال زون کې دغه کمپاین یوه اونۍ وروسته، د اګسټ میاشتې له ۲۸-۳۱ ترسره کېږي.
همداراز په دغه کمپاین کې میبندازول ټابلیټ هم له ۲۴-۵۹ میاشتو عمر لرونکو ماشومانو ته ورکول کېږي، دا درمل د چنجي اړوند ناروغیو د درملنې لپاره کارول کېږي.
د افغانستان د اسلامي امارت د عامې روغتیا وزیر ډاکټر قلندر عباد وویل: «موږ هوډ لرو چې د خپلو شریکانو په ملاتړ پولیو ناروغي په افغانستان کې ختمه کړو.” هغه زیاتوي: «د پولیو ناروغۍ وروستۍ پېښې د اندېښنې وړ دي. د پولیو واکسین کمپاینونه او لومړني روغتیايي خدمتونه به تر هغه جریان ولري چې دغه ناروغي مو له هېواده په بشپړه توګه ورکېږي.»
«د ټولو افغانانو ملاتړ په ځانګړې توګه د والدینو، د ټولنې د مشرانو، قومي مخورو او ملا امامانو ملاتړ د پولیو په له منځه وړلو کې اړین دی، موږ غواړو چې هغوی له مړینې او ګوزڼ څخه د افغان ماشومانو د خوندیتوب په برخه کې همکاري وکړي.»
پوليو يوه ويروسي ناروغي ده چې درملنه نه لري او يوازې د واکسين په مټ د مخنیوي او له منځه وړلو وړ ده. کوم ماشوم چې په دې ناروغۍ اخته شي په ټول عمر کې به فلج او معیوبه وي او یا به هم خپل ژوند له لاسه ورکوي.
په روان ۲۰۲۳ز کال کې تر دې دمه د پولیو ناروغۍ پنځه مثبتې پېښې ثبت شوي دي چې په اړه موږ خپله اندېښنه څرګندوو.
د پولیو سره په مبارزه کې د عامو خلکو ونډه او د ټولنې مخورو همکارۍ خورا زیاته اړینه ده. کورنۍ د خپلو پنځو کالو کم عمره ماشومانو په واکسین کولو سره او د ټولنې مخور، دیني عالمان او مشران د پولیو واکسین د کارکوونکو سره دهمکاري له لارې کولای شي خپله رغنده ونډه ددې ناروغي د له منځه وړلو په برخه کې ترسره کړي.
