یو رضاکار، یوه هیله: ګلاحمد قادري د پولیو د له منځه وړلو په هڅه کې
کابل، افغانستان (۱۳ لړم ۱۴۰۳) – د کابل د پغمان ولسوالۍ د بیکتوت کلي یو ځوان ګلاحمد قادري له تېرو پنځو کلونو راهیسې د پولیو واکسین په کمپاینونو کې د رضاکار په توګه دنده ترسره کوي.
هغه چې ۲۸ کاله عمر لري او د لسانس تر کچې یې زدهکړې کړې دي، په اخلاص او ژمنتیا د پولیو ناروغۍ پر ضد مبارزه کوي څو د خپلو کوچنیو هېوادوالو لپاره یو خوندي راتلونکی جوړ کړي.
نوموړی په لومړیو کې بېکاره او د دندې په لټه کې و، خو کله چې د پولیو واکسین کمپاین برخه شو نو له دغه کار سره یې خپل زړه وتاړه او دا یې خپل مهم مسوولیت وباله.
هغه وايي: «کله چې مې د پولیو واکسین په کمپاین کې د رضاکار په توګه دنده پیل کړه نو په لومړیو کې مې دغه کار ته د خپلو مالي ستونزو حلولو د یوې وسیلې په سترګه کتل خو وروسته پوه شوم چې دا یوازې دنده نه بلکې د هېواد د راتلونکي نسل د خوندي کولو لپاره مبارزه ده.»
دی زیاتوي، اوس یې یوازینۍ موخه دا ده چې د هېواد ماشومان له پولیو ناروغۍ څخه خوندي کړي او د دې لپاره ډېر زیار ګالي څو هیڅ ماشوم له واکسین څخه پاتې نه شي.
قادري وویل: «هر ځل چې هر ماشوم واکسینوم نو فکر کوم یو ژوند مې ژغورلی دی، زه نه غواړم چې زما د هېواد ماشومان د پولیو په ناروغۍ اخته او فلج شي، زه غواړم هغوی روغ ژوند وکړي، زدهکړې وکړي او خپلو هیلو ته ورسېږي.»
د کابل د پغمان ولسوالۍ د بیکتوت کلي یو ځوان ګلاحمد قادري له تېرو پنځو کلونو راهیسې د پولیو واکسین په کمپاینونو کې د رضاکار په توګه دنده ترسره کوي. © له پولیو خلاص افغانستان/ ۱۴۰۳/ هوسۍ احمدزۍ
نوموړي د خپل دغه احساس او ژمنتیا له مخې د سیمې په خلکو کې محبوبیت موندلی او همدا د دې لامل شوی چې خلک نه یوازې پر ده باور وکړي، بلکې په هر کمپاین کې له ده سره همکاري هم وکړي.
دی وايي، په ځینو کلیوالي سیمو کې خلک د ناسم پوهاوي له امله د پولیو واکسین په اړه شکونه او اندېښنې لري خو ده تل هڅه کړې ده د هغوی شکونه او اندېښنې لرې کړي.
هغه زیاتوي : «کله کله د کار پر مهال له داسې کورنیو سره مخ کېږم چې د هغوی چلند ډېر توند وي، هغوی په اصل کې د ناسمو معلوماتو ښکار شوي وي او فکر کوي د پولیو واکسین یې ماشومانو ته زیان اړوي خو کله چې له هغوی سره په وضاحت خبرې وکړم او رښتیني معلومات ورکړم نو بیا په ډېرې اسانۍ د خپلو ماشومانو واکسینولو ته حاضرېږي.»
د ده په خبره، د رضاکارۍ دنده ډېره حوصله غواړي: «د رضاکارانو په توګه باید موږ ډېر زغم ولرو، که خلک هر څومره مخالفت وکړي، موږ باید په درناوي هغوی ته حقایق ووایو، په دې ډول موږ کولای شو هغوی قانع کړو څو د خپلو ماشومانو د روغتیا لپاره مهمې پرېکړې وکړي.»
ګلاحمد قادري باور لري چې که د رضاکارانو هڅې او د کلیوالو همکاري همداسې دوام ولري، نو لرې نه ده چې افغانستان به له دې وژونکې ناروغۍ څخه خلاص شي. © له پولیو خلاص افغانستان/ ۱۴۰۳/ هوسۍ احمدزۍ
د سیمې د خلکو نظرونه
د بیکتوت کلي اوسېدونکي د پولیو واکسین د یوه رضاکار په توګه د ګل احمد قادري هڅې ستايي او وايي د هغه او د هغه نورو همکارانو هڅې د دې لامل شوې چې د دوی ماشومان له پولیو ناروغۍ څخه خوندي شي.
۳۵ کلن جمیل چې څلور ماشومان لري، وايي: «ګل احمد په اصل کې د کلي خدمتګار دی، د ماشومانو د روغتیا ساتلو خدمتګار، کله چې د پولیو واکسین کمپاین پیل شي نو خلک په بې صبرۍ د هغه راتګ ته انتظار باسي څو د هغوی ماشومان واکسین کړي.»
کریمالله کاکا چې د سیمې یو سپینږیری او د لسو لمسیانو نیکه دی، هم د ګلاحمد د رضاکارانه هڅو قدرداني کوي.
هغه وايي چې د ګلاحمد په شتون کې د خپلو لمسیانو له روغتیا ډاډه دی: «حتی که موږ په کور کې نه یو هم نو پوهېږو چې ګلاحمد به زموږ ماشومان واکسینوي، هغه ته د کلي ټول ماشومان د خپلې کورنۍ د غړو په څېر ګران دي، زما هیله دا ده چې نوموړی او نور رضاکاران خپل دغه خدمت ته دوام ورکړي څو د پولیو ناروغۍ له هېواده ورکه شي.»
یوه لاره او لویه هیله
ګلاحمد قادري باور لري چې که د رضاکارانو هڅې او د کلیوالو همکاري همداسې دوام ولري، نو لرې نه ده چې افغانستان به له دې وژونکې ناروغۍ څخه خلاص شي.
په ټوله کې قادري او د هغه په څېر په زرګونو رضاکاران نه یوازې د هېواد په ګوټ ګوټ کې د پولیو واکسین څاڅکي تر ماشومانو ته رسوي، بلکې ټولنې ته د خدمت بېلګې هم دي.
هوسۍ احمدزۍ، له پولیو خلاص افغانستان
