د پولیو شپږمه پېښه هم په ننګرهار کې ثبت شوه
کابل، افغانستان (۵ تله ۱۴۰۲): له بده مرغه د هېواد د ختیځ زون په ننګرهار ولایت کې د پولیو یا ماشومانو ګوزڼ بله پېښه هم ثبت شوې چې له دې سره په روان ۲۰۲۳ زېږدیز کال کې د پولیو پېښو شمېر شپږو ته لوړ شو.
د پولیو دا نوې پېښه د دغه ولایت په خوږیاڼیو ولسوالۍ کې ثبت شوې او په دې ناروغي اخته ماشوم ۱۲ کاله عمر لري.
د تېر په څېر په خوږیاڼیو ولسوالۍ کې هم – چېرې چې دا پېښه ثبت شوې- د خلکو روغتیا ساتنه یا حفظ الصحه کمزورې ښودل شوې ده.
په ککړ چاپېریال کې د پولیو ویروس تر ډېره ژوندی پاتې کېږي، کله چې ماشومان په دغسې یوه چاپېریال کې لوبې کوي نو ډېر ژر د دغه ویروس تر برید لاندې راځي، ځیني وختونه په پولیو ویروس اخته ماشومان په دایمي فلج اخته او یا هم مړه کېږي.
د پولیو له منځه وړلو ملي بېړني عملیاتي مرکز مسئول ډاکټر نیک ولي شاه مؤمن د پولیو د دغې نوې پېښې په اړه خواشیني څرګندوي او وايي، په تېر ۲۰۲۲ زېږدیز کال کې په هېواد کې د پولیو واکسین ۱۲ کمپاینونه شوي چې نه یوازې د افغانستان، بلکې د نړۍ په تاریخ کې تر ټولو ډېر کمپاینونه دي، دې ته ورته، په ۲۰۲۳ کال کې ۳ ملي، ۲ فرعي او ۴ ځانګړي کمپاینونه ترسره شوي دي.
هغه وویل: «یوازې واکسین کفایت نه کوي، تر څنګ یې باید پر روټین واکسینونو کار وشي، د حفظ الصحې رعایتولو لپاره باید امکانات برابر شي، ځکه ډېرې کورنۍ اوبو ته لاسرسی نه لري، د خوارځواکۍ مخنیوی باید وشي چې د غربت له امله ورځ تر بلې بد حالت ته روانه ده، دغه راز په لرو سیمو کې لومړنیو روغتیايي خدماتو ته د لاسرسي کچه ټیټه ده.»
د یادونې ده چې له دې مخکې د پولیو پنځه نورې پېښې هم د ننګرهار ولایت په بېلابېلو ولسوالیو کې ثبت شوې وې.
د پولیو د له منځه وړلو پروګرام جدي هڅې کوي چې په ختیځ زون کې د نورو لارو چارو تر څنګ د نظارت کچه لوړه کړي او ټول ماشومان د پولیو واکسین تر پوښښ لاندې راولي څو د پولیو ویروس د بقا او خوندي پاتې کېدو لپاره هیڅ تشه پاتې نه شي او په راتلونکې کې نور ماشومان په دې ناروغي اخته نه شي.
په پام کې ده چې په دې حوزه کې د سرتاسري او فرعي کمپاینونو تر څنګ نور اختصاصي او یا د پولیو د پېښو ځوابیه کمپاینونه هم پلي شي څو ژر تر ژره د دغه ویروس د لازیات خپرېدو مخه ونیول شي.
