په شاجوی کې د ماشومانو د ګوزڼ د مخنیوي لپاره د دوو ځوانانو هڅې
زابل، افغانستان (۵ لېندۍ ۱۴۰۳) – د زابل ولایت د شاجوی ولسوالۍ اوسېدونکي نثار احمد او حکمت الله د پولیو واکسین کمپاینونو هغه دوه ځوان رضاکاران دي چې ځانونه یې د ماشومانو روغتیا او خوندیتوب ته وقف کړي دي.
هغوی نه یوازې د خپلې سیمې تر هر ماشوم پورې د پولیو واکسین رسوي، بلکې به دې تړاو په ټولنه کې د شته ناسمو باورونو د له منځه وړلو او پوهاوي خپرولو لپاره هم هڅې کوي.
د ماشومانو واکسینول او د خلکو د ذهنیتونو روښانه کول، څنګ په څنګ
نثار احمد چې له تېرو پنځو کلونو راهیسې یې د پولیو واکسین په کمپاینونو کې د یوه رضاکار په توګه فعاله برخه اخیستې وايي، د ده دنده یوازې د ماشومانو تر واکسینولو محدوده نه ده بلکې تل یې د خلکو د ذهنیتونو د روښانه کولو هڅه هم کړې ده.
دی زیاتوي: «د ټولنې ډېره برخه وګړي نالوستي دي او د پولیو ناروغۍ له خطرونو او د واکسین له ارزښت څخه خبر نه دي، ما تل هڅه کړې په ساده ټکیو هغوی ته پوهاوی ورکړم څو د دې ناروغۍ پر وړاندې خپل ماشومان واکسین کړي.»
د نثار احمد همکار حکمت الله هم وايي: «ځینې کورنۍ د دودیزو باورونو او ناسمو معلوماتو له مخې د خپلو ماشومانو له واکسینولو انکار کوي، خو موږ د دیني عالمانو او سیمهییزو مشرانو په همکاري له هغوی سره خبرې کوو او هغوی ته ښیوو چې د پولیو پر وړاندې د ماشومانو واکسینول یو انتخاب نه، بلکه اړین عمل دی.»
هغه زیاتوي، له دې تګلارې په کار اخیستو یې ډېرې کورنۍ د پولیو واکسین په ارزښت پوهولې او اوس په منظم ډول خپل ماشومان واکسینوي.
د یوه پلار قانع کول
نثار احمد او حکمت الله د خپلو لاسته راوړنو په لړ کې د هغه پلار کیسه کوي چې د خپلو ماشومانو له واکسینولو څخه یې انکار کاوه.
د الله داد په نوم د پنځو ماشومانو دغه پلار د پولیو واکسین په اړه اندېښنې لرلې، هغه اورېدلي وو چې ګواکې دغه واکسین د ماشومانو روغتیا زیانمنوي.
خو نثار احمد او حکمت الله په صبر او حوصله د هغه اندېښنې واورېدې او وروسته یې هغه ته علمي دلایل وړاندې کړل چې د پولیو واکسین ماشومان له تلپاتي فلج څخه ژغوري، د هغوی د بدن معافیت لوړوي او د ټولنې د روغتیا په ساتنه کې مرسته کوي.
نثار احمد وايي، کله چې یې د الله داد ذهن پرانیست او هغه خپله پرېکړه بدله کړه نو داسې احساس یې وکړ چې خپلې موخې (له پولیو خلاص افغانستان) ته یو ګام نور هم نژدې شوی وي.
په دې اړه پخپله الله داد، وايي: «لومړی مې فکر کاوه چې د پولیو واکسین خطرناک دی او ماشومانو ته ښه نه دی، خو دغو واکسیناتورانو زه وپوهولم چې زما شک بې ځایه دی، اوس نه یوازې خپل ماشومان په منظم ډول واکسینوم بلکې نورو ته هم د دغه مهم کار سپارښتنه کوم.»
یو روښانه پیغام
د زابل په شاجوی ولسوالۍ کې د نثار احمد او حکمت الله د هڅو په پایله کې د خلکو ذهنیتونه د پام وړ بدل شوي او تر پخوا ډېر د خپلو اولادونو روغتیا او خوندیتوب ته متوجه شوي دي.
هغوی اوس پوهېدلي چې واکسین د پولیو له خطرناک ویروس څخه د ماشومانو د خوندیتوب یوازینۍ وسیله ده چې په نړۍ کې یې د ماشومانو د فلجېدو او مړینې پېښې په بې سارې توګه راټیټې کړې دي.
د نثار احمد او حکمت الله کیسه موږ ته دا درس راکوي چې د هر فرد هڅې، که هر څومره کوچنۍ ښکاره شي، د یوې ټولنې د مثبت بدلون لپاره لوی ارزښت لري.
د هغوی هڅې موږ ته دا پیغام هم راکوي چې هر ماشوم د روغتیا حق لري، او دا زموږ دنده ده چې د هغوی له دغه حق څخه دفاع وکړو.
د شاجوی ولسوالۍ هر ماشوم چې د واکسین په مرسته له پولیو ناروغۍ څخه خوندي کېږي، د یوې بریا نښه ده، دا بریاوې باید دوام وکړي څو یوه ورځ د هېواد ټول ماشومان د پولیو له خطره ازاد ژوند وکړي.
سعید زابلی، له پولیو خلاص افغانستان
