د عایشې هڅې چې د پولیو واکسین په تطبیقولو د ماشومانو راتلونکی روښانه کوي
رقیبه حمیدی
بدخشان، افغانستان (۵ غبرګولی ۱۴۰۳) – پنځه ویشت کلنه عایشه یعقوبي یوه له سابقه لرونکو رضاکارانو ده چې د بدخشان ولایت په مرکز فیض اباد ښار کې دنده ترسره کوي.
هغې چې د شورابک د نجونو له لیسې فارغه شوې او وروسته یې په شفا خصوصي انسټیوټ کې د قابلهګۍ په برخه کې زده کړې کړې، له تېرو ۱۱ کلونو راهیسې د پولیو واکسین کمپاین د رضاکارې په توګه کار کوي.
هغه د کمپاین په ورځو کې هر سهار اته بجې له کوره را وځي او د مازدیګر تر څلورو بجو د خپل مسوولیت په ساحه کې کور په کور ګرځي څو ماشومانو ته د پولیو واکسین ورکړي.
د هغې د مسوولیت ساحه د فقیر اباد ګذر اړوند نوی ښار دی چې د ورځې تر ۱۲۰ ماشومان واکسینوي.
عایشه وايي، د لارې په اوږدو کې ماشومان د شا له خوا نارې ورپسې وهي چې واکسیناتورې خاله موږ ته واکسین راکړه.
عایشه یعقوبي په زانګو کې پروت یوه ماشوم ته واکسین ورکوي © له پولیو خلاص افغانستان /۳۰۴۱/ رقیبه حمیدی
هغې چې واده یې کړی او دوه ماشومان لري، د کمپاین په ورځو کې خپل ماشومان خپلې خور هدیې ته پرېږدي او دا د پولیو ناروغۍ څخه د ماشومانو د ژغورلو په نیت له کوره وځي.
هغې زیاته کړه، د رضاکارۍ د تېرو یوولسو کالو خدمت مهمه لاس ته راوړنه یې دا ده چې شاوخوا ۱۵ داسې کورنۍ یې د خپل ماشومانو واکسینولو ته قانع کړي چې د ناسمو معلوماتو ښکار شوي وو او نه یې غوښتل ماشومان یې واکسین شي.
دا وايي: «کله چې له انکارۍ کورنیو سره مخ کېږي نو په ډېرې مهربانۍ ورته ويي چې ګرانې خورې او ګران وروره؛ ټولنه ستاسې ماشومانو ته اړتیا لري، د واکسین په ورکولو نه یوازې هغوی له پولیو ناروغۍ ژغورئ بلکې راتلونکی یې هم روښانه کوئ.»
عایشه وايي، د لارې په اوږدو کې ماشومان د شا له خوا نارې ورپسې وهي چې واکسیناتورې خاله موږ ته واکسین راکړه © له پولیو خلاص افغانستان /۳۰۴۱/ رقیبه حمیدي
هغې چې یوه ماشوم ته یې واکسین ورکاوه، وویل د دې او د دې د سلګونو همکارانو پر له پسې هڅې د دې لامل شوې چې له ۲۰۲۰ کال راهیسې په بدخشان کې د پولیو یوه پېښه هم ثبت نه شي.
دا وايي: «لویه هیله مې له ګران هېواد څخه د پولیو ویروس ورکېدل دي، غواړم د ژوند تر وروستیو د پولیو ناروغۍ پر وړاند مبارزه وکړم.»
د عایشې په خبره، د نړۍ په ټولو هېوادونو کې د پولیو ویروس د واکسین په وسیله له منځه وړل شوی، دا د ټولو کورنیو دیني وجیبه ده چې له رضاکارانو سره مرسته وکړي څو په افغانستان کې هم د واکسین په تطبیقولو سره د پولیو ناروغي له منځه لاړه شي.
د فیض اباد ښار د څلورمې ناحیې اوسېدونکی پنځه پنځوس کل اغا ګل وايي، ډېر پخوا چې د پولیو واکسین اسانتیاوې نه وې، ډېرو ماشومانو د دغې ناروغۍ له امله یا ژوند له لاسه ورکاوه او یا هم د عمر تر پایه معلول کېدل خو ننني ماشومان بختور دي چې د هغوی په زمانه کې واکسین شته او مخکې له دې چې په دې خطرناکه ناروغي اخته شي د واکسین په وسیله وقایه شي.
نوموړی له کورنیو غوښتنه کوي څو خپل له پنځو کلونو د کم عمر ماشومانو ته د پولیو ناروغۍ ضد واکسین ورکړي چې په دې کار سره له یوې خوا هغوی له دغې ناروغۍ خوندي کوي او له بلې خوا له هېواد د دغه خطرناک واکسین په له منځه وړلو کې هم مرسته کوي.
عایشه یعوبي وايي، د رضاکارۍ د تېرو یوولسو کالو خدمت مهمه لاس ته راوړنه یې دا ده چې شاوخوا ۱۵ داسې کورنۍ یې د خپل ماشومانو واکسینولو ته قانع کړي چې د ناسمو معلوماتو ښکار شوي وو او نه یې غوښتل ماشومان یې واکسین شي © له پولیو خلاص افغانستان /۳۰۴۱/ رقیبه حمیدي
۳۰ کلنه عالیه چې د یوې څلورنیم کلنې لور او لس میاشتني زوی مور ده، وايي خاوند یې میرویس د واکسین مخالف دی، ما ته وايي، کله چې واکسیناتوران راځي نو ورته وایه چې کوچني ماشومان نه لرو، خو زه د هغه په غیاب کې د رضاکارانو په مرسته خپل ماشومان واکسینوم.
هغې په مسکۍ څېره وویل، کلونه کېږي چې په بدخشان کې د پولیو مثبته پېښه نه ده لیدل شوې او په ټوله کې افغانستان د پولیو له منځه وړلو په برخه کې د پام وړ پرمختګ کړی دی.
دې زیاته کړه، دغه لاسته راوړنه په ځانګړې توګه د بدخشان په څېر له لرې ولایت کې د ښځینه رضاکارو ټیمونو د زحمتونو او کورنیو د همکارۍ نتیجه ده.
عالیه له کورنیو په ځانګړې توګه له پلرونو غواړي چې د خپلو معصومو ماشومانو په واکسنیولو له رضاکارانو سره همکاري وکړي.
