ناجیه علیمي او د پولیو له منځه وړلو لپاره د هغې هڅې
کندز، افغانستان (۵ لېندۍ ۱۴۰۳) – د ناجیې علیمي په نوم واکسیناتوره د کندز ښار د لومړۍ ناحیې له دوړو په ډکو کوڅو کې په په ټینګه اراده او صمیمانه موسکا سره خپل حیاتي ماموریت پر مخ وړي: د پولیو له فلجوونکي ویروس څخه د ماشومانو د راتلونکي ساتنه.
هغه چې تور حجاب یې اغوستی او د واکسین بکس یې اوږې ته اچولی، هره ورځ د زړې منډویي سیمې ته ځي څو ماشومان واکسین کړي او له پولیو ناروغۍ څخه یې وژغوري.
د ماشومانو له روغتیا سره مینه: له درسونو تر عمل
ناجیه چې په کندز کې یې د احمد شاه بابا انسټیټیوټ د قابلهګۍ په څانګه کې زده کړې کړې دي، وایي له ډېر پخوا یې هیله درلوده چې د ناروغیو، په ځانګړي ډول د ګوزڼ ناروغۍ د مخنیوي لپاره کار وکړي.
هغې زیاته کړه: “زموږ استادانو تل ویل چې وقایه له درملنې غوره ده، همدې جملې زما د ژوند لوری بدل کړ.”
له ناجیې سره یوه کاري ورځ
ناجیه د لمر له راختو مخکې خپل ماموریت پیلوي. هغه په دې باور ده چې سهار وختي د کورنیو د مشرانو د لیدلو لپاره غوره وخت دی، ځکه اکثره میندې او پلرونه همدا وخت په خپلو کورونو کې وي.
دا د لومړي کور دروازې ته ځان رسوي او په درناوي دروازه ټکوي. یوه مور چې ماشوم یې په غېږ کې دی، دروازه خلاصوي. ناجیه په موسکا ورته وایي: “د پولیو واکسین کولای شي ستاسې ماشوم له فلج کېدو څخه وژغوري. دا څاڅکي نه یوازې د هغه روغتیا خوندي کوي، بلکې د ټولنې راتلونکی هم ساتي.”
دغه مور چې په لومړي سر کې شکمنه ښکارېده، د ناجیې له ارامو او قانع کوونکو خبرو وروسته نرمېږي او خپلې دوه کلنې لور د واکسینولو اجازه ورکوي.
د ناجیې علیمي په نوم واکسیناتوره د کندز ښار د لومړۍ ناحیې له دوړو په ډکو کوڅو کې په په ټینګه اراده او صمیمانه موسکا سره خپل حیاتي ماموریت پر مخ وړي: د پولیو له فلجوونکي ویروس څخه د ماشومانو د راتلونکي ساتنه. © له پولیو خلاص افغانستان/۱۴۰۳/ رقیبه حمیدی
لاسته راوړنې او له پولیو څخه د خلاصې ټولنې هیله
د کندز په کوڅو کې کار کول له ستونزو خالي نه دی. ناجیه د خلکو د غلطو باورونو او شته اوازو په اړه وایي:
“ځینې کورنۍ د پولیو واکسین ردوي، زه اړه کېږم څو څو ځله هغوی ته ورشم او خبرې ورسره کړم.”
هغې د سختو اقلیمي شرایطو یادونه هم وکړه چې کله ناکله یې ماموریت ستونزمنوي، خو له ماشومانو سره مینه او د هغوی روغتیا ته ژمنتیا هغې ته د دې لارې د دوام ځواک ورکوي.
ناجیه په ویاړ د خپلو درې کلنو هڅو یادونه کوي او وایي: “تر دې دمه مې سلګونه ماشومان واکسین کړي او له شلو زیاتې کورنۍ مې د واکسین کولو په اهمیت پوهولې دي، هر ځل چې وینم یو بل ماشوم هم نور له پولیو خوندي دی، نو احساس کوم چې د خپلې ټولنې لپاره مې یو کوچنی خو اغېزناک ګام اخیستی دی.”
میندو او پلرونو ته د ناجیې پیغام ساده خو ژور دی: “د پولیو واکسین د ماشومانو روغتیا تضمینوي، راځئ په ګډه کار وکړو څو هیڅ ماشوم د روغتیا له نعمت څخه محروم پاتې نه شي.”
د والدینو او دیني عالمانو روایت
د ناجیې هڅې یوازې ماشومانو ته واکسین تر ورکولو محدودې نه دي، هغې د کورنیو د ذهنیت بدلون، د واکسین پر وړاندې د منفي انګېرنو کمولو او د ټولنې د باور په ترلاسه کولو کې کلیدي رول لوبولی دی.
د غلام ګل په نوم د کندز ښار اوسېدونکی وایي: “پخوا مې فکر کاوه چې د پولیو واکسین ګټه نه لري، خو کله چې ناجیې په حوصله زما پوښتنې او اندېښنې ځواب کړې، زما نظر بدل شو؛ اوس خپل ماشوم په ډاډ سره واکسین کوم.”
د زینب په نوم یوه مور چې درې تنه له پنځو کلونو د کم عمر ماشومان لري، وایي: “د ناسمو معلوماتو له امله مې ماشومان نه واکسینول، خو ناجیې په حوصله مندۍ رښتیني معلومات راکړل او زه یې قانع کړم، اوس پوهېږم چې واکسین د ماشومانو د روغتیا لپاره اړین دی.”
مولوي عبدالله، چې یو دیني عالم دی او د پولیو واکسین ملاتړ کوي، وایي: “ناجیې موږ وپوهولو چې د پولیو واکسین زیان نه لري، د اسلام له نظره هم دا کار کومه ستونزه نه لري، بلکې یوه انساني او اسلامي دنده ده.”
د کندز نوم ورکې اتله
ناجیه علیمي د خپلې ژمنتیا او زړورتیا لاه لارې په ټولنه کې مهم بدلونونه راولي.
هغه نه یوازې د ناسمو انګېرنو پر وړاندې ولاړه ده، بلکې د علم، دین، او ټولنې د اړتیاوو تر منځ یو پل دی. د هغې هڅې ښیي چې ان کوچني اقدامات د یوې ټولنې پر راتلونکي لوی اغېز لرلای شي.
دا خاموشه اتله هیله لري چې یوه ورځ ټولنه د پولیو ناروغۍ له ګواښ څخه خلاصه شي او هیڅ ماشوم نور له فلج کېدو و نه ځورېږي.
رقیبه حمیدي، له پولیو خلاص افغانستان
