د پولیو د له منځه وړلو ملي بېړني عملیاتي مرکز رییس د روغتیا نړۍوال سازمان د بېړنيو روغتیايي خدماتو له پلاوي سره ولیدل
کابل، افغانستان (۲۱ غویی ۱۴۰۲): د پولیو د له منځه وړلو ملي بېړني عملیاتي مرکز رییس ډاکټر نیک ولي شاه مؤمن نن د غويي میاشتې په ۲۱مه په خپل کاري دفتر کې د روغتیا نړۍوال سازمان اړوند د بېړنيو روغتیايي خدماتو ټیم له استازو سره ولیدل.
دواړو لورو د بېړنیو روغتیايي خدماتو پر اوسني وضعیت خبرې وکړې او د بېړنیو روغتیايي خدماتو په برخه کې د لا ښې همغږۍ په موخه یې پر نږدې او ګډ کار ټینګار وکړ.
د پولیو د له منځه وړلو ملي عملیاتي بېړني عملیاتي مرکز رییس پلاوي ته ډاډ ورکړ چې د عامې روغتیا وزارت مشرتابه تل د هېواد په لرو کلیو او هغو سیمو کې- چې اوسېدونکي یې له روغتیايي خدماتو بې برخې دي- د بېړنیو روغتیايي خدماتو وړاندې کولو د اجنډا او پروګرامونو هرکلی کوي.
