د پولیو پر ضد د یوه خوستي ځوان نهماتېدونکې مبارزه
خوست، افغانستان (۱۰ کب ۱۴۰۳) – د خوست ولایت په اسماعیلخېلو او مندوزیو ولسوالۍ کې، چې یو وخت پهکې ډېرو کورنیو خپل ماشومان نه واکسینول، د عظیم الله اشنا په نوم یو ځوان د پولیو واکسین د څو ټیمونو د همغږي کوونکي/ کوراډېنېټر په توګه ننګوونکې خو خورا مهمه دنده ترسره کوي.
نوموړی چې ۲۸ کاله عمر لري او د شېخ زاید پوهنتون د حقوقو او سیاسي علومو له پوهنځي فارغ شوی، له تېرو لسو کلونو راهیسې دغه درانه مسوولیت ته اوږه ورکړې ده.
هغه په خپلو هڅو د دې سیمې زرګونه ماشومان د پولیو ویروس له ګواښ څخه خوندي کړی او د هغوی راتلونکی یې روښانه کړی دی.
د مبارزې پیل
عظیم الله اشنا کلونه مخکې داسې مهال په دې ولسوالۍ کې د پولیو پر ضد د مبارزې لار ونیوله چې ګڼو کورنیو د پولیو ناروغۍ د خطرونو او واکسین د ارزښت په اړه پوهاوی نه درلود او د خپلو ماشومانو له واکسنیولو یې ډډه کوله.
نوموړی وايي: «هغه مهال ځینو خلکو نه یوازې دا چې خپلو ماشومانو ته یې واکسین نه ورکاوه، بلکې نورو ته یې هم د پولیو واکسین په اړه ناسم معلومات ورکول. خو ما پرېکړه وکړه چې دغه ډول ذهنیتونه بدل کړم.»
د خلکو د ذهنیتونو بدلون
د دې مبارزې لپاره، اشنا یوازې د واکسین پر تطبیق بسنه و نه کړه، بلکې د هر کمپاین پر مهال یې د جوماتونو له امامانو، قومي مشرانو او د سیمې له نورو نفوذ لرونکو وګړو سره د عامه پوهاوي ناستې جوړې کړې، هغوی ته یې علمي دلایل وړاندې کړل او له هغوی سره یې د هغو کورنیو کیسې شریکې کړې چې ماشومان یې د واکسین نه کولو له امله فلج شوي وو.
اشنا او د هغه ټیم ته دا کار آسانه نه و. کله ناکله به له مخالفتونو سره مخ کېدل او حتی د دوی پر وړاندې یې خنډونه جوړول؛ خو د دوی نه ستړې کېدونکو هڅو کرار کرار نتیجه ورکړه.
اشنا او همکارانو یې هڅه کوله د هر انکار تر شا دلیل پیدا کړي؛ که کومه کورنۍ به اندېښمنه وه، نو هغوی به روغتیاپالان ورسره بوتلل. که کوم چا به له دیني اړخه شکونه درلودل نو د سیمې له علماوو به یې مرسته غوښته.
د دغو هڅو نتیجه دا شوه، چې د جنت ګل منګل د کورنۍ په څېر، چې کلونه یې د خپلو ماشومانو له واکسینولو انکار کاوه، بالاخره قانع شوه.
اوس جنت ګل د هر کمپاین پر مهال نه یوازې خپل ماشومان واکسینوي، بلکې خپل ګاونډیان هم هڅوي چې ماشومان واکسین کړي.
اشنا وايي: «کله چې موږ جنت ګل ته د پولیو خطرونه تشریح کړل نو باور یې راغی. اوس جنت ګل زموږ یو فعال ملاتړ کوونکی دی چې له موږ سره د عامه پوهاوي په ناستو کې ګډون کوي او خلکو ته د واکسین اهمیت بیانوي.»
همدارنګه، د حاجي حمید الله په نوم د سیمې یو بل مشر، چې یو وخت یې د واکسین په اړه شک درلود، د اشنا د دوامداره هڅو په پایله کې یې ذهنیت بدل شو. هغه د کمپاین په لومړۍ ورځ خپل لمسیان واکسین ته راوستل او له خلکو یې هم وغوښتل چې خپل ماشومان واکسین کړي.
په دې اړه پهخپله حاجي حمیدالله وايي: «مخکې مې فکر کاوه چې ښايي واکسین زموږ ماشومانو ته زیان ورسوي، خو کله چې ما د پولیو له امله د فلج شوو ماشومانو کیسې واورېدې نو د واکسین په ارزښت پوه شوم. اوس زه په هر کمپاین کې له اشنا سره ملګری یم او خلکو ته توصیه کوم، چې د خپلو ماشومانو روغتیا جدي ونیسي او هغوی د پولیو ناروغۍ پر وړاندې واکسین کړي.»
اشنا د پولیو پر ضد د مبارزې یوه ژوندۍ نمونه ده — یو ځوان چې د ټولنې د خیر لپاره یې خپلې شخصي آرامۍ ته شا کړې، او د ټولنې د ماشومانو د روغتیا لپاره یې خپل ژوند وقف کړی دی. © له پولیو خلاص افغانستان / ۱۴۰۳ لمریز
د یوه روښانه راتلونکي لپاره هیله
د عظیم الله اشنا او د هغه د ټیم نهستړې کېدونکې هڅې د خوست ولایت په اسماعیلخېلو او مندوزیو ولسوالۍ کې د پام وړ بدلون راوستی دی. د هغوی پرلهپسې مبارزه د دې لامل شوه، چې د واکسین پر وړاندې مخالفت ورځ تر بلې کم شي او د پولیو ویروس د خپرېدو مخه ونیول شي.
اوس د سیمې ماشومان، چې یو وخت د فلج له خطر سره مخ وو، له خپلو ملګرو سره په خوشحالۍ لوبې کوي، ښوونځیو ته ځي او د خپلو کورنیو د راتلونکي امیدونه بلل کېږي.
اشنا دغه بدلون ته په کتو وايي: «کله چې زه د کمپاین په ورځو کې ګورم چې والدین خپل ماشومان د واکسین لپاره راولي نو د ډېرې خوښۍ احساس کوم، زه فکر کوم چې زموږ د کلونو زحمت بېنتیجې نهدی. د هر ماشوم واکسینول لویه بریا راته ښکاري.»
د اشنا او د هغه د همکارانو سفر لا پای ته نهدی رسېدلی. هغه اوس هم د هر کمپاین پر مهال له خپل ټیم سره اوږه په اوږه د خلکو پوهاوی لوړوي، او ډاډ ترلاسه کوي چې هېڅ ماشوم له واکسین څخه پاتې نهشي.
د هغه هیله دا ده، چې یوه ورځ به افغانستان د پولیو له ویروسه پاک اعلان شي، او هر ماشوم د فلج له خطر پرته لوی شي.
اشنا د پولیو پر ضد د مبارزې یوه ژوندۍ نمونه ده — یو ځوان چې د ټولنې د خیر لپاره یې خپلې شخصي آرامۍ ته شا کړې، او د ټولنې د ماشومانو د روغتیا لپاره یې خپل ژوند وقف کړی دی.
«زه باور لرم چې که موږ ټول سره یو لاس شو، یوه ورځ به د پولیو ناروغۍ تاریخ ته وسپارو. هغه ورځ به زموږ د ټولو لپاره تر ټولو لویه بریا وي.»
