د پولیو واکسین؛ د غور د بې ځایه شوو کورنیو د ماشومانو لپاره نوی امید
غور، افغانستان (۴ لېندۍ ۱۴۰۳) – په یوې دښتې کې - چې لوړو او د پېچلو لارو لرونکو غرونو چاپېره کړې - سلګونه خېمې ولاړې دي؛ دا د هغو کورنیو موقتي استوګنځایونه دي چې سختو سېلابونو یې ټول شته له منځه وړي دي.
دا د غور ولایت د مرکز فیروزکوه ختیځ لوري ته د داخلي بېځایه شوو کمپ دی؛ چې ۳۷ کلن علي احمد پهکې له خپلې مېرمنې او څلورو ماشومانو- چې څلور کلن جواد او یو نیم کلنه زینب هم پهکې شامل دي - ژوند کوي.
له ناورین وروسته بېځایه کېدل
علي احمد او د هغه کورنۍ د روان کال په پیل کې، په مرغاب ولسوالۍ کې د سختو سېلابونو راوتلو وروسته اړ شول چې خپل کور او ځمکه پرېږدي.
هغه اوس له شاوخوا ۵۰۰ نورو کورنیو سره په دغه کمپ کې ژوند کوي؛ چېرې چې د ژوند اسانتیاوې کمې دي او د پولیو په څېر ناروغۍ د ماشومانو ژوند ګواښي.
خو د روغتیايي ډلو او واکسیناتورانو د هڅو له برکته د دغه کمپ له پنځو کلونو څخه کم عمره ماشومان په منظم ډول د پولیو واکسین ترلاسه کوي.
علي احمد د دغو خدمتونو قدرداني کوي او باور لري چې واکسین د هغه ماشومان له پولیو ویروس څخه خوندي کړي دي او هغوی ته یې د یوې ښې راتلونکې هیله ورکړې ده.
هغه وایي: «د واکسین ټیمونه تل کمپ ته راځي او ماشومان واکسینوي، دې چارې زما ماشومان له پولیو ویروس څخه خوندي کړي دي.»
په غور کې د ماشومانو د ناروغیو یو مختصص ډاکټر بصیر احمد پیکار په دغه کمپ کې د ژوند نامساعدو شرایطو ته په کتو ټینګار کوي چې دلته باید د واکسین کمپاینونه دوام وکړي.
هغه وایي: «بېځایه شوي ماشومان د نورو په نسبت ډېر زیانمنونکي دي، که هغوی په منظم ډول واکسین نهشي نو د پولیو په ویروس د اخته کېدو امکان یې شته؛ همدارنګه له بېلابېلو ولسوالیو څخه دغه کمپ ته تګ راتګ د پولیو ویروس د لېږد او خپرېدو خطر ډېروي.»
هغه زیاتوي، په منظم ډول د پولیو واکسین کمپاینونه د ماشومانو د معافیت سیسټم پیاوړی کوي او د ویروس د انتقال او خپرېدو مخینوی کوي.
د غور د عامې روغتیا رییس عبدالستار موفق وایي، ډېری هغه ماشومان چې په دغه کمپ کې ژوند کوي، په پرلهپسې ډول یې د پولیو واکسین ترلاسه کړی دی.
هغه زیاتوي: «زموږ هدف دا دی چې غور او په ځانګړي ډول د داخلي بې ځایه شوو کمپونو ته د پولیو ویروس د انتقال مخنیوی وکړو، روغتیايي ډلې په منظم ډول په خپلو دندو بوختې دي او ماشومان واکسینوي.»
هغه وړاندې وایي: «دا د ماشومانو طبیعي حق دی چې د پولیو ویروس له ګواښ څخه خوندي وساتل شي، څو روښانه راتلونکی ولري، په همدې اساس دا د روغتیايي ټیمونو دنده ده چې ماشومان په منظم ډول واکسین کړي او د پولیو ویروس د خپرېدو مخنیوی وکړي.»
د علی احمد او د هغه د ماشومانو کیسه له سلګونو بېلګو څخه یوه ده چې ښيي د پولیو واکسین څنګه په سختو شرایطو کې د ماشومانو ژوند او راتلونکی خوندي کوي.
له روغتیايي ټیمونو او واکسیناتورانو سره د کورنیو همکاري نه یوازې د ماشومانو د روغتیا ساتنه کوي، بلکې هغوی ته د یوې روښانه راتلونکې هیله هم ورکوي.
مرضیه فروتن | غور