د پولیو واکسین په تطبیق کې د خلکو همکاري ډېره شوې ده
رحمت الله مرجانخېل
غزني، افغانستان (۳۰ وږی ۱۴۰۳) – غزني کې روغتیايي چارواکي وايي، د پولیو واکسین کمپاینونو په غوره تطبیق کې د پخوا په پرتله د خلکو همکاري ډېره شوې ده.
د معلوماتو له مخې پخوا به د دغه ولایت په مرکز او ولسوالیو کې زرګونه ماشومان د پولیو واکسین له پوښښ څخه پاتې کېدل خو اوس دا کچه د خلکو په همکاري د پام وړ راټیټه شوې ده.
د دغه ولایت د کتلوي معافیت امر ډاکټر بصیر احمد ثابت وايي، غزني ټولټال ۱۹ ولسوالۍ لري چې په دې وروستیو کې د خلکو په همکاري په کې د پولیو واکسین په یوه وخت په ډېر ښه ډول ترسره کېږی.
هغه زیاتوي، له دیني عالمانو، قومي مشرانو او عامو خلکو سره وخت په وخت ناستې کوي څو د پولیو ناروغۍ د زیانونو او واکسین د ارزښت په تړاو د هغوی د پوهاوي کچه لوړه شي.
د ده په خبره، د پخوا په پرتله د خلکو د پوهاوي کچه لوړه شوې چې په پایله کې یې د پولیو واکسین کمپاینونو د تطبیق کیفیت ښه شوی دی.
دی وايي: «پخوا د یو لړ ناسمو باورونو او معلوماتو له امله د خلکو همکاري کمه وه، خو اوس د هغوی د پوهاوي کچه لوړه شوې، چې له مخې یې اوس د پولیو واکسین کمپاین له کارکوونکو سره د هغوی همکاري ډېره شوې او د واکسیناسیون د پوښښ ساحه پراخه شوې ده.»
ثابت دغه راز یاته کړه چې روغتیايي مسوولین په بشپړ یووالي په ښار او ولسوالیو کې خلکو ته روغتیايي خدمات وړاندې کوي، ټولو ساحو ته یې په وخت رسېدنه کړې ده او د پولیو واکسین کمپاینونه یې په بریالیتوب عملي کړي دي.
ده یادونه وکړه چې اړوند مسوولین ژمن دي چې له دې وروسته هم خلکو ته د عامې روغتیا وزارت تر چتر لاندې غوره روغتیايي خدمات وړاندې کړي.
د معلوماتو له مخې پخوا به د دغه ولایت په مرکز او ولسوالیو کې زرګونه ماشومان د پولیو واکسین له پوښښ څخه پاتې کېدل خو اوس دا کچه د خلکو په همکاري د پام وړ راټیټه شوې ده © له پولیو خلاص افغانستان/ ۱۴۰۳/ رحمت الله مرجانخېل
په ورته وخت کې، په غزني کې د اطلاعاتو او فرهنګ ریاست د اطلاعاتو آمر، مولوي عبدالله منصور هم وایي چې د دیني عالمانو په مرسته د پولیو واکسین په تړاو د خلکو پوهاوی ډېر شوی دی.
هغه زیاتوي: «د پولیو واکسین په تطبیق کې هیڅ ستونزه نشته، خلک د پولیو واکسین په هر کمپاین کې په ډېرې خوښۍ حاضرېږي چې خپل ماشومان واکسین کړي.»
د غزني د قره باغ ولسوالۍ اوسېدونکې، ۳۲ کلنه شکریه وایي، په دې وروستیو کې د پخوا په پرتله د پولیو واکسی اهمیت ته د ډېرو کورنیو پام ور اوښتی دی.
هغه زیاتوي: «په تېرو کلونو کې له بده مرغه په هېواد کې جګړه وه، دغه راز ځینې منفي تبلیغات هم کېدل چې خلک یې په شک او تردید کې اچولي وو او تر ډېره یې د خپلو ماشومانو له واکسینولو ډډه کوله، خو اوس وضعیت بدل شوی او خلک د پولیو واکسین په ارزښت پوهېدلي دي.»
دا وايي، د څو تنو ماشومانو د مور په توګه خوشحاله ده چې کورنۍ اوس د خپلو ماشومانو روغتیا ته پام کوي او هغوی ته د نورو واکسینونو تر څنګ د پولیو واکسین هم ورکوي څو له دې خطرناکې ناروغۍ څخه وژغورل شي.
د پولیو واکسین کمپاین اړوند د یوه کلسټر سوپروایزر، احمد احمدي، هم وایي چې په دې وروستیو کې د کمپاین له رضاکارانو سره د خلکو همکاري ډېره شوې ده.
هغه زیاتوي: «که د خلکو همدا همکاري دوام وکړي، زه ډاډه یم چې یو وخت به زموږ ټولنه له پولیو ناروغۍ څخه خلاصه شي.»
د روغتیايي چارو کتونکي باور لري چې د پولیو خطرناکې ناروغۍ د له منځه وړلو په برخه کې د خلکو همکاري اساسي رول لري، ځکه د واکسین کمپاینونو بریا په ټولنیز ملاتړ او پوهاوي پورې تړلې ده.
د سیمې د اوسېدونکو، دیني عالمانو او روغتیایي کارکوونکو ګډه همکاري نه یوازې د ماشومانو د خوندیتوب سبب ګرځي، بلکې د ټولنې د روغتیايي وضعیت د ښه والي لپاره هم مهم ګام دی.
