کابل، افغانستان (۳۱ غبرګولی ۱۴۰۲) - ریاض الله د پنځو سر او نیم سر اولادونو پلار دی، په داسې حال کې چې د خپل کور مخ ته ناست و، سوړ اسوېلی یې وکړ او ویې ویل: «زموږ د کلي ډاکټر زما او زما د ماشومانو درملنه نه کوله، نو ما هم تېرې څلور میاشتې خپلو ماشومانو ته د پولیو واکسین نه دی ورکړی.»
هغه زیاتوي، کله چې به یې خپل ماشومان دغه ډاکټر ته ور وستل نو له ده سره به یې ناسمه رویه کوله، د دوی روغتیا ته یې پاملرنه نه کوله او درمل یې هم نه ورکول.
ریاض الله بزګري کوي، ۲۷ کله عمر لري او د ننګرهار ولایت د خوږياڼیو ولسوالۍ اوسېدونکی دی؛ هغه د حلالې نفقې پیدا کولو لپاره ډېر وخت پر خپله ځمکه د غنمو په کرلو بوخت وي او د اړتیا پر مهال د خپلو ماشومانو د درملنې لپاره د خپل کلي ځايي دولتي کلینیک ته مراجعه کوي.
د هغه د دوستانو له قوله، ځايي ډاکټر د نوموړي د خپلوانو له ډلې دی، هغوی په خپلو کې کورنۍ ستونزې لري، ځکه نو ډاکټر هغه او د هغه د کورنۍ روغتیا پاملرنه نه کوي.
ریاض الله په خپله کرونده کې په کار بوخت دی
ریاض الله تصمیم نیولی و چې له ده سره مخالف ډاکټر ته به د خپلو اولادونو د روغتیا په موخه مراجعه نه کوي.
کله چې د پولیو واکسیناتوران د هغه کور ته ورغلل نو ده خپلو ماشومانو ته د پولیو واکسین له ورکولو انکار وکړ؛ خو دغه دریځ د ده په خیر نه و، ښايي له همدې کبله یې ماشومان د پولیو د بدمرغې ناروغۍ له ګواښ سره مخ شوې وای.
ریاض الله پوره څلور میاشتې خپلو ماشومانو ته د پولیو واکسین له ورکولو انکار کړی و چې د هغه دغې کړنې یوازې د ده د ماشومانو نه، بلکې د ټول کلي د ماشومانو روغتیا له ګواښ سره مخ کړې وه.
له ښه مرغه د یونیسف ادارې د پولیو پروګرام یو متخصص ټیم له ریاض الله سره ولیدل او له هغه سره یې د پولیو واکسین د ارزښت او نه واکسینولو په صورت کې ماشومانو ته پر ور پېښېدونکو ګواښونو خبرې وکړې.
هغوی دغه راز نوموړي ته ډاډ ورکړ چې په دولتي روغتون کې به د کلي د نورو وګړو په څېر له ده سره هم ښه چلند کېږي.
یاد شوي ټیم له ریاض الله وغوښتل چې د یوه کس د ناوړه چلن له کبله باید د خپلو ماشومانو روغتیا او ژوند له ګواښ سره مخ نه کړي.
د یونیسف د پولیو پروګرام ټیم له ریاض الله سره د هغه د کور مخ ته د پولیو واکسین پر ګټو خبرې کوي
له دې وروسته چې ریاض الله د خپلو دوو ماشومانو په منځ کې ناست و، په موسکا وویل: «زه خوشحاله یم او د یونیسف د پولیو پروګرام له کارکوونکو مننه کوم چې زما کور ته راغلل او سترګې یې را خلاصې کړې.»
هغه خپلو ماشومانو ته وکتل او په پښېمانۍ یې وویل: «زه اوس د پولیو واکسین په اهمیت پوه شوم، زه پر غلطه وم، ما باید د شخصي لانجې په سبب د پولیو پر ضد د خپلو ماشومانو له واکسینولو ډډه نه وای کړې.»
ریاض الله اوس د پولیو واکسین له نورو انکاري وګړو هم غوښتنه کوي چې خپلو ماشومانو ته د پولیو واکسین ورکړي او په دې توګه هغوی ته د روغ، خوښ او ارام ژوند زمینه مساعده کړي.
ریاض الله او د هغه دوه اولادونه، له واکسین ورکولو وروسته
دا یوازې د ننګرهار د خوږیاڼیو ولسوالۍ د اوسېدونکي ریاض الله کیسه نه ده، بلکې له بده مرغه د افغانستان په ګوټ ګوټ کې نور ورته کسان هم شته چې له پولیو واکسین څخه د بېلابېلو دلایلو له کبله انکار کوي.
د یونیسف ادارې د پولیو پروګرام ټیمونه هڅه کوي څو کور په کور وګرځي او له پولیو واکسین څخه ټول انکاري خلک وهڅوي چې خپل ماشومان د پولیو د وژونکې او دایمي فلجوونکې ناروغۍ پر ضد واکسین کړي.
موږ ټول د ټولنې د اوسېدونکو او والدینو په توګه د خپلو ماشومانو د ښې روغتیا او ارام ژوند په تړاو لوی مسوولیتونه لرو؛ له موږ وروسته زموږ ماشومان زموږ ځای ناستي دي او د هېواد راتلونکی برخلیک په دوی پورې اړه لري.
صحتمند ماشومان د خوږياڼیو ولسوالۍ د حکیم آباد سیمې په ملا کلي کې لوبې کوي
