د یونیسف د ۷ ټنه درملو مرسته؛ زابل کې د روغتیايي ستونزو د حل لپاره ستر ګام
سعید زابلی
زابل، افغانستان (۱ تله ۱۴۰۳) – د ملګرو ملتونو د ماشومانو نړیوال صندوق/ یونیسف له لوري په یوه تازه اقدام کې د زابل ولایت د ۱۱ ولسوالیو له ۴۷ روغتیايي مرکزونو سره د ۷ ټنه درملو مرسته کړې ده.
ولایتي مسوولین وايي، له دې مرستې سره به نه یوازې د روغتیايي مرکزونو ظرفیت لوړ شي، بلکې خلکو ته به د عامې روغتیا او واکسینونو د خدماتو په برخه کې لا پراخوالی او ښه والی راشي.
د زابل د عامې روغتیا رییس ډاکټر میرویس افغان وویل، د یونیسف له لوري د ۷ ټنه درملو په شوې مرسته کې واکسینونه، بېلابېل درمل، د مېندو او ماشومانو د خوارځواکۍ ضد مواد او نور توکي شامل دي.
هغه زیاته کړه، دغه درمل به د زابل د ۱۱ ولسوالیو شملزي، اټغر، شینکۍ، نوبهار، شاجوی، سیوري، ارغنداب، مېزانه، ښارصفا، خاک افغان او دایچوپان ۴۷ روغتیايي مرکزونو ته ورکړل شي.
دی وايي، له دې مرستې سره به په یادو شوو روغتیايي مرکزونو کې د ناروغانو د درملنې او ماشومانو د واکسینولو په خدماتو کې د پام وړ ښه والی راشي.
افغان زیاته کړه: «له دې وروسته به زابل کې روغتیایي مرکزونه وکولای شي ناروغانو ته په وخت معیاري درمل برابر کړي چې له دې سره به د هغوی درملنه چټکه او اغېزناکه شي، دغه راز به د پولیو په ګډون د ساري ناروغیو واکسینونو ته د کورنیو لاسرسی هم پراخ شي او هغوی به وکولای شي په هر روغتیايي مرکز کې خپل ماشومان په اسانۍ واکسین کړي.»
نوموړی له یونیسف څخه د دې مرستې له امله مننه کوي او په راتلونکي کې یې د دوام په هیله دی.
د زابل اوسېدونکي هم د یونیسف په دې مرسته خوښ دي او تمه لري چې له مهم اقدام سره به د روغتیايي مرکزونو خدمات معیاري شي.
د شاجوی اوسېدونکی عبدالله چې خپل څلور کلن زوی یې د دغې ولسوالۍ روغتیايي مرکز ته د پولیو واکسین لپاره راوستلی و، وویل: «دا مرسته زموږ لپاره ډېره حیاتي ده، زموږ اقتصادي وضعیت کمزوری دی او دا توان نه لرو چې د خپلو ناروغانو د درملنې پر مهال په خپلو پیسو درمل واخلو، زه له یونیسف څخه ډېره مننه کوم چې موږ ته یې په روغتیايي مرکزونو کې د وړیا درملو او واکسینونو اسانتیاوې برابرې کړې دي.»
نوموړی پر خلکو غږ کوي چې له دغو اسانتیاوو په ګټې اخیستو دې خپل ماشومان روغتیايي مرکزونو ته ورولي څو د پولیو په ګډون د ماشومتوب دورې د ټولو ناروغیو واکسینونه ورکړل شي.
د زابل د مرکز کلات ښار یوه اوسېدونکی رحیم الله وايي چې په روغتیایي کلینکونو کې ځینې وختونه د درملو کمی وي، خو د یونیسف له دې مرستې سره به دا ستونزه حل شي.
د دغه ولایت یو قومي مشر حاجي سمیع الله هم له د یونیسف له لوري د درملو مرسته د قدر وړ بولي او وايي دغه سازمان تل په بېلابېلو برخو کې د زابل له اوسېدونکو سره همکار او خواخوږی پاتې شوی دی.
ده وویل، همدا اوس یونیسف په دغه ولایت کې د ماشومانو د روغتیا، تعلیم، تغذیې او د هغوی د خوندیتوب په برخو کې په فعالیت بوخت دی چې ولس یې سخت منندوی دی.
یونیسف (UNICEF) یا د ملګرو ملتونو د ماشومانو نړیوال صندوق په ۱۹۴۶ زېږدیز کال کې د ملګرو ملتونو له خوا جوړ شوه چې په پیل کې یې له هغو ماشومانو او کورنیو سره مرسته کوله چې د دویمې نړیوالې جګړې له امله اغېزمن شوي وو. وروسته یې ماموریت پراخ شو او اوس د افغانستان په ګډون په ټوله نړۍ کې د ماشومانو، میندو او کمزورو ټولنو د ژوند د ښه کولو لپاره کار کوي.
یونیسف په ځانګړي ډول د ماشومانو روغتیا، تعلیم، تغذیه، او د هغوی د خوندیتوب په برخو کې فعالیت کوي. د دې ادارې موخه د ماشومانو د حقونو ساتنه او هغوی ته د یو سالم او خوندي راتلونکي برابرول دي.
یونیسف د واکسینونو کمپاینونه، د ښوونځیو جوړول، پاکې اوبه برابرول او د ماشومانو د ساتنې پروګرامونه پلي کوي ترڅو د دوی اړتیاوې پوره شي او په ښه چاپېریال کې ژوند وکړي.
