هغه رنځ چې مخنیوی یې کېدای شوای؛ د سردار محمد د ژوند دردوونکې کیسه
کندهار، افغانستان (۲۸ لړم ۱۴۰۳) – د کندهار د ارغنداب ولسوالۍ ۳۸ کلن اوسېدونکی سردار محمد په دردمن انداز د خپل ماشومتوب کیسه کوي چې له پولیو له واکسین څخه بې برخې شو.
د دغه غفلت پایله دا شوه چې هغه په شپږ کلنۍ کې د پولیو په ناروغي اخته شو، له همدې امله یې ښۍ پښه فلج شوه او د تل لپاره یې پر خپلو پښو د ګرځېدو توان له لاسه ورکړ.
سردار محمد د خپل مور او پلار له خولې کیسې ته دوام ورکوي او وايي: «هغه مهال په سیمه کې سختې جګړې وې چې له امله یې زما کورنۍ و نه توانېده ما واکسین کړي، له همدې امله زه د پولیو په ناروغۍ اخته شوم او زما ښۍ پښه یې فلج کړه.»
هغه زیاتوي، د پولیو ناروغۍ په سبب د ور پېښ معلولیت له کبله اوس له خورا سختو ستونزو سره لاس او ګرېوان دی چې له زغملو پرته یې بله چاره نه لري.
ده وویل، هغه مهال یې کورنۍ د ده د درملنې ډېره هڅه وکړه خو خبر نه وو چې د پولیو ناروغي درملنه نه لري.
سردار محمد اوس په بد اقتصادي وضعیت کې ژوند کوي او د معلولیت له کبله د کار کولو جوګه نه دی، خو بیا هم د دریو اولادونو پالنه کوي.
هغه وایي: «په ډېرو ستونزو مې واده وکړ، خو لس کاله وروسته مې مېرمن وفات شوه او د دریو لوڼو د پالنې مسوولیت یوازې زما غاړې ته ولوېد، دا دی تاسې مې وینئ چې د لویې لارې پر سر ناست یم او سوال کوم څو هغوی ته یوه مړۍ ډوډۍ برابره کړم.»
نوموړی د خپل سخت ژوند او کړاوونو لامل په ماشومتوب کې له پولیو واکسین څخه بې برخې کېدل ګڼي او وايي: «که د پولیو واکسین راکړل شوی وای نو اوس به روغ او جوړ وای.» © له پولیو خلاص افغانستان/ ۱۴۰۳/ سعید زابلی
د سردار محمد ستونرمن ژوند د خلکو پر مخ پرانیستي کتاب دی؛ هغه خپلې درې لوڼې د یوې روښانه راتلونکې په هیله روزي او غواړي هغوی هغه ژوند ولري چې ده له لاسه ورکړی دی.
نوموړی د خپل سخت ژوند او کړاوونو لامل په ماشومتوب کې له پولیو واکسین څخه بې برخې کېدل ګڼي او وايي: «که د پولیو واکسین راکړل شوی وای نو اوس به روغ او جوړ وای.»
هغه خپل ځان ته په کتو پر والدینو غږ کوي چې که اوس هم د پولیو واکسین پر ارزښت شک کوئ او خپل ماشومان نه واکسینوئ نو ګواکې هغوس په خپل لاس تباه کوئ.
نوموړی خلکو ته د خپل ژوند د دغې ترخې کیسې په کولو هغوی هڅوي چې د واکسین ارزښت درک کړي او خپل ماشومان تر پنځه کلنۍ په منظم ډول واکسین کړي څو له دایمي فلج څخه وژغورل شي.
سردار محمد د ټولنې په نوم په خپل پیغام کې وايي: «زما وخت تېر شوی دی، خو هغه ماشومان چې نن د پولیو واکسین په وسیله خوندي کېږي، د افغانستان راتلونکی جوړوي؛ که هره کورنۍ خپل ماشومان واکسین کړي، نو د پولیو پر وړاندې بریا حتمي ده.»
د سردار محمد په څېر د پولیو قربانیان د دې ناروغۍ د دردونو او کړاوونو ژوندۍ بېلګې دي چې په خپلو خبرو او کیسو سره کولای شي د ټولنې د عامه پوهاوي په برخه کې مهم رول ولوبوي.
د دوی سخت ژوند موږ متوجه کوي چې په هر کمپاین کې د پولیو واکسین دوه څاڅکي کولای شي یو ماشوم له تلپاتې فلج څخه وژغوري.
سعید زابلی، له پولیو خلاص افغانستان
