پولیو ناروغۍ د یوه ماشوم او د هغه د کورنۍ دواړو ژوند تریخ کړی دی
هوسۍ احمدزۍ
کابل، افغانستان (۳۰ وری ۱۴۰۳) – د ماشومان روغتیا ته نه پاملرنه او په وخت نه واکسینول د ماشوم او کورنۍ دواړو ژوند تریخولای شي چې یوه بېلګه یې د کابل د خاکجبار ولسوالۍ د اوسېدونکي عین الله کورنۍ ده.
عین الله چې ۲۹ کاله عمر لري، نهه کلن زوی یې رحمت الله د پولیو په ناروغي اخته شوی او د هغه لاسونه او پښې یې له حرکته پاتې کړي دي.
نوموړی وايي، په داسې حال کې چې له کلونو راهیسې له غربت او اقتصادي ستونزو کړېږي خو د پولیو په ناروغۍ اخته زوی یې ژوند لا پسې تریخ کړی دی.
د ده په خبره، ټول پنځه اولادونه لري چې له جملې یې همدا مشر زوی د پولیو ناروغۍ ځپلی او د کورنۍ د اوږو بار ګرځولی دی.
عین الله د پولیو په ناروغۍ د خپل زوی د اخته کېدو کیسه داسې وکړه: «کلونه مخکې زموږ کور د خاکجبار ولسوالۍ په یوه لرې سیمه کې و، هغه وخت ناامني وه، کله به د پولیو واکسین کمپاین ترسره کېده او کله به نه ترسره کېده، خو موږ هم د خپل زوی روغتیا ته پام نه کاوه چې په منظم ډول یې واکسین کړو، هماغه و چې مشر زوی مې رحمت الله په څلور کلنۍ کې د پولیو په ناروغي اخته شو.»
هغه زیاته کړه، زوی یې پر له پسې څو ورځې سختې تبې درلودې، کله چې یې ډاکټر ته د درملنې لپاره بوت نو هغه له معاینې وروسته ورته وویل چې له بده مرغه زوی یې د پولیو په ناروغي اخته شوی او درملنه یې ناشونې ده.
نوموړی له دې خبرې سره ماضي ته لاړ او له لږ ځنډ وروسته یې وویل: «هغه ورځ د قیامت په څېر راباندې تېره شوه او ډېر مې وژړل.»
نهه کلن رحمت الله چې په څلور کلنۍ کې د پولیو په ناروغي اخته شوی او دې ناروغۍ یې دواړه لاسونه او دواړې پښې فلج کړې دي © له پولیو خلاص افغانستان/ ۱۴۰۳/ هوسۍ احمدزۍ
د ده په خبره، له تېرو پنځو کلونو راهیسې یې زوی په بستر پروت دی چې هم یې د ده او هم یې د کورنۍ د نورو غړو ژوند تریخ کړی دی.
هغه وویل: «زوی مې رحمت الله ګرځېدای نه شي، لوبې نه شي کولای، ان د ضرورت رفع کولو لپاره هم د بل چا همکارۍ ته اړ دی چې دا ټولې چارې یې مور ترسره کوي خو زه دې ته خپه یم که هغه لوی شي نو څه به کوي؟»
د یاد شوي ماشوم پلار خپل وضعیت ته په کتو له والدینو غوښتنه کوي چې هیڅکله دې د خپلو اولادونو د روغتیا په برخه کې غفلت نه کوي بلکې خپلو اولادونو ته دې د ماشومتوب په دوره د پولیو په ګډون د ټولو ناروغیو واکسین ورکړي څو روغ پاتې شي او د ده د زوی په څېر د کورنۍ او ټولنې د اوږو بار نه شي.
د پولیو ځپلي رحمت الله مور ګل بي بي هم وايي، د زوی ناروغي او حالت یې سخته ځوروي خو هیڅ نه شي کولای.
هغې زیاته کړه: «د یوې مور په توګه چې کله د خپل زوی سخت ژوند ته ګورم نو سخت کړاو ګالم، ځکه د پولیو ناروغۍ هغه دومره سخت ځپلی دی چې له خوراک او څښاک نیولې بیا تشناب تر تګ پورې په ټولو کارونو کې زما مرستې ته اړ دی.»
دا وايي چې که پوهېدای چې زوی یې په داسې خطرناکه ناروغي اخته کېږي نو کیلومترونه لرې به یې هم د واکسینولو لپاره بېولی وای، خو اوس پښېماني ګټه نه لري.
د دې په خبره کله چې یې زوی نور ماشومان د لوبو په حال کې ویني نو په یو ډول معصومانه انداز ور ګوري او ورته خاندي خو د هغه خندا بیا دا سخته دردوي او د بې وسي یو ناوړه احساس ورکوي.
ګل بي بي پر مېندو غږ کوي چې د خپلو ماشومانو روغتیا ته جدي پام وکړي او منظم ډول یې واکسین کړي څو د دې د زوی په څېر د پولیو په ناروغي اخته نه شي.
دا وايي: «هیڅ مور او پلار دې خپلو ماشومانو ته د واکسین په تطبیق کې ناغېړي نه کوي، که خدا مه کړه ماشوم یې د پولیو په ناروغي اخته شي نو هیڅکله به د ژوند له خوږو خوند و انخلي او ټول عمر به په خپګان کې تېروي.»
د روغتیا برخې پوهان وايي، پولیو ناروغي درملنه نه لري او یوازې د واکسین په وسیله د مخنیوي وړ ده.
یو له دغو کسانو ډاکټر محمد نصیر درانی دی چې وايي، د پولیو او بلې هرې ناروغۍ واکسین د ماشومانو د سالم راتلونکي لپاره حیاتي ارزښت لري، په کار ده هره کورنۍ خپل ماشومان په منظم ډول واکسین کړي څو له پولیو او نورو ناروغیو خوندي پاتې شي.
