د واکسین ځواک؛ د ماشومانو لپاره د یوه خوندي راتلونکي د جوړولو هڅې
غزني، افغانستان (۲۶ لړم ۱۴۰۳) – د غزني د قرهباغ ولسوالۍ اوسېدونکی ۲۸ کلن عبدالباسط چې د دغه ولایت د مرکز اړوند په غیبقلندر سیمه کې اوسېږي، هر سهار له لمر راختو سره د پښتوناباد سیمې تر روغتیايي مرکز پورې پنځه کیلومتره پلې لار وهي.
هغه په دغه روغتیايي مرکز کې د واکسیناتور په توګه دنده ترسره کوي او هره ورځ هغه ماشومان د پولیو او نورو خطرناکو ساري ناروغیو پر وړاندې واکسینوي چې له بېلابېلو سیمو دلته راوستل کېږي.
عبدالباري چې د لیسانس تر کچې یې زده کړې کړې او وروسته یې د نرسینګ دوه کلنې زده کړې هم بشپړې کړې وايي، له تېرو دریو کلونو راهیسې یې د ټولنې د روغتیا دغه سپېڅلي ماموریت ته اوږه ورکړې ده.
هغه زیاتوي: «ویاړم چې د یو واکسیناتور په توګه د پولیو او نورو خطرناکو ساري ناروغیو د مخنیوي هڅه کوم، زه غواړم د ټولنې راتلونکی (ماشومان) روغ ژوند ولري او راتلونکی یې خوندي وي.»
د ټولنې پوهاوی، د بدلون څرک
عبدالباسط، چې د دریو ماشومانو پلار هم دی وايي، د پخوا په پرتله د والدینو د پوهاوي کچه لوړه شوې ده او دغه روغتیايي مرکز ته په ډېر شمېر ماشومان د واکسین لپاره راوستل کېږي.
هغه زیاتوي: «اوس مېندې او پلرونه د خپلو ماشومانو روغتیا ته ډېر پام کوي، دغه روغتیايي مرکز ته د نورو واکسینونو تر څنګ د پولیو واکسین لپاره هم ماشومان راوستل کېږي، د دغو ماشومانو ډېره برخه هغوی جوړوي چې په کمپاینونو کې له پولیو واکسین څخه پاتې شوي وي.»
د ده په خبره، په دغه روغتیايي مرکز کې هره ورځ له ۱۵ تر ۲۰ ماشومانو ته د پولیو په ګډون د ټولو ساري ناروغیو واکسین ورکوي.
هغه وویل: «زه د ماشومانو د واکسینولو تر څنګ یو بل مهم رسالت هم تر سره کوم او هغه دا چې له هرې راغلې کورنۍ غوښتنه کوم چې په خپل ګاونډ کې نورې کورنۍ هم وهڅوي چې خپل ماشومان د واکسین لپاره دغه روغتیايي مرکز ته راولي.»
عبدالباسط په دغه روغتیايي مرکز کې د واکسیناتور په توګه دنده ترسره کوي او هره ورځ هغه ماشومان د پولیو او نورو خطرناکو ساري ناروغیو پر وړاندې واکسینوي چې له بېلابېلو سیمو دلته راوستل کېږي. © له پولیو خلاص افغانستان/ ۱۴۰۳/ رحمت الله مرجانخېل
د بېپروايي پایلې
عبدالباسط وايي، له بده مرغه په ټولنه کې لا هم داسې کورنۍ چې د خپلو ماشومانو د روغتیا او راتلونکي په اړه ناغېړي کوي چې نه یوازې هغوی بلکې ټولې ټولنې ته بدې پایلې لرلای شي.
هغه وویل: «هغه کورنۍ چې خپلو ماشومان په ځانګړي ډول د پولیو ناروغۍ پر وړاندې نه واکسینوي، نه یوازې خپل ماشومان بلکې د نورو ماشومانو روغتیا هم له ګواښ سره مخ کوي، ځکه که یو ماشوم په دې ناروغي اخته شي نو کولای شي ۲۰۰ نور ماشومان هم په دې ناروغي اخته کړي.»
دی وايي، دا د ده او د ټولنې د هر وګړي مسوولیت دی چې په دې مهمه موضوع خلک وپوهوي او د تکرار مخنیوی یې وکړي.
روغتیايي مرکزونه: د ماشومانو د خوندي راتلونکي ډاډ
د پښتونآباد سیمې قومي مشر، ۵۳ کلن حاجي حضرت محمد، د عبدالباسط او د دغه روغتیايي مرکز د واکسیناسیون څانګې د خدماتو ستاینه کوي او وايي: «دلته د روغتیايي مرکز شتون او د درملنې تر څنګ په کې د واکسیناسیون خدماتو وړاندې کول لویه لاسته راوړنه ده، خلکو ته په کار ده له دغو خدماتو د خپلو ماشومانو د خوندي راتلونکي لپاره ګټه واخلي او هغوی د پولیو او نورو ناروغیو د واکسین لپاره دغه روغتیايي مرکز ته راولي.»
همدارنګه د دې سیمې بل غلام نبي هم وايي چې دغه روغتیايي مرکز او کارکوونکو یې د ماشومانو په روغتیا کې مهم رول لوبولی دی.
دی وايي: «که هره کورنۍ خپل ماشومان د واکسین لپاره دغه روغتیايي مرکز ته راولي نو موږ کولای شو د خپلې ټولنې راتلونکی له ګواښ څخه وژغورو، دا زموږ ګډ مسؤلیت دی چې یو روغ او خوندي چاپېریال برابر کړو، څو هر ماشوم پکې د خوښۍ او روغتیا ژوند وکړي.»
عبدالباسط د خپلې ټولنې لپاره د یوه رښتیني خدمتګار په څېر کار کوي او هڅه کوي د ماشومانو ژوند د پولیو او نورو ساري ناروغیو له ناوړه پایلو څخه وژغوري. © له پولیو خلاص افغانستان/ ۱۴۰۳/ رحمت الله مرجانخېل
د راتلونکې لپاره هیله
عبدالباسط په دې باور دی چې د خلکو د پوهاوي ډېروالی افغانستان د پولیو له ګواښه ژغورلای شي.
هغه وايي: «که څه هم پولیو په ډېرو هېوادونو کې له منځه تللې ده، خو افغانستان او پاکستان هغه دوه هېوادونه دي چې لا هم د دې ناروغۍ ویروس ماشومان ګواښي، دا زموږ مسوولیت دی چې له کمپاینونو او روغتیايي مرکزونو ګټه واخلو او راتلونکی نسل خوندي کړو.»
عبدالباسط د خپلې ټولنې لپاره د یوه رښتیني خدمتګار په څېر کار کوي او هڅه کوي د ماشومانو ژوند د پولیو او نورو ساري ناروغیو له ناوړه پایلو څخه وژغوري.
افغانستان د پولیو او نورو خطرناکو ناروغیو د له منځه وړلو لپاره د عبدالباسط په څېر ځوانانو نه ستړې کېدونکو هڅو ته اړتیا لري، هغه یو ژوندی مثال دی چې په عملي کار سره د خپلې ټولنې لپاره روښانه راتلونکی جوړوي.
رحمت الله مرجانخېل، له پولیو خلاص افغانستان
