له پولیو سره په مبارزه کې د محمد کریم دلسوز ۲۰ کلن مزل
رحمت الله مرجانخېل
غزني، افغانستان (۲۵ غویی ۱۴۰۳) – د غزني ولایت د قره باغ ولسوالۍ اوسېدونکی شاوخوا ۵۵ کلن محمد کریم دلسوز له تېرو شلو کلونو راهیسې د پولیو له منځه وړلو پروګرام کې کار کوي.
هغه چې تر نیمه عالي کچې یې زده کړې کړې دي، د پولیو له منځه وړلو پروګرام کې یې دنده له رضاکارۍ پیل کړې او اوس د یوه کلسټر مشري په غاړه لري چې پنځه ټیمونه په کې فعالیت کوي.
نن د پولیو واکسین کمپاین دویمه ورځ ده، محمد کریم دلسوز د خپل کلسټر مرکز ته پر موټرسایکل تر نورو رضاکارانو مخکې را ورسېد، په بیړه جومات ته پورته شو، په بکسونو کې یې واکسین او نور اړین توکي ځای پر ځای کړل.
هغه نرۍ موسکا وکړه او ویې ویل، په ډېر شوق او ذوق خپله دنده مخ ته وړي.
ده زیاته کړه: «کلونه مخکې مې یوه ورځ په یوه ورځپاڼه کې د یوه پولیو ځپلي ماشوم کیسه ولوسته چې د هغه د ژوند دردونه او کړاونه په کې انځور شوي وو، دغې کیسې ډېر متاثر کړم، په هماغه ورځ مې هوډ وکړ چې د پولیو ناروغۍ پر وړاندې به مبارزه کوم او د هېواد ماشومان به له دغې وژونکې او فلجوونکې ناروغۍ ژغورم.»
د غزني ولایت د قره باغ ولسوالۍ اوسېدونکی شاوخوا ۵۵ کلن محمد کریم دلسوز له تېرو شلو کلونو راهیسې د پولیو له منځه وړلو پروګرام کې کار کوي © له پولیو خلاص افغانستان/۱۴۰۳/ رحمت الله مرجانخېل
د ده په خبره، له هغې ورځې را په دې خوا دا دی شل کلونه تېرېږي چې لا هم په خپل هوډ ولاړ دی او په دې برخه کې کار کوي او ګڼې لاسته راوړنې هم لري.
دلسوز زیاته کړه: «پوره لس کاله په هر ډول شرایطو کې د واکسین بکس پر اوږه کور په کور وګرځېدم، تر هر ماشوم پورې مې د پولیو واکسین ورساوه، وروسته د کلستر مشر شوم چې ۸۶۸ کورنۍ په کې شاملې دي، له نېکه مرغه د خپل مسوولیت په ساحه کې داسې کورنۍ نه لرو چې هغوی دې خپلو ماشومانو ته واکسین نه ورکوي.»
د نوموړي په وینا، د سیمې له خلکو سره ښه چلند او وخت په وخت د پولیو واکسین په اړه هغوی ته پوهای ورکول د دې لامل شوي چې د سیمې خلک د پولیو له رضاکارانو سره پوره همکاري وکړي څو له نوو زېږېدلو بیا تر پنځه کلنۍ خپلو ټولو ماشومانو ته د پولیو واکسین ورکړي.
هغه همدا د خپلې لاسته راوړنې په توګه یادوي او وايي د پخوا په پرتله د خلکو د پوهاوي کچه لوړه شوې او اوس ډېر وګړي د پولیو ناروغۍ په زیانونو او د پولیو واکسین په ګټو پوهېدلي دي.
دلسوز د پولیو واکسین د یوازینۍ وسیلې په توګه یاد کړ چې د دغې خطرناکې ناروغۍ مخنیوی کولای شي.
محمد کریم دلسوز وايي: «پوره لس کاله په هر ډول شرایطو کې د واکسین بکس پر اوږه کور په کور وګرځېدم، تر هر ماشوم پورې مې د پولیو واکسین ورساوه، وروسته د کلستر مشر شوم چې ۸۶۸ کورنۍ په کې شاملې دي، له نېکه مرغه د خپل مسوولیت په ساحه کې داسې کورنۍ نه لرو چې هغوی دې خپلو ماشومانو ته واکسین نه ورکوي.» © له پولیو خلاص افغانستان/۱۴۰۳/ رحمت الله مرجانخېل
د قره باغ ولسوالۍ اوسېدونکي له پولیو ناروغۍ سره په مبارزه کې د محمد کریم دلسوز هڅې ستايي او وايي، ټول خلک د هغه له کار او هڅو خوښ دي.
د دغې ولسوالۍ د خونیانو کلي اوسېدونکی ۳۱ کلن عصمت الله وايي، کلونه کېږي چې دلسوز د یوه ژمن او بامسوولیته کس په توګه د دغې ولسوالۍ تر سلګونو او زرګونو ماشومانو د پولیو واکسین رسولی دی.
هغه زیاته کړه، نوموړی توانېدلی چې د پنځو ټیمونو په مټ د یوه کلسټر څه باندې اته سوه کورنۍ د پولیو واکسین کمپاین تر پوښښ لاندې راوستلې دي.
د سیمې د اوسېدونکو تر څنګ رضاکاران هم محمد کریم د لسوز له کړنو خوښ دي او وايي د هغه زحمتونو او خورایو پایله ده چې خلک د واکسین په ارزښت پوهېدلي او د کورنۍ مشران په خوشحالۍ د خپلو ماشومانو واکسینولو ته حاضرېږي.
شاوخوا ۳۶ کلن شېر خان چې درې کاله کېږي له ډاکټر محمدکریم سره اوږه په اوږه د رضاکار په توګه کار کوي وویل، نوموړی د سیمې د کلستر د مشر په توګه له خلکو سره ښې اړیکې لري او په ډېر صمیمیت له خلکو سره مخامخ کېږي او هغوی ته د پولیو ناروغۍ زیانونه او د واکسین ګټې بیانوي.
نوموړی پر خلکو غږ کوي چې د پولیو ناروغۍ پر وړاندې له دوی سره ودرېږي څو له افغانستانه د پولیو ناروغي د تل لپاره ورکه شي.
