په روغتون کې زېږون؛ له پولیو او نورو ناروغیو څخه د خوندیتوب اغېزناکه تګلاره
رحمت الله مرجانخېل
غزني، افغانستان (۲ تله ۱۴۰۳) – روغتیاپالان وايي، په روغتونونو کې د ماشومانو زېږون له پولیو او نورو خطرناکو ناروغیو څخه د هغوی په خوندیتوب او روغتیا کې مثبت اغېز لري.
دوی ټینګار کوي چې کورنۍ باید مېندوارې مېرمنې روغتونونو ته بوځي څو ماشومان یې له زېږون سره سم د پولیو او نورو ساري ناروغیو پر وړاندې واکسین شي.
په غزني کې د ماشومانو د ناروغیو متخصص ډاکټر میرویس صحرايي چې د دغه ولایت په ملکي روغتون کې دنده لري وايي، د کورونو پر ځای په روغتونونو کې د مېرمنو ولادت نه یوازې د مېندو بلکې د هغوی زېږېدونکو ماشومانو د روغتیا او خوندیتوب په موخه لپاره مهم اقدام دی.
هغه زیاته کړه، په روغتون کې ماشوم ته له زېږون سره سم د پولیو او نورو خطرناکو ناروغیو لکه شري، نري رنځ، تور ژیړي، تیتانوس او نورو واکسین تطبیق کېږي او یو ځانګړی کارت ورکول کېږي څو له مخې یې د واکسین پاتې پړاوونه تعقیب شي.
نوموړی پر کورنیو غږ کوي چې مېندې دې د ولادت لپاره روغتونونو ته بوځي، ځکه دا چاره د مور او ماشوم دواړو د روغتیاو اوخوندیتوب لپاره مهمه ده.
دی اندېښنه ښيي چې په لرې سیمو کې لا هم یو شمېر مېندې د روغتونو پر ځای په کورونو کې ولادت کوي چې له واکسینونو او په دې تړاو له عامه پوهاوي بې برخې پاتې کېږي.
روغتیاپالان وايي، په روغتونونو کې د ماشومانو زېږون له پولیو او نورو خطرناکو ناروغیو څخه د هغوی په خوندیتوب او روغتیا کې مثبت اغېز لري © له پولیو خلاص افغانستان/ ۱۴۰۳/ رحمت الله مرجانخېل
د غزني په دولتي او نادولتي ټولو روغتونونو کې مسلکي قابلې شته چې چې د ماشومانو د زېږون پر مهال له مېندو سره همکاري کوي.
صحرايي وايي، کورنۍ باید له دغو اسانتیاوو ګټه واخلي، په کورونو کې دې له ولادتونو ډډه وکړي او په داسې کولو دې د مېندو او نوو زېږېدو ماشومانو ژوند له ګواښ سره نه مخ کوي.
د غزني د اندړو ولسوالۍ دیني عالم مولوي شیرین احمد وایي چې د پولیو په ګډون د ساري ناروغیو د مخنیوي ټول واکسینونه هیڅ ډول تاوان نه لري، بلکې یوازې او یوازې د ماشومانو د خوندیتوب او روغتیا لپاره دي.
هغه زیاته کړه، په اسلام کې د ژوند ساتنه یو اساسي اصل دی، او هر هغه اقدام چې د ژوند ساتنې لپاره وشي، د شریعت له مخې ارزښت لري.
د ده په وینا، واکسین د وقایې یوه لاره ده چې د خطرناکو او وژونکو ناروغیو لکه پولیو څخه مخنیوی کوي.
پولیو یوه خطرناکه ناروغي ده چې ماشومان د تل لپاره فلج کولای شي، دا ناروغي درملنه نه لري خو د واکسین په وسیله د مخنیوي وړ ده.
عام باور دا دی چې د پولیو له منځه وړلو لپاره ولسي ملاتړ ضروري دی.
روغتیاپالان او دیني عالمان ټینګار کوي چې کورنۍ باید د پولیو واکسین په کمپاینونو کې فعاله ونډه واخلي، که د هغوی ماشومان له واکسین څخه پاتې کېږي، باید نژدې کلینیک ته یې بوځي څو د پولیو دوه څاڅکي واکسین ورکړل شي.
افغانستان د نړۍ له هغو دوو هېوادونو یو دی چې د پولیو ویروس د ماشومانو ژوند ګواښي، په همدغه بنسټ دا ډېره مهمه ده چې د دغې خطرناکې ناروغۍ د له منځه وړلو لپاره له ټولو ممکنه لارو چارو کار واخیستل شي.
