له پولیو ناروغۍ سره په مبارزه کې د «رحمانې حسیني» هڅې
رحمت الله مرجانخېل
غزني، افغانستان (۲۲ کب ۱۴۰۲) – «که زما په سیمه کې یو ماشوم هم د پولیو په ناروغي اخته شي نو د یوه انسان په توګه یې په مسوولیت کې ځان شریک ګڼم.»
دا د غزني ښار د یوې اوسېدونکې ۲۸ کلنې رحمانې حسیني خبرې دي چې د خپل ژوند ډېره برخه یې د انسانیت خدمت ته ځانګړې کړې ده.
هغه چې خړ رنګ حجاب یې اغوستی او تور ماسک یې اچولی، د خپل کشر ورور او یوې بلې همکارې په ملتیا د غزني ښار اړوند په پښتون اباد او قلعه نو سیمو کې په هغو کورنیو پسې کوڅه په کوڅه ګرځي چې د پولیو واکسین په اړه د ناسمو معلوماتو ښکار شوې او خپل ماشومان نه واکسینوي.
دا دغو کورنیو ته د پولیو واکسین د ارزښت په اړه پوهاوی ورکوي او هغوی هڅوي چې خپل ماشومان واکسین کړي څو له پولیو وژونکې او فلجوونکې ناروغۍ څخه وژغورل شي.
رحمانه حسیني وايي، د خپلو دوو خویندو او دوو وروڼو مشره خور ده چې خپلې زده کړې یې تر نیمه عالي کچې رسولې او له قابله ګۍ فارغه شوې ده.
د دې په خبره، په روغتون کې د قابلې په توګه دنده ورته پیدا شوه خو د خپل احساس له مخې یې د ماشومانو د خوندیتوب په موخه د پولیو له منځه وړلو په برخه کې د سوشل موبلایزرې/ مبلغې په توګه کار کولو ته ارزښت ورکړ او شاوخوا درې میاشتې کېږي چې دا دنده مخ ته وړي.
رحمانه حسیني د غزني ښار اړوند په پښتون اباد او قلعه نو سیمو کې کور په کور ګرځي او کورنۍ هڅوي چې خپلو ماشومانو ته د پولیو واکسین ورکړي څو له دغې وژونکې او فلجوونکې ناروغۍ څخه وژغورل شي © له پولیو خلاص افغانستان/ ۱۴۰۲/ رحمت الله مرجانخېل
دا وايي: «ویاړم چې د پولیو پروګرام د یوې مبلغې په توګه کار کوم او دا جوهر په ځان کې وینم څو کورنیو ته قناعت ورکړم چې د پولیو واکسین یې د ماشومانو د روغ راتلونکي لپاره ګټور دی.»
د دې په خبره، په دې موده کې توانېدلې ۱۵ هغه کورنۍ د خپلو ماشومانو واکسینولو ته راضي کړي چې د ناسمو معلوماتو او نه پوهاوي له امله یې مخکې خپل ماشومان نه واکسینول.
حسیني په دې برخه کې د هغې کورنۍ یادونه وکړه چې په دې وروستیو کې له کندهار څخه غزني ته راکډه شوې او له کلونو راهیسې یې د پولیو واکسین بد ګاڼه او خپل ماشومان یې نه واکسینول.
نوموړې وویل: «دغې کورنۍ څو ځلې د پولیو واکسین رضاکاران له خپلې دروازې شړلي وو او ویل یې موږ خپلو ماشومانو ته واکسین نه ورکوو، بیا زه د خپلې همکارې په ملتیا دوه ورځې پر له پسې دغه کور ته ورغلم، د کورنۍ له مشرانو سره مو ډېرې خبرې وکړې، هغوی ته مو د پولیو واکسین ګټې بیان کړې او بالاخره مو راضي کړل چې خپل ماشومان واکسین کړي.»
دا وايي، له پولیو واکسین څخه انکاري کورنیو ته د قناعت ورکولو په موخه له څو ډوله کړنلارو کار اخلي، لومړی د پولیو واکسین ګټې ورته بیانوي او بیا د پولیو ناروغۍ د زیانونو په اړه معلومات ورکوي، ځکه ډېرې دغه راز کورنۍ د واکسین په اړه معلومات نه لري او یا هم په دې تړاو د ناسمو معلوماتو او اوازو ښکار شوي وي.
حسیني زیاتوي، که څه هم د دندې پر مهال د ځینو کورنیو له لوري له ناسمې رویې سره مخ کېږي خو دې ته بیا خوشحالېږي چې انکاري کورنۍ د خپلو ماشومانو واکسینولو ته راضي کوي.
نوموړې وايي، د خپل هېواد د ماشومانو د خوندیتوب او غوره راتلونکې لپاره هڅې خپله دنده ګڼي، که په سیمه کې یو ماشوم هم د پولیو په ناروغي اخته کېږي نو د یوه انسان په توګه یې په مسوولیت کې ځان شریک ګڼي.
د دې په خبره، د ټولنې د هغو وګړو په لیدو سخته ځورېږي چې په ماشومتوب کې د والدینو د بې غورۍ له امله د پولیو ناروغۍ اخته شوي او معلول شوي وي، دغسې کسان هم د خپلو کورنیو او هم د ټولنې د اوږو بار وي.
دا پر والدینو غږ کوي چې که غواړي ماشومان یې د پولیو په وژونکې او فلجوونکې ناروغۍ اخته نه شي نو هغوی ته دې په منظم ډول د پولیو واکسین ورکړي، ځکه دا ناروغي علاج نه لري او مخینوی یې یوازې د واکسین په وسیله ممکن دی.
رحمانه حسیني د یوې انکارۍ کورنۍ له مشر سره خبرې کوي او هغه راضي کوي چې خپلو ماشومانو ته د پولیو واکسین ورکړي © له پولیو خلاص افغانستان/ ۱۴۰۲/ رحمت الله مرجانخېل
شاوخوا پنځوس کلن نظر محمد د هغې کورنۍ مشر دی چې په دې وروستیو کې له کندهاره غزني ته راکډه شوی او د رحمانې حسیني د هڅو په پایله کې د خپلو ماشومانو واکسینولو ته راضي شوی دی.
هغه چې د اوو اولادونو پلار دی، وايي: «موږ په یوې داسې سیمه کې ژوند کاوه چې هلته سختې جګړې وې او له همدې امله د پولیو واکسین رضاکاران ډېر کم راتلل، له بلې خوا د خلکو د پوهې کچه هم ټيټه وه، زما په شمول ډېرو فکر کاوه چې واکسین ماشومانو ته د ګټې پر ځای زیان اړوي.»
دی زیاتوي، کله چې د یو څه په اړه معلومات نه لرې نو معلومه خبره ده چې باور کول سخت وي، خو کله چې رحمانه حسیني له خپل ټیم سره د ده کور ته ورغله او ده ته یې له روغتیايي او اسلامي اړخه د واکسین ګټې بیان کړې نو راضي شو چې خپل ماشومان واکسین کړي.
د ده په خبره، خوښ دی چې په دې موده کې یې ماشومان د پولیو په خطرناکه ناروغي نه دي اخته شوي او د رحمانې حسیني په زیار یې د پولیو واکسین په اړه غلط فهمي لرې شوې ده.
نظر محمد وویل: «اوس چې د واکسین په ارزښت پوه شوی یم، د کورنیو له مشرانو غواړم چې د خپلو ماشومانو په اړه دې بې پروايي نه کوي او وخت په وخت دې یې واکسین کړي څو له پولیو خطرناکې ناروغۍ خوندي پاتې شي.»
