د پولیو/ ګوزڼ واکسین ملي کمپاین پیل شو
د افغانستان د عامې روغتیا وزارت د نړیوالو ادارو په ملاتړ د ۲۰۲۴ز کال لپاره د پولیو واکسین لومړی ملي کمپاین پیل کړ. دغه کمپاین چې په ټول هېواد کې پلی کېږي، په ترڅ کې به یې شاوخوا ۱۰،۷۲ میلیونه له پنځو کلونو کم عمره ماشومان واکسین شي. دا کمپاین به د روان ۲۰۲۴ز کال د اپرېل میاشتې له ۲۹مې د مې تر ۲مې نېټې دوام وکړي، خو د وروستیو اورښتونو او سړې هوا له کبله به دغه کمپاین په غور، ډایکنډي او بامیان ولایتونو کې څه وخت وروسته پلی شي. د دغه کمپاین په ترڅ کې به له ۶ تر ۵۹ میاشتو عمر لرونکو ماشومانو ته ویټامین (A) هم ورکړل شي چې د هغوی د سترګو، پوستکی او معافیت سیسټم په روغ ساتلو کې مرسته کوي.
د عامې روغتیا وزیر ډاکټر قلندر عباد د دغه کمپاین د پیل په مناسبت وویل: «موږ له نړیوالو ادارو سره په ګډه ژمن یو چې په ټول هېواد کې پولیو ناروغي له منځه یوسو.»
هغه زیاته کړه: «موږ باید شپه او ورځ کار وکړو او د پولیو واکسین د کمپاینونو ترڅنګ نورو بشپړوونکو روغتیايي خدمتونو ته دوام ورکړو څو په ټول هېواد کې د پولیو ناروغۍ ختمولو موخې ته ورسېږو.»
هغه همدارنګه څرګنده کړه: «د پولیو ناروغۍ ختمولو لپاره د والدینو، دینی علماوو او قومي مخورو په ګډون د ټولو افغانانو ملاتړ اړین دی، موږ له ټولو غوښتنه کوو چې له دې ناروغۍ سره په مبارزه کې خپل مسوولیت ترسره کړي او د خپلو ماشومانو روغتیا او خوندیتوب ته پاملرنه وکړي.»
پولیو یوه ویروسي ناروغي ده چې هیڅ درملنه نه لري او مخنیوی یې یواځي په واکسین سره شونی دی، پولیو ویروس د ماشومانو د دایمي ګوزڼ او یا هم مرګ سبب کېدای شي.
له پولیو ناروغۍ سره په مبارزه کې د ټولنې د ټولو وګړو ملاتړ مهم دی. والدین کولای شي د پولیو واکسین په ترڅ کې د خپلو ماشومانو په واکسینولو سره هغوی له دایمي ګوزڼ څخه خوندي کړي. قومي مخور کولای شي د خپلو سیمو خلک وهڅوي څو خپل ماشومان واکسین کړي او د پولیو واکسین له ټیمونو سره مرسته وکړي څو کمپاین په ښه توګه پلی شي.
