د هېواد په بېلابېلو سیمو کې د پولیو/ ګوزڼ واکسین کمپاین پیل شو
کابل، افغانستان (۹ سلواغه ۱۴۰۲): د عامې روغتیا وزارت د نړیوالو ادارو په ملاتړ د ۲۰۲۴ز کال لپاره د پولیو واکسین لومړی فرعي کمپاین پیل کړ.
دغه کمپاین چې د هېواد په بېلابېلو سیمو کې پلی کېږي، په ترڅ کې به یې شاوخوا ۷.۵ میلیونه له پنځو کلونو د کم عمر ماشومان واکسین شي. دا کمپاین به د روان ۲۰۲۴ز کال د جنوري له ۲۹مې د فبروري تر لومړۍ نېټې پورې دوام وکړي.
د عامې روغتیا وزیر ډاکټر قلندر عباد ددغه کمپاین د پیل په مناسبت وویل: «موږ له نړیوالو ادارو سره په ګډه ژمن یو چې په ټول هېواد کې پولیو ناروغي له منځه یوسو.»
هغه زیاته کړه: «موږ باید شپه او ورځ کار وکړو او د پولیو واکسین د کمپاینونو ترڅنګ نورو بشپړوونکو روغتیايي خدمتونو ته دوام ورکړو څو په ټول هېواد کې د پولیو ناروغۍ ختمولو موخې ته ورسېږو.»
هغه همدارنګه څرګنده کړه: «د پولیو ناروغۍ ختمولو لپاره د والدینو، دینی علماوو او قومي مخورو په ګډون د ټولو افغانانو ملاتړ اړین دی. موږ له ټولو غوښتنه کوو چې له دې ناروغۍ سره په مبارزه کې خپل مسوولیت ترسره کړي او د خپلو ماشومانو روغتیا او خوندیتوب ته پاملرنه وکړي.»
پولیو یوه ویروسي ناروغي ده چې هیڅ درملنه نه لري او مخنیوی یې یواځي په واکسین سره شونی دی. پولیو ویروس د ماشومانو د دایمي ګوزڼ او یا هم مرګ سبب کېدای شي.
له پولیو ناروغۍ سره په مبارزه کې د ټولنې د ټولو وګړو ملاتړ مهم دی. والدین کولای شي د پولیو واکسین په ترڅ کې د خپلو ماشومانو په واکسینولو سره هغوی له دایمي ګوزڼ څخه خوندي کړي. قومي مخور کولای شي د خپلو سیمو خلک وهڅوي څو خپل ماشومان واکسین کړي او د پولیو واکسین له ټیمونو سره مرسته وکړي څو کمپاین په ښه توګه پلی شي.
