د پولیو واکسین دوه څاڅکي؛ اوس یې ډېر خلک په ارزښت پوه شوي دي
هوسۍ احمدزۍ
کابل، افغانستان (۲۶ غویی ۱۴۰۳) – ۲۸ کلن عبدالشکور حیدري د پولیو واکسین کمپاین هغه زحمتکښ رضاکار دی چې له تېروو اوو کلونو راهیسې د کابل ښار په لومړۍ ناحیه کې په دنده بوخت دی او تر هر ماشوم پورې د پولیو واکسین رسوي.
نوموړی چې د واکسین بکس یې پر اوږه و او د یادې شوې سیمې په کوڅو کې له پنځو کلونو د کم عمر ماشومانو په لټه کې و، وویل؛ د رضاکارانو د بې سارې هڅو په پایله کې اوس د ګڼو کورنیو د پوهاوي کچه لوړه شوې او د پولیو واکسین په ارزښت پوهېدلې دي.
هغه زیاته کړه، اوس د کورنیو مشران په ډېرې خوشحالۍ له دوی غوښتنه کوي چې ماشومان یې واکسین کړي.
حیدري دغه بدلون خوشحاله کړی او وايي، که ټول خلک دغه ډول د خپلو ماشومانو د روغتیا په فکر کې شي او هغوی په منظم ډول واکسین کړي نو ډېر ژر به د پولیو ناروغي له افغانستان څخه ورکه شي.
نوموړي وویل: «څو کاله مخکې چې به مو کله د کمپاین پر مهال کورونو ته د ماشومانو واکسینولو لپاره مراجعه کوله نو خلکو ته به مو زارۍ کولې چې خپل ماشومان واکسین کړي خو په دې وروستیو کلونو کې د خلکو د پوهاوي کچه لوړه شوې ده، اوس دوی له موږ څخه غوښتنه کوي چې ماشومان یې واکسین کړو، دغه راز که کله کمپاین ځنډېږي نو د ځنډ پوښتنه یې کوي.»
دی وايي، دغه حالت د رضاکارانو روحیه لوړه کړې ده او فکر کوي چې د دوی د کلونو زیار او زحمت په پایله کې اوس خلک د واکسین په ارزښت پوهېدلي او په خوشحالۍ د خپلو ماشومانو واکسینو ته حاضرېږي.
حیدري وویل: «ګوزڼ یوه خطرناکه ناروغي ده چې د ماشوم او د هغه د کورنۍ ژوند تباه کوي، ځکه زه غواړم چې زما د مسوولیت په ساحه کې یو ماشوم هم له واکسین څخه بې برخې پاتې نه شي او دا خپله دیني او ملي وجیبه بولم.»
نوموړی په تېرو اوو کلونو کې د خپل له لاسته راوړنو یوه دا ګڼي چې ګڼې هغه کورنۍ چې پخوا یې خپلو ماشومانو ته واکسین نه ورکاوه، اوس د هغوی واکسینولو ته راضي کړي دي.
د پولیو واکسسین کمپانی رضاکار عبدالشکور حیدري چې د واکسین بکس یې پر اوږه و او د کابل ښار د لومړي ناحیې په کوڅو کې له پنځو کلونو د کم عمر ماشومانو په لټه کې و، وویل؛ د رضاکارانو د بې سارې هڅو په پایله کې اوس د ګڼو کورنیو د پوهاوي کچه لوړه شوې او د پولیو واکسین په ارزښت پوهېدلې دي © له پولیو خلاص افغانستان/ ۱۴۰۳/ هوسۍ احمدزۍ
هغه د بېلګې په توګه د کابل ښار د لومړۍ ناحیې هغه کورنۍ یادوي چې اجازه یې نه ورکوله ماشومان یې واکسین شي.
ده وویل: «زما د کار لومړۍ ورځې وې، د کورونو له منځه پر یو داسې کور ور برابر شوم چې مشر یې راته وویل ځئ لاړ شئ، مو خپله ماشومان نه واکسینوو، خو زه انتظار پاتې شوم، خبرې مې ورسره وکړې، قناعت یې نه کاوه، وروسته مې خپل مسوول خبر کړ، هغه راغی د سیمې له ملک او ملا سره یو ځای یې کور ته ورغلو، له ډېرو خبرو او دلایلو وروسته مو قناعت ورکړ چې خپل څلور ماشومان واکسین کړي.»
دی وايي، دا یې د ژوند ښه خاطره هم ده او هیڅلکه یې نه هېروي.
نوموړی ژمنتیا ښيي چې له پولیو ناروغۍ څخه د خوندیوب په موخه به خپلو هڅو ته دوام ورکوي څو یوه ورځ افغانستان په بشپړه توګه د پولیو ناروغۍ له شره په امان شي.
د عامې روغتیا وزارت ویاند ډاکټر شرافت زمان د پولیو ناروغۍ په مخنیوي کې د رضاکارانو هڅې ستايي او یادونه کوي چې دغه وزارت له پولیو ناروغۍ سره مبارزې ته ژمن دی.
هغه زیاته کړه، د دوی او همکارو ادارو د هڅو په پایله کې اوس د هغو کورنیو شمېر کم شوی چې مخکې یې د خپلو ماشومانو له واکسینولو انکار کاوه.
دی وايي، په تېرو کلونو کې چې په هېواد کې ناامني وه، شاوخوا ۴ میلیونه ماشومان د پولیو واکسین له کمپاین څخه پاتې وو خو په دې وروستییو چې امنیتي وضعیت ښه شوی ۳.۶ میلیونه ماشومانو ته رسېدنه شوې او دغه شمېر ورځ تر بلې ډېرېږي.
