د پولیو یو قرباني: د لوړو زده کړو ونه مې ثمر ته و نه رسېدله
سعید زابلی
هلمند، افغانستان (۳ غبرګولی ۱۴۰۳) – د هلمند ولایت د لښکرګاه ښار اوسېدونکی ۳۳ کلن روښان احمد د پولیو ناروغۍ هغه قرباني دی چې د شپږو میاشتو په عمر یې دواړې پښې فلج شوې دي.
هغه چې لومړنۍ زدهکړې یې په ډېر کړاو تر دوولسم ټولګي رسولې دي، وايي د پولیو ناروغۍ په سبب د ور پېښ معلولیت او بد اقتصادي وضعیت له امله نور خپلو زدهکړو ته دوام نه شي ورکولای.
روښان احمد چې په څېره کې یې د ژوند سختۍ له ورایه ښکارېدې، زیاته کړه: «د پولیو ناروغۍ مې ژوند سخت ځپلی دی، په دواړو پښو یې معلول کړی یم، د همدغه معلولیت له امله له بد اقتصادي وضعیت سره مخ یم، نه لوړې زده کړې کولای شم او نه هم کار او روزګار راته پیدا کېږي.»
د ده په خبره، په خپله یې نه یادېږي خو مور یې ورته ویلي، د شپږو میاشتو و چې سخت ناروغ شو او تبې ورته پیدا شوې او وروسته یې دواړې پښې فلج شوې.
هغه په ډېر ارمان وویل: «د ماشومتوب دوره مې له حسرتونو ډکه وه، څوک چې په دواړو پښو معلول وي، بې لکړو تګ نه شي کولای، له خپلو همزولو سره لوبې نه شي کولای، هغه د ژوند څه خواږه لیدلي وي؟»
خو دی وايي، له دغو محرومیتونو سربېره یې ځان ته ډاډ ورکاوه چې په هیڅ حالت کې به له زده کړو مخ نه اړوي، بلکې د ښوونځي زدهکړې به بشپړوي، وروسته به طب پوهنځی لولي څو ډاکټر شي او د معلولینو تر څنګ ټولنې ته خدمت وکړي.
خو ده په ډېرې مایوسۍ وویل: «له بده مرغه دا ارمان مې نیمګړی پاتې شو او د لوړو زده کړو د هیلو ونه مې ثمر ته و نه رسېدله.»
د روښان احمد په خبره، د دوولسم ټولګي څخه له فارغېدو وروسته یې و نه کړای شول لوړې زده کړې وکړي، ځکه د کورنۍ اقتصادي وضعیت یې ښه نه دی او سپین ږیری پلار یې په ډېرې سختۍ یوازې د کورنۍ نفقه برابرولای شي.
دی زیاتوي، ډېره هڅه یې کړې چې ځان ته کار پيدا کړي څو اقتصاد یې ښه شي او زده کړې وکړې خو کار نه ورته پیدا کېږي.
خو دی باور لري چې د ده د ژوند د ټولو بدمرغیو سرچینه پولیو ناروغي ده چې دی یې دغه حال ته رسولی دی، که په ماشومتوب کې واکسین شوی وای نو د پولیو په ناروغۍ به نه اخته کېده او د اوس په څېر به د کورنۍ او ټولنې د اوږدو بار نه ګرځېده.
روښان احمد وايي، د ده د ژوند د ټولو بدمرغیو سرچینه پولیو ناروغي ده چې دی یې دغه حال ته رسولی دی، که په ماشومتوب کې واکسین شوی وای نو د پولیو په ناروغۍ به نه اخته کېده او د اوس په څېر به د کورنۍ او ټولنې د اوږدو بار نه ګرځېده © له پولیو خلاص افغانستان/ ۱۴۰۳/ سعید زابلی
نوموړی خپل سخت ژوند ته په کتو پر ټولو والدینو غږ کوي چې غفلت دې نه کوي، خپل ماشومان دې په وخت په پرله پسې ډول واکسین کړي څو له پولیو ناروغۍ و ژغورل شي او ژوند یې د ده په څېر تباه نه شي.
د روښان احمد همصنفي احمد شاه وویل، ملګري یې روښان احمد پوره دوولس کاله د لکړو په مرسته په ډېر کړاو ښوونځي ته راته، غیر حاضري یې نه کوله او هیله یې درلودله چې لوړې زده کړې وکړي او ډاکټر شي.
دی وايي، ټولو ټولګیوالو له نوموړي سره ځانګړې خواخوږي لرله، د ده پر حالت یې زړه سوځېده او د ده سخت ژوند ته په کتو به یې تل په هر ډول ناستو او مجلسونو کې له خلکو غوښتل چې خپل ماشومان واکسین کړي څو د روښان احمد په څېر د پولیو ناروغي ښکار نه شي.
په افغانستان غوندې جنګ ځپلي هېواد کې چې یو وخت د نا امنیو له کبله ډېرو سیمو ته د پولیو واکسین رضاکارانو رسیدګي نه شوای کولای، د دې ناروغۍ ریښې هم پراخې وې، اوس چې د هېواد هرې سیمې ته د پولیو واکسین کمپاین رسېدلی، ورسره د دې ناروغۍ د محوه کېدو ښه فرصت برابر شوی دی.
د عبدالله خان سایل په نامه یو ډاکټر وایي، پولیو یوه داسې ناروغي ده چې ماشومان په تلپاتي ګوزڼ اخته کوي، د اسلامي هېوادونو په ګډون په ټوله نړۍ کې دغه ناروغي د واکسین په وسیله له منځه وړل شوې خو افغانستان او پاکستان لا هم په دې برخه کې په مبارزه بوخت دي؛ دا زموږ دیني مسوولیت دی چې خپل ماشومان له پولیو ناروغۍ وژغورو.
نوموړی کورنیو ته په خپل پېغام کې وايي، پولیو درملنه نه لري خو یوازې د واکسین په وسیله له منځه وړل کېدای شي؛ راځئ د پولیو مخنیوی وکړو، افغانستان او نړۍ له دې ناروغۍ پاک کړو.
